ဧရာဝတီတိုင်း၊ ဟင်္သာတခရိုင်၊ အင်္ဂပူမြို့နယ်၊ ထူးကြီးမြို့က အမှတ် ၂ ရပ်ကွက် အုပ်ချုပ်ရေးမှူးဟာ စစ်မှုထမ်းထောက်ပံ့ငွေ လာဘ်စားတဲ့ကိစ္စနဲ့ စစ်ဆေးခံနေရတယ်လို့ ဒေသခံတွေ၊ အုပ်ချုပ်ရေးအဖွဲ့နဲ့ နီးစပ်သူတွေဆီက သိရပါတယ်။
ထူးကြီးမြို့ အမှတ် ၂ ရပ်ကွက် အုပ်ချုပ်ရေးမှူး စိုးမြင့်က စစ်မှုထမ်း အပတ်စဉ် ၁ ကနေ ၁၁ အထိ လာဘ်စားတဲ့ကိစ္စနဲ့ပတ်သက်လို့ စစ်ကောင်စီရဲ့ မြို့နယ်စစ်မှုထမ်းဆင့်ခေါ်ရေး အဖွဲ့က ဇွန် ၂၈ ရက်မှာ စတင်စစ်ဆေးနေတာလို့ ဆိုပါတယ်။
ဒေသခံ အရပ်သားတယောက်က “စစ်မှုထမ်းငွေကိစ္စနဲ့ အတိုင်ခံရလို့ စစ်ဆေးခံနေရတာ။ ငွေအမောင့် ဘယ်လောက်ဆိုတာ မသိဘူး။ အပတ်စဉ် ၁ ကနေ ၁၁ အထိ ငွေအလွဲသုံးစား လုပ်ထားတယ် ဆိုပြီး တိုင်လို့ စစ်ဆေးနေတာ” လို့ ပြောပါတယ်။
စစ်မှုထမ်းထောက်ပံ့ငွေ လာဘ်စားတဲ့ကိစ္စနဲ့ အုပ်ချုပ်ရေးမှူး စိုးမြင့် စစ်ဆေးခံနေရတဲ့အတွက် ဇွန် ၁ ရက်နေ့မှာ စစ်မှုထမ်းမဲနှိုက်တဲ့ လုပ်ငန်းစဉ်တွေလည်း ရပ်ဆိုင်းထားရတယ်လို့ ဆိုပါတယ်။
အုပ်ချုပ်ရေးအဖွဲ့နဲ့ နီးစပ်သူက “ရပ်ရွာက စုတိုင်တာကြောင့် စစ်ဆေးနေတာပါ။ ဗိုလ်မှူးတွေပါတဲ့ စစ်ဆေးတဲ့အဖွဲ့က စစ်ဆေးနေတာလို့ သိရတယ်။ ဒီဘက်မှာတော့ စစ်မှုထမ်းကိစ္စနဲ့ အခုလို စစ်ဆေးတဲ့အထိ ဖြစ်လာတာ ပထမဦးဆုံးပါပဲ။ လာဘ်စားမှုက ပေါ်ပေါက်နေတယ်” လို့ ပြောပါတယ်။
ထူးကြီးမြို့မှာ အမှတ် ၁ ရပ်ကွက် အုပ်မှူးချုပ်ရေးမှူး ရာဇာထွန်း ဆိုသူမှာလည်း စစ်မှုထမ်းတွေကို ထောက်ပံ့ကြေး ဆိုပြီး ဇွန် ၃၀ ရက်က စတင်ကာ တအိမ် ကျပ် ၅၀,၀၀၀ အထိ ကောက်ယူနေတယ်လို့ ဆိုပါတယ်။
