မန္တလေးတိုင်း၊ ငါန်းဇွန်မြို့နယ်ကို စစ်ကောင်စီတပ်က ဇွန် ၂၈ ရက် နေ့လယ်ပိုင်းမှာ လေယာဉ်နဲ့ဗုံးကြဲလို့ ပြည်သူ ၁ ယောက်သေဆုံး၊ ၆ ယောက် ဒဏ်ရာရပြီး လူနေအိမ်တွေလည်း ထိခိုက်ပျက်စီးကုန်တယ်လို့ ဒေသခံတွေဆီကနေ သိရပါတယ်။

ဒေသပြည်သူ့ကာကွယ်ရေးတပ်ဖွဲ့ဝင်တယောက်ဖြစ်သူ ရဲဘော်အောင်လေး က “နေ့လယ် ၁၁ နာရီခွဲလောက်မှာ ငါန်းဇွန်မြို့နယ်ထဲက ယိုး‌ဒယား (ရွာသစ်) ရွာ ရေဆိပ်နားကို တိုက်ပွဲဖြစ်တာမရှိဘဲနဲ့ စစ်တပ်ဂျက်ဖိုက်တာက ဗုံး ၃ လုံး ကြဲသွားခဲ့တာပါ” လို့ ပြောပါတယ်။

လေကြောင်းတိုက်ခိုက်ခံရလို့ ရေဆိပ်အနီးမှာနေထိုင်ကြတဲ့ အမျိုးသား ၁ ယောက် ဗုံးစထိမှန်သေဆုံးပြီး ၆ ယောက် ဒဏ်ရာရရှိခဲ့သလို လူနေအိမ် ၅ လုံးထက်မနည်းလည်း ထိခိုက်ပျက်စီးသွားခဲ့တယ်လို့ ဆိုပါတယ်။

မြောင်မြို့နယ်ပြည်သူ့ကာကွယ်ရေးနဲ့လုံခြုံရေးအဖွဲ့ (CDSOM) ခေါင်းဆောင် ကိုနွေဦးက “ဗုံးစထိလို့သေဆုံးသွားတဲ့ အမျိုးသားက အသက် ၇၀ အရွယ် ဦးပြား ပါ။ ဒဏ်ရာရတဲ့သူတွေကတော့ အမျိုးသား ၃ ယောက်နဲ့ အမျိုးသမီး ၃ ယောက်ဖြစ်ပါတယ်။ ဒဏ်ရာရတဲ့သူတွေကတော့ အသက် ၅၀ အောက်တွေပါ။ သူတို့ကိုတော့ လုံခြုံတဲ့နေရာတွေမှာ ဆေးကုသမှုပေးထားပါတယ်။ အသက်အန္တရာယ်စိုးရိမ်ရတဲ့သူတွေတော့မပါဘူးလို့ သိရပါတယ်ဗျ”လို့ DVB ကို ပြောပါတယ်။

ငါန်းဇွန်မြို့နယ်က ဒေသခံတွေအနေနဲ့ စစ်ကောင်စီရဲ့​လေကြောင်းတိုက်ခိုက်မှုတွေကို သတိထားနေထိုင်ကြဖို့နဲ့ ဗုံးခိုကျင်းတွေတူးထားကြပြီး လေကြောင်းရန်ကာကွယ်ရေး အစီအမံတွေကို အထူးဆောင်ရွက်ထားကြဖို့လည်း သတိပေးတိုက်တွန်းထားတယ်လို့လည်း သူက ဆက်ပြောပါတယ်။

ပြည်သူ့ကာကွယ်ရေးပူးပေါင်းတပ်ဖွဲ့တွေဟာ ပြီးခဲ့တဲ့နှစ် သြဂုတ် ၁၀ နေ့ကစတင်ခဲ့တဲ့ မြင်းခြံခရိုင်အထူးစစ်ဆင်ရေး (Myingyan District Special Operation - MDSO) အဖြစ် မြင်းခြံ-နွားထိုးကြီး-တောင်သာနဲ့ ငါန်းဇွန်မြို့နယ်က စစ်ကောင်စီတပ်စခန်းတွေကို ထိုးစစ်ဆင်တိုက်ခိုက်နေသလို စစ်ကောင်စီတပ်ဟာလည်း အဲဒီမြို့နယ်တွေက စစ်ရေးနဲ့မသက်ဆိုင်တဲ့ အရပ်သားပြည်သူတွေကိုပစ်မှတ်ထားပြီး လေကြောင်းကနေ တိုက်ခိုက်နေတာကြောင့် ဒေသခံပြည်သူတွေ သေဆုံးဒဏ်ရာရကြသလို လူနေအိမ်တွေ မီးလောင်ပျက်စီးရတယ်လို့ နွားထိုးကြီးမြို့နယ်၊ ပြည်သူ့အုပ်ချုပ်ရေးအဖွဲ့၊ လူ့အခွင့်အရေးတာဝန်ခံဆီကနေ သိရပါတယ်။