ဆော်ဒီအာရေးဘီးယားနိုင်ငံ၊ ရီယာ့ဒ်မြို့မှာကျင်းပတဲ့ PUBG ကမ္ဘာ့ချန်ပီယမ်ရှစ် PUBG Mobile World Cup (PMWC 2025) ပြိုင်ပွဲမှာ မြန်မာကိုယ်စားပြု Yangon Galaticos (YG) အသင်းက အမှတ်အများဆုံးနဲ့ ပထမဆုကို ရရှိခဲ့ပါတယ်။

ဒီပြိုင်ပွဲနဲ့ပတ်သက်လို့ YG အသင်းက “ဒီချန်ပီယံဆုဟာ ကျနော်တို့ YG PUBGM အသင်းအနေနဲ့ ပထမဆုံး World cup ဆုကို ရယူနိုင်ခဲ့တဲ့ မြန်မာ့သမိုင်းရဲ့ မြန်မာနိုင်ငံရဲ့ တသင်းတည်းသော အသင်းအဖြစ် မှတ်တိုင်အသစ်ကို ရေးထိုးနိုင်ခဲ့တာဖြစ်ပါတယ်” လို့ သူတို့ရဲ့ တရားဝင်လူမှုကွန်ရက်မှာ ရေးသားထားပါတယ်။

ကစားသမားတွေကတော့ အသင်း Captain အဖြစ် Smile က ဦးဆောင်ခဲ့ပြီး MAR NETT, SAY CLOUD နဲ့ ROMEO တို့ဖြစ်ပြီး Grand Finals ပြိုင်ပွဲအတွင်း Chicken Dinner ၄ ကြိမ်အထိ ရရှိခဲ့ကာ နောက်ဆုံးရမှတ် ၁၅၇ မှတ်ဗိုလ်စွဲနိုင်ခဲ့တာ ဖြစ်ပါတယ်။

အဲဒီပြိုင်ပွဲကို တကမ္ဘာလုံးက ထိပ်တန်း ၂၄ သင်း ပါဝင်ယှဉ်ပြိုင်ခဲ့ကြပြီး Grand Final အဆင့်ကိုတော့ ဩဂုတ် ၁ ရက် ကနေ ၃ ရက်အတွင်းကျင်းပခဲ့ကာ ကျန်ရှိခဲ့တဲ့ ၁၆ သင်းက ဆက်လက်ယှဉ်ပြိုင်ခဲ့ကြတာဖြစ်ပါတယ်။

ပြိုင်ပွဲနောက်ဆုံးရက် ဩဂုတ် ၃ ရက်နေ့မှာတော့ Yangon Galacticos အသင်းက ဗိုလ်စွဲခဲ့ပြီး ကမ္ဘာ့ချန်ပီယံရှစ်ဖြစ်လာခဲ့ကာ ဆုကြေးငွေအဖြစ် အမေရိကန်ဒေါ်လာ ၅၀၀,၀၀၀ ကျော်ကို ရရှိခဲ့ပါတယ်။

ဒုတိယနေရာမှာတော့ တရုတ်ကိုယ်စားပြု Weibo Gaming အသင်းက ရမှတ် ၁၄၂ မှတ်၊ မွန်ဂိုကိုယ်စားပြု Alpha Gaming အသင်းကတော့ ၁၄၁ မှတ်နဲ့ တတိယနေရာတွေ ရရှိခဲ့ပါတယ်။

PUBG ဆိုတာကတော့ လူ ၄ ယောက် အတူပေါင်းပြီး စစ်တိုက်တဲ့ အွန်လိုင်းဂိမ်းတမျိုးဖြစ်ပြီး Google Play Store မှာတော့ ဒေါင်းလော့ဆွဲသူ သန်း ၅၀၀ (500M+) ရှိကြောင်း ဖော်ပြထားပါတယ်။

ဆော့ကစားသူ သန်းနဲ့ချီရှိပေမဲ့ သန်း ၅၀၀ ဆိုတာဟာ စုစုပေါင်းဒေါင်းလော့ဆွဲတဲ့ အကြိမ်ရေသာဖြစ်ပြီး ဒေါင်းလော့လုပ်သူ အားလုံး ဆော့ကစားနေတယ်လို့ ဆိုလိုတာမဟုတ်ပါဘူး။

မြန်မာနိုင်ငံ အီလက်ထရောနစ်အားကစားအဖွဲ့ချုပ် (MESF) ကလည်း YG အသင်းရဲ့အောင်မြင်မှုကို ချီးကျူးလိုက်ပြီး မြန်မာ Esports အနာဂတ် ချန်ပီယံတွေကို ဆက်လက် ပြုစုပျိုးထောင်သွားမယ်လို့ ထုတ်ပြန်ခဲ့ပါတယ်။