ဂျော်ဂျီယာနိုင်ငံရဲ့ ဝန်ကြီးချုပ်ဟောင်း ဘီလီယံနာ ဘစ်ဒ်ဇီနာ အိုင်ဗန်နစ်ရှ်ဗီလီကို လိမ်လည်ထွက်ပြေးသွားတဲ့ သူ့လက်ထောက်ဟောင်းကို ဖမ်းမိထားကြောင်း ဂျော်ဂျီယာ အာဏာပိုင်တွေက မေ ၂၇ ရက်မှာ ပြောပါတယ်။

အဲဒီအမျိုးသားဟာ သူ့အထက်လူကြီးဟောင်းဆီက ဒေါ်လာ သန်း ၈၀၀ ကျော် တန်ဖိုးရှိတဲ့ ဒစ်ဂျစ်တယ် ငွေကြေးတွေကို အလွဲသုံးစားလုပ်မှု စွဲချက်နဲ့ တရားစွဲခံနေရချိန်အတွင်း ဒီနှစ်အစောပိုင်းက နိုင်ငံကနေ ထွက်ပြေးသွားသူဖြစ်တယ်လို့ ဆိုပါတယ်။

ဂျော်ဂျီ ဘာချီယာ့ရှ်ဗီလီကို လိမ်လည်မှုနဲ့ မျက်ကွယ်မှာ ထောင်ဒဏ် ၁၁ နှစ် ချမှတ်ထားတာဖြစ်ပြီး ဝန်ကြီးချုပ်ဟောင်းရဲ့ ရင်းနှီးမြုပ်နှံမှုရန်ပုံငွေကို လည်ပတ် လုပ်ဆောင်ခဲ့ဖူးသူ ဘာချီယာ့ရှ်ဗီလီက သူ အမှားမလုပ်ထားကြောင်း ငြင်းဆိုခဲ့ပြီး သူ့အပေါ်စွဲချက်တွေကလည်း နိုင်ငံရေးလှုံ့ဆော်မှု ဖြစ်တယ်လို့ ဆိုပါတယ်။

အခုကိစ္စကလည်း ရုရှားနဲ့စစ်ဖြစ်နေတဲ့ ယူကရိန်းကို လူသိရှင်ကြား ထောက်ခံပြလိုက်ခြင်းကနေ ဝန်ကြီးချုပ်ဟောင်း အိုင်ဗန်နစ်ရှ်ဗီလီနဲ့ လမ်းခွဲခဲ့ခြင်းအတွက် သူ့ကို အပြစ်ပေးဖို့  ရည်ရွယ်လုပ်ဆောင်တာလို့လည်း ဆိုပါတယ်။

ဂျော်ဂျီယာပြည်နယ် လုံခြုံရေးဌာနက နိုင်ငံရဲ့ တောင်ပိုင်းနယ်စပ်အနီး အာမေးနီးယားနဲ့ အဇာဘိုင်ဂျန် နယ်စပ်အနီးမှာ ဘာချီယာ့ရှ်ဗီလီကို ဖမ်းမိခဲ့ပြီး တရားမဝင် နယ်စပ်ဖြတ်ကျော်မှုအတွက် စုံစမ်းစစ်ဆေးခံနေရကြောင်း ဖေ့စ်ဘွတ်ခ်မှာ ပို့စ်တင်ထားတာပါ။

သူဟာ မတ်လမှာ ဂျော်ဂျီယာနိုင်ငံကနေ ကားထဲမှာပုန်းအောင်းကာ ထွက်ပြေးသွားပြီး အာမေးနီးယားကို ဝင်ရောက်ပြီးတော့မှ  တတိယနိုင်ငံတခုကို ဆက်လက်ပြောင်းရွှေ့ခဲ့တယ်လို့ အာဏာပိုင်တွေက ပြောပါတယ်။

ဘာချီယာ့ရှ်ဗီလီဟာ ဂျော်ဂျီယာကို အတင်းအကျပ် ပြန်ပို့ခံရပြီး ညှဉ်းပန်းနှိပ်စက်ခံရမယ့် အန္တရာယ် ရှိနေတယ်လို့ ဘာချီယာ့ရှ်ဗီလီရဲ့ ရှေ့နေတယောက်ဖြစ်တဲ့ ရောဘတ် အမ်စတာဒမ်က သူ့ဥပဒေရုံး ဝက်ဘ်ဆိုက် ကြေညာချက်ထဲမှာ ထုတ်ပြန်ထားပါတယ်။

Source: Reuters