ထိုင်းနိုင်ငံရောက် မြန်မာရွှေ့ပြောင်းလုပ်သားတွေအတွက် မည်သူမည်ဝါဖြစ်ကြောင်း သက်သေခံလက်မှတ် (Certificate of Identity - CI) ထုတ်ပေးတော့မယ်လို့ စစ်ကောင်စီလက်အောက်ခံ အလုပ်သမား သံအရာရှိရုံးက ဩဂုတ် ၅ ရက်မှာ ထုတ်ပြန်ပါတယ်။
မြန်မာနိုင်ငံနဲ့ ထိုင်းနိုင်ငံက အလုပ်သမားဝန်ကြီးဌာနနှစ်ခု ပူးပေါင်းပြီး ထိုင်းနိုင်ငံမှာရှိတဲ့ မြန်မာရွှေ့ပြောင်းအလုပ်သမားတွေကို စမွတ်စခွန်စခန်း၊ စမွတ်ပရာကန်စခန်း၊ ဆူရတ်ဌာနီစခန်းနဲ့ ချင်းမိုင်စခန်းတို့မှာ ဩဂုတ် ၆ ရက်ကစတင်ကာ လုပ်ဆောင်ပေးတော့မှာလို့ သိရပါတယ်။
CI သက်တမ်းကုန်ဆုံးဖို့ ၆ လအောက် ကျန်နေသူတွေ၊ သက်တမ်းကုန်ဆုံးနေသူတွေကို အသစ်လဲလှယ်ပေးတာ၊ ထိုင်းနိုင်ငံရဲ့ ဘတ်ကတ် (TR-38) လုပ်ငန်းစဉ်နဲ့အတူ CI စာအုပ်အသစ်တွေ ထုတ်ပေးတာ၊ နိုင်ငံသားစိစစ်ရေးကတ်မူရင်း၊ အိမ်ထောင်စုစာရင်းနဲ့ CI စာအုပ်ရှိသူတွေကို အထောက်အထား စိစစ်ပြီးနောက် နိုင်ငံကူးလက်မှတ် (Passport for Thailand Only) ထုတ်ပေးတာနဲ့ Overseas Worker Identification Card – OWIC ကတ်ပြား ထုတ်ပေးတာတွေကို လုပ်ဆောင်ပေးသွားမယ်လို့ သိရပါတယ်။
CI လုပ်ငန်းစဉ် ဆောင်ရွက်ရာမှာ တနင်္လာနေ့တိုင်းနဲ့ ဘန်ကောက် မြန်မာသံရုံးက သတ်မှတ်ထားတဲ့ ရုံးပိတ်ရက်တွေကို အလုပ်နားရက်အဖြစ် သတ်မှတ်သွားမှာဖြစ်တယ်လို့လည်း သိရပါတယ်။
ထိုင်းနိုင်ငံကို ရွှေ့ပြောင်းရောက်ရှိနေတဲ့ မြန်မာနိုင်ငံသား ၇ သန်းဝန်းကျင် ရှိနေတယ်လို့ ထိုင်းအရပ်ဘက်အဖွဲ့တွေရဲ့ စာရင်းအရ သိရပါတယ်။
