ယီမင်နိုင်ငံက ဟူသီတွေဟာ ဂါဇာကမ်းမြောင်၊ အီရန်နဲ့ ပါလက်စတိုင်းတို့မှာ စည်းလုံးညီညွတ်မှုကို ပြသဖို့ ယီမင်မြို့တော် ဆာနာနဲ့ တခြားနေရာ ၄၀၀ ကျော်မှာ လူထုစုဝေးပွဲကြီးတွေကို စီစဉ်ခဲ့ပြီး မကြာသေးမီက အစ္စရေးရဲ့ တိုက်ခိုက်မှုတွေကို ရှုတ်ချခဲ့ပါတယ်။

ဆန္ဒပြသူတွေက အစ္စရေးနဲ့ အမေရိကန်တို့ရဲ့ ရာဇ၀တ်မှုတွေကို ဆန့်ကျင်ပြီး ဂါဇာကမ်းမြောင်နဲ့ အီရန်တို့အပေါ် မဖောက်ပြန်နဲ့ ဆိုတဲ့ ဆောင်ပုဒ်ကို ကိုင်ဆောင် ဆန္ဒပြခဲ့ကြပါတယ်။

ဒေသတွင်း တင်းမာမှုတွေ ပြင်းထန်လာချိန်မှာ ဂါဇာနဲ့ အီရန်အစိုးရတို့ကို ထောက်ခံကြောင်း ဟစ်ကြွေးခဲ့ပါတယ်။

ပါလက်စတိုင်းနဲ့ အီရန်အလံတွေကို လွှင့်တင်ရင်း အီရန်ရဲ့ အရပ်ဘက်နဲ့ အခြေခံအဆောက်အအုံတွေကို အစ္စရေးရဲ့ လေကြောင်းတိုက်ခိုက်မှုကို ရှုတ်ချတဲ့ ကြွေးကြော်သံတွေကို ဟစ်ကြွေးရင်း ဆန္ဒပြပွဲကို ဆင်နွှဲခဲ့ကြပါတယ်။

ချိုးဖောက်မှုတွေလို့ သူတို့ကဖော်ပြထားတဲ့ လုပ်ရပ်တွေကို ရပ်တန့်ဖို့နဲ့ အစ္စရေးအတွက် အမေရိကန်ရဲ့ စစ်ရေးအကူအညီကို အဆုံးသတ်ဖို့ နိုင်ငံတကာ လုပ်ဆောင်ချက်တွေကိုလည်း ဆန္ဒပြသူတွေက တောင်းဆိုခဲ့ပါတယ်။

အီရန်အစ္စလာမ်မစ်သမ္မတနိုင်ငံကို တိုက်ခိုက်ခြင်းဟာ ရေကြောင်းလမ်းတွေ၊ ကမ္ဘာလုံးဆိုင်ရာ စီးပွားရေးစီမံကိန်းတွေကို အန္တရာယ်ဖြစ်စေနိုင်လို့ နိုင်ငံတကာငြိမ်းချမ်းရေးနဲ့ လုံခြုံရေးကို အပြင်းအထန် ခြိမ်းခြောက်လာတယ်လို့ ဟူသီရဲ့ ပထမလက်ထောက်ဝန်ကြီးချုပ် မိုဟာမက် မူဖ်တက်က ပြောပါတယ်။

အန်စာအလ္လာ အဖွဲ့ခေါင်းဆောင် အဗ်ဒူမာလစ်ခ်အယ်လ်ဟူသီက ရုပ်မြင်သံကြားကနေ မိန့်ခွန်းပြောပြီးတဲ့နောက် နာရီပိုင်းအကြာမှာ ချီတက်ပွဲ ပေါ်ပေါက်ခဲ့တာပါ။ သူက မိန့်ခွန်းထဲမှာ အီရန်ရဲ့ လုပ်ရပ်တွေအတွက် စည်းလုံးညီညွတ်မှု အပြည့်ရှိကြောင်း ကြေညာခဲ့ပြီး ယီမင်ရဲ့ ရပ်တည်ချက်ဟာ အီရန်နဲ့ ဂါဇာကမ်းမြောင်တို့နဲ့ လိုက်လျောညီထွေရှိမယ်လို့ သူက ပြောပါတယ်။ အမေရိကန်နဲ့ အစ္စရေးတို့ရဲ့ ရန်လိုမှုကို ဆန့်ကျင်တယ်လို့လဲ ပြောပါတယ်။

အစ္စရေးနဲ့ အီရန်တို့အကြား တိုက်ရိုက် စစ်ရေးအရ ထိပ်တိုက်ရင်ဆိုင်မှု ဖြစ်ပွားပြီးနောက်ပိုင်း အခု ချီတက်ပွဲဟာ ပထမဆုံးအကြိမ်ပါ။ ဇွန် ၁၃ ရက်က အီရန်နိုင်ငံထဲကို အစ္စရေးက လေကြောင်းနဲ့ တိုက်ခိုက်လို့ အီရန်ရဲ့ အကြီးတန်း စစ်ဘက် တပ်မှူးတွေ၊ နျူကလီးယားသိပ္ပံပညာရှင်တွေနဲ့ အရပ်သားအများအပြား သေဆုံးခဲ့ပါတယ်။

အီရန်က အစ္စရေး ပစ်မှတ်တွေကို ဒုံးကျည်နဲ့ မောင်းသူမဲ့လေယာဉ်တွေနဲ့ လက်တုံ့ပြန်တိုက်ခိုက်ခဲ့လို့ အသေအပျောက်နဲ့ သိသာထင်ရှားတဲ့ အပျက်အစီးတွေ ဖြစ်ခဲ့ပါတယ်။ အစ္စရေးနဲ့ အီရန်တို့ဟာ ပဋိပက္ခ ဒုတိယပတ်အတွင်း လေကြောင်းတိုက်ခိုက်နေကြဆဲ ဖြစ်ပါတယ်။

Source: Reuters