ရန်ကုန်၊ သာကေတက မိကျောင်းမွေးမြူရေးစခန်းကို လာရောက်လည်ပတ်သူ မရှိသလောက် ဖြစ်နေပြီး အသားဈေး၊ ငါးဈေးတွေ မြင့်တက်လာလို့ မိကျောင်းတွေကို တပတ်မှာ ၂ ရက်ပဲ အစာကျွေးနိုင်တယ်လို့ သိရပါတယ်။

ကိုဗစ်-၁၉ ရောဂါဖြစ်ပွားချိန်မှာ ပိတ်ထားခဲ့တဲ့ သာကေတ မိကျောင်းမွေးမြူရေးစခန်းကို ၂၀၂၄ ခုနှစ် အောက်တိုဘာ ၂၉ ရက်မှာ ပြန်လည်ဖွင့်လှစ်ခဲ့တာဖြစ်ပြီး လာရောက်လည်ပတ်သူကလည်း မရှိသလောက်ပဲလို့ ဆိုပါတယ်။

ပြန်လည်ဖွင့်လှစ်ပြီး ၈ လကြာတဲ့အထိ မိကျောင်းမွေးမြူရေးစခန်းကို လာရောက်လည်ပတ်သူ နည်းပါးနေသေးလို့ မိကျောင်းတွေကို တပတ်မှာ ၂ ရက်ပဲ အစာကျွေးနိုင်တယ်လို့ စခန်း တာဝန်ရှိသူတယောက်က ပြောပါတယ်။

“မနှစ်ကမှ ပြန်ဖွင့်နိုင်တာ။ ကိုဗစ်နဲ့ နိုင်ငံရေးအပြောင်းအလဲတွေကြောင့် ပြန်မဖွင့်နိုင်တော့တာ။ အဲဒီကာလမှာလည်း မိကျောင်းတွေကို အစာကျွေးဖို့ အလှူရှင်တွေကလည်း သိပ်မရှိဘူး။ လာတဲ့သူကလည်း မရှိတော့ သူတို့ရဲ့အစာအတွက်က အခက်အခဲရှိတယ်။ တပတ်မှာ ၂ ရက်လောက်ပဲ အစာကကျွေးနိုင်တော့တယ်။ ဧည့်သည်အဝင်မှ မရှိတာ။”

မိကျောင်းတွေကို တကြိမ် အစာကျွေးရင် ပိဿာချိန် ၆၀၀ နဲ့ ၇၀၀ ကြားကျွေးရပြီး အပတ်စဉ် ဗုဒ္ဓဟူးနေ့နဲ့ စနေနေ့ နှစ်ရက်ပဲ ကျွေးတယ်လို့ သိရပါတယ်။

မိကျောင်းစာ ရောင်းချသူတယောက်က “စနေ၊ တနင်္ဂနွေဆိုရင် ဧည့်သည်တော့ လာတယ်။ အဲဒီရက်လေးပဲ အစာရောင်းရတာ။ မိကျောင်းစာအ‌နေနဲ့ ငါးဖယ်ရိုးနဲ့ ဆိတ်ရိုး ၂ မျိုးရောင်းတယ်။ ၅,၀၀၀ ကနေ ၂၀,၀၀၀ အထိ ဈေးအစားစားရှိပါတယ်” လို့ ပြောပါတယ်။

မြန်မာနိုင်ငံမှာ မိကျောင်းမျိုးစိတ် ၄ မျိုးရှိပြီး သာကေတမြို့နယ်၊ စက်မှုဇုန်ရပ်ကွက်၊ မိကျောင်းမွေးမြူရေးစခန်းမှာ ငမိုးရိပ် လို့ခေါ်တဲ့ ရေငန်မိကျောင်း Crocodylus porosus  မျိုးစိတ် ၅ ပေကနေ ၁၀ ပေအထက်အရွယ် အကောင် ၃၅၀ ကျော် မွေးမြူထားပါတယ်။

ဝင်ကြေးအနေနဲ့ နိုင်ငံခြားသားတယောက်ကို ငွေကျပ် ၅,၀၀၀၊ နိုင်ငံသားလူကြီးတယောက်ကို ငွေကျပ် ၁,၀၀၀ နဲ့ ၅ နှစ်အောက်ကလေးတွေကိုတော့ အခမဲ့အဖြစ် သတ်မှတ်ထားပါတယ်။