ထိုင်းနိုင်ငံမှာ ကိုဗစ်-၁၉ ရောဂါပြန်လည်ကူးစက်ဖြစ်ပွားနေတာမှာ မေ ၂၅ မှ  ၃၁ ရက်အထိ တပတ်အတွင်း ရောဂါပိုးကူးစက်ခံရသူ ‌၇၃,၀၆၅  ယောက်ရှိပြီး သေဆုံးသူ ၆ ယောက် ရှိတယ်လို့  ထိုင်းနိုင်ငံကူးစက်ရောဂါထိန်းချုပ်ရေးဦးစီးဌာနက ဇွန် ၂ ရက်မှာ ထုတ်ပြန်ပါတယ်။

၂၀၂၅ ဇန်နဝါရီ ၁ ရက်မှ မေ ၃၁ ရက်အထိ ၅ လအတွင်း ကိုဗစ်-၁၉ ကူးစက်ခံရသူ ၂၉၂, ၆၁၉ ယောက် သေဆုံးသူ ၆၃  ယောက် ရှိပြီး သေဆုံးမှုရာခိုင်နှုန်းမှာ ၀ ဒသမ ၀၂ ရှိကာ  ရောဂါကူးစက်နှုန်း မြင့်မားလေ့ရှိတဲ့ ဇွန်လထဲက အရေအတွက်မပါဝင်သေးဘူးလို့ ဆိုပါတယ်။

ဇွန်လဟာ မိုးဦးကျရာသီဖြစ်ပြီး ကျောင်းဖွင့်ချိန်လည်းဖြစ်လို့ ခါတိုင်းလတွေထက် ကူးစက်နှုန်း ပိုများတယ်၊  ဒီနှစ်ထဲ ကူးစက်တဲ့ ကိုဗစ်-၁၉ အမျိုးအစားဟာ အိုမီခရွန်မျိုးစိတ်ကွဲ  NB 1.8.1 ဖြစ်ပြီး ကူးစက်ပြန့်ပွားနှုန်းမြန်ပေမဲ့ အန္တရာယ်မဆိုးရွားကြောင်း၊ ကာကွယ်ဆေးထိုးဖူးသူတွေအတွက် လုံးဝအကာအကွယ်ပေးနိုင်ခြင်းမရှိပေမဲ့ အခြေအနေမဆိုးရွားအောင်တော့ ထိန်းပေးတယ်လို့ ဗိုင်းရပ်စ်ဆေးခန်း ကျွမ်းကျင်ရေးဗဟိုဌာနမှ ဒေါက်တာ ယုန်းဖုဝေါ့လ်ဝမ်းက သတင်းထောက်တွေကို ပြောပါတယ်။

ထိုင်းနိုင်ငံမှာ ကိုဗစ်-၁၉ ရောဂါကို ရာသီအလိုက် ဖြစ်ပွားလေ့ရှိတဲ့ ရောဂါလို့ သတ်မှတ်ထားပြီး  ဇွန်လမှာ ကူးစက်မှုအမြင့်မားဆုံး ဖြစ်ပါတယ်။

ဇူလိုင်နောက်ဆုံးပတ်မှာ ကူးစက်နှုန်း ကျဆင်းလေ့ရှိကာ ကိုဗစ်-၁၉ စဖြစ်တဲ့ ပထမ ၃ နှစ်အတွင်း သေဆုံးသူ ၃၀,၀၀၀ ကျော်ရှိပြီး ၄ နှစ်မြောက်မှာ သေဆုံးသူ ၆၀၀ ကျော်၊ ၅ နှစ်မြောက်မှာ ၂၀၀ ကျော်၊ ၂၀၂၅ နှစ်ထဲမှာ ၆၀ ကျော်သာရှိတာကြောင့် သေဆုံးမှုနှုန်း တဖြည်းဖြည်း ကျဆင်းသွားမယ့် အခြေအနေရှိတယ်လို့ ထိုင်းကျန်းမာရေးဌာနတာဝန်ရှိသူက ပြောပါတယ်။

Source: ThaiPBS News / Thairath