မြန်မာနိုင်ငံမှာ စစ်ကောင်စီတပ်ကို တိုက်ခိုက်နေတဲ့ လက်နက်ကိုင်အဖွဲ့ရဲ့ အဖွဲ့ဝင် ၁၀ ယောက်ကို အိန္ဒိယလုံခြုံရေးတပ်ဖွဲ့တွေက သတ်ဖြတ်လိုက်ပါတယ်။ ဒီသတင်းကြောင့် အိန္ဒိယ လုံခြုံရေးအဖွဲ့တွေနဲ့ မြန်မာနယ်စပ်နားက တော်လှန်ရေးအဖွဲ့တွေကြား အတော်လေး လှုပ်လှုပ်ခတ်ခတ် ဖြစ်သွားကြတယ်လို့ သိရပါတယ်။ ဒီဖြစ်ရပ်ဟာ ပြီးခဲ့တဲ့သီတင်းပတ်အတွင်း အိန္ဒိယ-မြန်မာနယ်စပ်က မဏိပူရ်ပြည်နယ်၊ ချန်ဒယ်လ်ဒေသမှာ ဖြစ်ပွားခဲ့တယ်လို့ ယူဆရပါတယ်။
မေလ ၁၅ ရက်မှာ အာသံရိုင်ဖယ် (Assam Rifles) တပ်ဖွဲ့က မဏိပူရ် ချန်ဒယ်လ်ခရိုင်ထဲမှာ “လက်နက်ကိုင် အစွန်းရောက်” ၁၀ ဦးကို ပစ်သတ်ခဲ့တယ်၊ သေဆုံးသူတွေက ဘယ်အဖွဲ့၊ ဘာလူမျိုး ဆိုတာကိုတော့ အသေးစိတ် မသိရသေးဘူးလို့ အိန္ဒိယသတင်းမီဒီယာတွေက ဖော်ပြပါတယ်။ အာသံရိုင်ဖယ်တပ်ဖွဲ့ဆိုတာ အိန္ဒိယစစ်တပ်အောက်က တပ်ဖွဲ့တခု ဖြစ်ပါတယ်။ ဒီစစ်ဆင်ရေးကို ဒီနှစ်တွေအတွင်း လုပ်ဆောင်ခဲ့တဲ့ အကြီးမားဆုံး စစ်ဆင်ရေးတွေထဲမှာ ပါတယ်လို့တောင် ပြောကြပါတယ်။
အိန္ဒိယစစ်တပ်ရဲ့ ကိုလ်ကတ္တားအခြေစိုက် အရှေ့ပိုင်းတိုင်းစစ်ဌာနချုပ်ရဲ့ X လူမှုကွန်ရက် post အရ မေ ၁၄ ရက်က နယူးဆမ်တယ်လ်ရွာနားမှာ လက်နက်ကိုင်တွေ လှုပ်ရှားနေတယ်လို့ သတင်းရတာနဲ့ အာသံရိုင်ဖယ်က စစ်ဆင်ရေး စတင်ခဲ့တယ်လို့ ဆိုပါတယ်။ စစ်ဆင်ရေးလုပ်နေတုန်း သံသယရှိသူတွေက ပစ်ခတ်ခဲ့ပါတယ်။ တပ်ဖွဲ့ဝင်တွေက ပြန်လည်ပစ်ခတ်ခဲ့ရာမှာ ၁၀ ယောက် သေပြီး လက်နက်ခဲယမ်း အများကြီး သိမ်းမိခဲ့တယ်လို့ ဆိုပါတယ်။
ပုံမှန်ဆို ဒီလိုမျိုး တိုက်ကြခိုက်ကြရင် အာသံရိုင်ဖယ် ဒါမှမဟုတ် အိန္ဒိယစစ်တပ်က ချက်ချင်း သတင်းထုတ်ပြန်လေ့ရှိပါတယ်။ အိန္ဒိယတပ်ဖွဲ့တွေနဲ့ လက်နက်ကိုင်တပ်တွေကြား တိုက်ပွဲတွေကတော့ နယ်စပ်မှာ မကြာခဏဖြစ်လေ့ရှိတာ မှန်ပါတယ်။ ဒါပေမဲ့ အခုလို ၁၀ ယောက်လောက် သေတာမျိုးကတော့ ရှားပါတယ်။ ဒါကြောင့် အခုလို အဖြစ်အပျက်မျိုးအတွက် သတင်းမီဒီယာတွေကို ချက်ချင်း သတင်းထုတ်ပြန်တာမျိုး အိန္ဒိယအရာရှိတွေဘက်က လုပ်ဆောင်ကြရမှာပါ။ ဘာပဲဖြစ်ဖြစ် ဒီဖြစ်စဉ်ကြောင့် သက်ဆိုင်ရာ အရာရှိတွေကတော့ ရာထူးတိုးဖို့ အခွင့်အလမ်းပွင့်သွားပါတယ်။ အဲဒီ X ပို့စ်တက်လာပြီးတာနဲ့ သတင်းထောက်တွေဟာ ဖြစ်စဉ်အသေးစိတ်ကို သိရဖို့ ကြိုးစားခဲ့ကြပေမဲ့ မအောင်မြင်ခဲ့ပါဘူး။ အာသံရိုင်ဖယ်ရော၊ အိန္ဒိယစစ်တပ်ပါ ဘာမှမပြောဘဲ “သေဆုံးသွားသူတွေရဲ့ အထောက်အထားကို အတည်ပြုနိုင်ဖို့ ဆက်လက်လုပ်ဆောင်နေဆဲပါ” လို့ပဲ မီဒီယာတွေမှာ ဖြေနေကျအတိုင်း ဖြေကြားခဲ့ပါတယ်။
အိန္ဒိယအစိုးရ သတင်းပြန်ကြားရေးဌာနရဲ့ ထုတ်ပြန်ချက်
မေ ၁၆ ရက်နေ့မှာတော့ အိန္ဒိယအစိုးရရဲ့ သတင်းပြန်ကြားရေးဌာန (PIB) က “မဏိပူရ်ရှိ အိန္ဒိယ-မြန်မာနယ်စပ်တလျှောက် လက်နက်ကိုင် ၁၀ ဦးကို ချေမှုန်းနိုင်ပြီး လက်နက်ခဲယမ်း အများအပြား သိမ်းဆည်းရမိ” ဆိုတဲ့ ခေါင်းစဉ်နဲ့ ထုတ်ပြန်ချက် ထွက်လာခဲ့ပါတယ်။ အာသံရိုင်ဖယ် ကင်းလှည့်တပ်ဖွဲ့ကို ၂၀၂၅ ခုနှစ် မေလ ၁၄ ရက်နေ့မှာ သံသယရှိသူတွေက ပြင်းပြင်းထန်ထန် ပစ်ခတ်ခဲ့တယ်လို့ အဲဒီထုတ်ပြန်ချက်မှာ ပါပါတယ်။ စစ်သားတွေက ချိန်ချိန်ဆဆနဲ့ ပြန်လည်ပစ်ခတ်ခဲ့ပြီး စစ်ဝတ်စုံနဲ့ လူ ၁၀ ယောက် သေခဲ့တယ်လို့ ဆိုပါတယ်။ အဲသည်နောက် အဆိုပါနယ်မြေကို ရှင်းလင်းရေးလုပ်တော့ AK-47 ရိုင်ဖယ် ၇ လက်၊ RPG လောင်ချာ ၁ လက်၊ M4 ရိုင်ဖယ် ၁ လက်၊ SBBL ရိုင်ဖယ် ၄ လက် အပါအဝင် လက်နက်ခဲယမ်း အများအပြား သိမ်းဆည်းရမိခဲ့တယ်လို့လည်း ထုတ်ပြန်ချက်မှာ ဖော်ပြထားတယ်။
ထုတ်ပြန်ချက်ထဲမှာ သေဆုံးသူတွေရဲ့ အထောက်အထားနဲ့ လူမျိုးစုကို ဖော်ပြမထားတာကြောင့် မှန်းဆချက်အမျိုးမျိုး ထွက်ပေါ်လာခဲ့ပါတယ်။ တချို့မီဒီယာတွေက သေဆုံးသူတွေဟာ ကူကီးအမျိုးသားတပ်မတော်-ဗမာ (KNA-B) အဖွဲ့ဝင်တွေလို့ ရေးသားကြပါတယ်။ အိန္ဒိယအစိုးရနဲ့ အပစ်အခတ်ရပ်စဲထားတဲ့ အိန္ဒိယအရှေ့မြောက်ပိုင်းက အကြီးဆုံးအဖွဲ့တွေထဲက တခု ဖြစ်ပါတယ်။ အဲဒီအဖွဲ့မှာ KNA လို့ခေါ်တဲ့ မဏိပူရ်မှာ အခြေစိုက်တဲ့ အဖွဲ့ခွဲတခုလည်းရှိပါသေးတယ်။
ဒါပေမဲ့ သေဆုံးသူတွေက ကူကီးလူမျိုးတွေ ဖြစ်ခဲ့မယ်ဆိုရင် သက်ဆိုင်ရာအဖွဲ့က ထုတ်ပြန်ချက် ထုတ်ခဲ့မှာပါ။ လူမှုကွန်ရက်တွေမှာလည်း ဓာတ်ပုံ၊ ဗီဒီယိုတွေ ပြည့်နေမှာပေါ့။ အိန္ဒိယ အစိုးရနဲ့ အပစ်အခတ် ရပ်စဲထားတဲ့ ကူကီးလက်နက်ကိုင်အဖွဲ့ကြီးတခုရဲ့ ထိပ်တန်းတာဝန်ရှိသူတဦးက “ဖြစ်ခဲ့တဲ့နေရာက ကူကီးလူမျိုးတွေ အများဆုံးနေတဲ့ ဒေသဆိုတာ မှန်ပါတယ်။ ဒါပေမဲ့ သေဆုံးသူတွေဟာ ကျနော်တို့လူမျိုးဆိုတာ ဖြစ်နိုင်ခြေ အရမ်းနည်းပါတယ်။ ကျနော်တို့ ကူကီးလူမျိုးသာ ဖြစ်ခဲ့မယ်ဆိုရင် အသေးစိတ်အချက်အလက်အားလုံးကို ကျနော်တို့ သိနေလောက်ပြီ” လို့ သတင်းထောက်ကို ပြောကြားခဲ့ပါတယ်။
ကူကီးအမျိုးသားတပ်မတော်-ဗမာ (KNA-B) နဲ့ တခြား ကူကီးအဖွဲ့တွေက မြန်မာစစ်ကောင်စီကို ဆန့်ကျင်တဲ့ ဒေသတွင်း တော်လှန်ရေးအဖွဲ့တွေနဲ့ မဟာမိတ်ဖွဲ့ထားကြပါတယ်။ မဏိပူရ်က လက်နက်ကိုင်အဖွဲ့ပေါင်းစုံဟာ မြန်မာပြည်တွင်းစစ်မှာ ပါဝင်နေကြပါတယ်။ မဏိပူရ်ပြည်နယ် အင်ဖာလ်ချိုင့်ဝှမ်းက မေတေးအဖွဲ့တွေ၊ နာဂလန်း ဆိုရှယ်လစ် အမျိုးသားကောင်စီ-အိုင်ဆက်-မူဗာ (NSCN-IM)နဲ့ ကူကီး-ဇို အဖွဲ့တချို့လည်း ပါဝင်တိုက်ခိုက် နေကြပါတယ်။ အိန္ဒိယတပ်ဖွဲ့တွေနဲ့ ကူကီးအဖွဲ့တွေကြား တိုက်ပွဲတွေဟာ မိုင်တေး (Meitei) အဖွဲ့တွေနဲ့ ထိပ်တိုက်တွေ့တာလောက် မများပါဘူး။ မိုင်တေးအဖွဲ့တွေက ခွဲထွက်ရေးကို လိုလားသူတွေ ဖြစ်လို့ပါပဲ။ အင်ဖာလ်က NSCN(IM) နဲ့ မိုင်တေးအရပ်ဘက်အဖွဲ့တွေကတော့ အာသံရိုင်ဖယ်တပ်ဟာ ကူကီးအဖွဲ့တွေနဲ့ ပေါင်းနေတယ်လို့ စွပ်စွဲကြပါတယ်။ ဒါကြောင့်လည်း အစိုးရဟာ ပြီးခဲ့တဲ့နှစ်က အဲဒီဒေသမှာ တခြားစစ်ဘက်အဖွဲ့အစည်း (ဗဟိုအရန်ရဲတပ်ဖွဲ့) တွေကို စေလွှတ်ခဲ့တာပါ။
သေဆုံးသွားတဲ့ မြန်မာ့လက်နက်ကိုင်တွေ
မြန်မာနိုင်ငံက စစ်ကောင်စီကို တိုက်ခိုက်နေတဲ့ ခုခံရေးအဖွဲ့ ၃ ဖွဲ့ကတော့ သေဆုံးသွားတဲ့ လက်နက်ကိုင် ၁၀ ယောက်ဟာ မြန်မာနိုင်ငံ၊ တမူးမြို့နယ်က ပြည်သူ့ကာကွယ်ရေးအဖွဲ့ (ပကဖ) အဖွဲ့ဝင်တွေဖြစ်ကြောင်း အတည်ပြုခဲ့ကြတယ်။ ပကဖအဖွဲ့တွေကို ဒေသန္တရကာကွယ်ရေးတပ်ဖွဲ့ (LDFs) လို့လည်း ခေါ်ကြပြီး ပြည်သူ့ကာကွယ်ရေးတပ်မတော် (PDF) နဲ့ ပိုပြီးအင်အားကြီးတဲ့ တိုင်းရင်းသားလက်နက်ကိုင်အဖွဲ့အစည်းတွေ (EAOs) နဲ့ မတူကြပါဘူး။
ပကဖ တွေက မြန်မာပြည်ရဲ့ နေရာအမျိုးမျိုးမှာ မတူညီတဲ့ တာဝန်တွေ ယူထားကြပါတယ်။ တမူးမှာဆိုရင် ပကဖတွေဟာ ရဲအလုပ်တွေ လုပ်ပေးပြီး စစ်ကောင်စီကို တိုက်တဲ့ PDF တွေကိုလည်း ကူညီကြပါတယ်။ ကလေးမြို့မှာဆိုရင် ပကဖတွေဟာ လက်နက်ထုတ်လုပ်တဲ့ လုပ်ငန်းတွေ လုပ်ကိုင်ကြသလို၊ ကျောင်းဖွင့်ရေးကိစ္စတွေမှာလည်း ပါဝင်နေကြပါတယ်။ ဒီအကြောင်းကို ၂၀၂၃ ခုနှစ် အစောပိုင်းကာလ မြန်မာပြည်ကိုရောက်တော့ ကျနော်တို့ မြင်တွေ့ခဲ့ကြတာပါ။
တမူးမြို့နယ်က အမည်မဖော်လိုသူ PDF တာဝန်ရှိသူတွေက အိန္ဒိယမီဒီယာတွေကို ထုတ်ပြန်ခဲ့တဲ့ အချက်အလက်တွေကို ငြင်းဆိုခဲ့ကြပါတယ်။ PDF တွေက ဒီလူသတ်မှုတွေဟာ တမူးမြို့နယ်၊ ထင်ဇင်း (Htin Zin) နားမှာ ဖြစ်ခဲ့တာလို့ ပြောကြပါတယ်။ “အာသံရိုင်ဖယ်တပ်ဖွဲ့က မေလ ၁၂ ရက်နေ့မှာ မြန်မာပြည်ထဲက ပကဖစခန်းကို ရောက်လာခဲ့တယ်။ ပြီးတော့ ၂ ရက်အကြာမှာ အဖွဲ့ဝင် ၁၀ ယောက်ကို ဖမ်းသွားပါတယ်။ မဏိပူရ်က ချန်ဒယ်လ်ကို ခေါ်ပြီး တနေကုန် ထိန်းသိမ်းထားခဲ့တာ။ သူတို့ စွပ်စွဲသလို နှစ်ဖက်ကြား ထိပ်တိုက်တွေ့တာ ဒါမှမဟုတ် ပစ်ခတ်တာမျိုး လုံးဝမရှိပါဘူး။”
မေလ ၁၆ ရက်အထိ သေဆုံးသူ ၃ ယောက်ကိုတော့ ဘယ်သူဘယ်ဝါမှန်း ဖော်ထုတ်နိုင်ခဲ့တယ်လို့ သူတို့က ပြောပါတယ်။ “သူတို့ထဲမှာ အသက် ၁၈ နှစ်အရွယ် အောင်ဖုန်းမြတ်နဲ့ ကောင်းထက်ဝေတို့ ၂ ယောက် ပါပါတယ်။ နောက်ယောက်ကတော့ အသက် ၂၀ ကျော်လောက်ရှိမယ် ထင်ရတဲ့ မောင်ခမ်း (Kung) ပါ။ သူတို့က ဒီအဖွဲ့ထဲကို ၂ နှစ်လောက်ကတည်းက ဝင်ထားပြီး ရဲအလုပ်နဲ့ လက်နက်ကိုင်တွယ်ပုံ အခြေခံလေ့ကျင့်မှုတချို့ သင်ထားကြပါတယ်။”
မြန်မာပြည်က LDF နဲ့ PDF အများစုဟာ လက်နက်ခဲယမ်းရှားပါးမှုကို အများဆုံး ကြုံတွေ့နေရပါတယ်။ ဒီလိုရှားပါးမှုကြောင့် ကိုယ့်တိုင်လုပ် လက်နက်နဲ့ ဒရုန်းတွေ ထုတ်လုပ်နေကြတာပါ။ PIB ထုတ်ပြန်ချက်မှာ ဖော်ပြထားတဲ့အတိုင်း သေဆုံးသူ ပကဖ တာဝန်ရှိသူတွေဆီမှာ AK-47 ရိုင်ဖယ် ၇ လက်နဲ့ RPG လောင်ချာ ၁ လက် ပါတယ်ဆိုတာကတော့ ယုံရခက်ပါတယ်။ တမူး PDF တွေဟာ တိုက်ခိုက်ရေးရိုင်ဖယ်တွေ တော်တော်လေး လိုအပ်နေကြပါတယ်။ အရှေ့တောင်အာရှရဲ့ မှောင်ခိုဈေးကွက်တွေမှာ Kalashnikov ရိုင်ဖယ်တွေရဲ့ ဈေးနှုန်းက ဆယ်စုနှစ်တခုအတွင်းမှာ ထိုးတက်လာခဲ့တယ်။ ဒါကြောင့်လည်း အမျိုးသားညီညွတ်ရေးအစိုးရ (NUG) က ကချင်လွတ်လပ်ရေးတပ်မတော် (KIA) ကို စစ်ကိုင်းတိုင်းဒေသကြီး (တမူးအပါအဝင်) က PDF တွေကို သူတို့ကိုယ်တိုင်ထုတ်တဲ့ တိုက်ခိုက်ရေးရိုင်ဖယ် (K-O9) နဲ့ လေ့ကျင့်ရေးတွေ ပံ့ပိုးပေးဖို့ ညွှန်ကြားခဲ့ရတာပါ။
လူသတ်မှု သတင်းတွေ ထွက်လာပြီး မကြာခင်မှာ သေဆုံးသူတဦးဟာလို့ ယူဆရတဲ့ သွေးစွန်းနေတဲ့ စစ်ဝတ်စုံ ဓာတ်ပုံတပုံဟာ WhatsApp ရဲ့ group တချို့မှာ ပျံ့နှံ့ခဲ့ပါတယ်။ စစ်ဝတ်စုံရဲ့ ညာဘက်ပခုံးမှာ အဖွဲ့အစည်းရဲ့ အမှတ်တံဆိပ်နဲ့ မြန်မာလို “LDF” လို့ ရေးထားတဲ့ စာလုံးတွေ ပါပါတယ်။ ညာဘက်အိတ်ကပ် အောက်မှာတော့ သေဆုံးသူရဲ့ ခန္ဓာကိုယ်ကို ချွန်ထက်တဲ့ လက်နက်နဲ့ ထိုးသွင်းထားတာမျိုး ဖြစ်နိုင်တယ်လို့ PDF တာဝန်ရှိသူတွေက စွပ်စွဲခဲ့ကြတယ်။
မေလ ၁၇ ရက်မှာတော့ သေဆုံးသူ ၁၀ ယောက်ရဲ့ ရုပ်အလောင်းတွေကို သစ်သား ထမ်းစင်တွေပေါ်မှာ တတန်းတည်းထားပြီး မြေပြင်ပေါ်မှာ ချထားတဲ့ ဗီဒီယိုနဲ့ ဓာတ်ပုံတပုံ ထပ်မံထွက်ပေါ်လာခဲ့ပါတယ်။ PDF တာဝန်ရှိသူတွေက အဲဒီဗီဒီယိုဟာ အသတ်ခံရပြီး မြန်မာဘက်ခြမ်း နယ်စပ်ကို လာရောက်စွန့်ပစ်ခဲ့တဲ့ ပကဖ အလောင်းတွေဖြစ်တယ်လို့ ပြောခဲ့တယ်။ ရုပ်အလောင်းအားလုံးမှာ ညှဉ်းပန်းနှိပ်စက်ထားတဲ့ လက္ခဏာတွေ တွေ့ရပြီး ဘောင်းဘီတွေမှာ သွေးစွန်းနေတာကို တွေ့ရသလို တယောက်ကတော့ အဝတ်အစားတွေ စုတ်ဖြဲခံထားရပြီး ကိုယ်တုံးလုံး လဲလျောင်းနေတာကို တွေ့ခဲ့ရတယ်။ ဒီဓာတ်ပုံနဲ့ ဗီဒီယိုတွေက တကယ်အစစ်အမှန် ဟုတ်၊ မဟုတ်ကိုတော့ သီးခြားအတည်ပြုလို့ မရသေးပါဘူး။
ဘာလို့ သတ်ခဲ့ကြတာလဲ
ဒီလူသတ်မှုရဲ့ အကြောင်းရင်းနဲ့ ပတ်သက်ပြီး အမျိုးမျိုး မှန်းဆနေကြတယ်။ နယ်စပ်တလျှောက် နေထိုင်သူတွေ၊ မဏိပူရ်က လက်နက်ကိုင်အဖွဲ့အစည်း တာဝန်ရှိသူတွေနဲ့ မြန်မာပြည်က PDF အဖွဲ့ဝင်တွေကြားမှာ ယူဆချက် ၃ ခု ပျံ့နေပါတယ်။
ပထမယူဆချက်ကတော့ အာသံရိုင်ဖယ်နဲ့ ပြည်သူ့ကာကွယ်ရေးအဖွဲ့ (PPT) ကြားမှာ "ကောင်းမွန်တဲ့ နားလည်မှု" ရှိခဲ့တယ်လို့ ဆိုတယ်။ ဒါက မီဇိုရမ်ပြည်နယ် နယ်စပ်က အခြေအနေနဲ့ ဆင်တူပါတယ်။ မြန်မာပြည်နယ်စပ် ဒေသအများစုဟာ ပြည်မကနေ ကုန်ပစ္စည်းပို့ဆောင်ရေးလမ်းကြောင်းတွေ ပိတ်နေလို့ အိန္ဒိယကို အဓိက မှီခိုနေရတာပါ။
အာသံရိုင်ဖယ်တပ်ဖွဲ့ဟာ သူတို့ရဲ့တောင်းဆိုချက်တွေကို ပကဖတွေက လက်မခံတဲ့အခါ ရုတ်တရက် ပြောင်းလဲသွားခဲ့တယ်လို့ စွပ်စွဲထားတယ်။ နှစ်ရက်အကြာမှာ ပကဖ တွေကို မလှိမ့်တပတ်နဲ့ ချန်ဒယ်လ်ကို ခေါ်သွားပြီး ညှဉ်းပန်းနှိပ်စက်သတ်ဖြတ်ခဲ့ပါတယ်။ ဒီယူဆချက်အရ အာသံရိုင်ဖယ်တပ်ဟာ အထက်အရာရှိတွေရဲ့ ဖိအားကြောင့် သတ်ဖြတ်ရတာလို့ သုံးသပ်နိုင်ပါတယ်။
ဒုတိယယူဆချက်ကတော့ ဒီဖြစ်ရပ်တခုလုံးကို မြန်မာလက်နက်ကိုင်တွေအပေါ် မကျေနပ်ချက်ရှိတဲ့ အရာရှိတဦးက စီစဉ်ခဲ့တာလို့ ဆိုပါတယ်။ ဒီယူဆချက်အရ အာသံရိုင်ဖယ်အရာရှိတဦးဟာ ပကဖက သူမကြိုက်တဲ့ တခြားအဖွဲ့အစည်းတွေနဲ့ ပူးပေါင်းဆောင်ရွက်တာကြောင့် ကြီးမားတဲ့ မကျေနပ်ချက်တွေ ရှိနေခဲ့တာဖြစ်ပါတယ်။
PDF တာဝန်ရှိသူတွေကြားမှာ သဘောထားကွဲလွဲမှုတွေ ရှိပေမဲ့ တတိယယူဆချက်ကတော့ အခုသတ်ဖြတ်မှုတွေဟာ မှားယွင်းစွာ လုပ်ဆောင်ခဲ့မှုကြောင့် ဖြစ်တာလို့ ဆိုပါတယ်။ အာသံရိုင်ဖယ်က ပကဖ တာဝန်ရှိသူတွေကို UTV လို့ခေါ်တဲ့ စေတနာ့ဝန်ထမ်းအဖွဲ့ဝင်တွေလို့ မှားယွင်းစွာ မှတ်ယူခဲ့တာကြောင့် သတ်ဖြတ်ခဲ့တာလို့ ဆိုပါတယ်။ UTV ဟာ မြန်မာပြည် တောင်ပိုင်း ချင်းပြည်နယ်မှာ လှုပ်ရှားနေတဲ့ လက်နက်ကိုင် ၆ ဖွဲ့ ပါဝင်တဲ့ ချင်းညီနောင်အဖွဲ့ (Chin Brotherhood Alliance) နဲ့ နီးစပ်တယ်လို့ ယူဆရပါတယ်။
လုံခြုံရေးအဖွဲ့တွေကတော့ ဒီကိစ္စနဲ့ပတ်သက်ပြီး မကျေမနပ်ဖြစ်နေကြပါတယ်။ အိန္ဒိယက သူ့ကိုယ်သူ မြန်မာပြည်တွင်းစစ်မှာ ကြားနေတယ်လို့အထင်ခံချင်ပါတယ်။ ဒါပေမဲ့ ကုလသမဂ္ဂအစီရင်ခံစာတခုအရ အိန္ဒိယကုမ္ပဏီတွေဟာ စစ်ကောင်စီကို လက်နက်နဲ့ ပစ္စည်းတွေ ထောက်ပံ့နေခဲ့တာပါ။ တချိန်တည်းမှာပဲ တရုတ်နိုင်ငံရဲ့ မြန်မာပြည်အပေါ် လွှမ်းမိုးမှု တိုးလာတာနဲ့ အိန္ဒိယ-မြန်မာ-ထိုင်း သုံးနိုင်ငံအဝေးပြေးလမ်းမကြီး (India-Myanmar-Thailand Trilateral Highway)နဲ့ ကုလားတန် ဘက်စုံသုံး ကုန်စည်ပို့ဆောင်ရေး စီမံကိန်း (Kaladan Multi Modal Transit Transport Project) တို့ရဲ့ တိုးတက်မှု မရှိတာတွေကြောင့် အိန္ဒိယအစိုးရက စိုးရိမ်မကင်းဖြစ်လာနေပါတယ်။ "ချိန်ခွင်လျှာ ညီမျှအောင်လုပ်ဆောင်ဖို့" လိုအပ်တာကြောင့် အစိုးရက မီဇိုရမ်ပြည်နယ်ဝန်ကြီးချုပ် လယ်လ်ဒူဟိုမာကို အိမ်နီးချင်း ချင်းပြည်နယ်က လက်နက်ကိုင်အဖွဲ့တွေနဲ့ တွေ့ဆုံခွင့်ပြုခဲ့ပြီး လက်နက်ကိုင်အဖွဲ့အစည်းတွေကြား စည်းလုံးညီညွတ်မှုကို မြှင့်တင်ဖို့ ရည်ရွယ်ခဲ့တာပါ။ အိန္ဒိယအစိုးရသတင်းရင်းမြစ်တွေအရ ချန်ဒယ်လ်ဖြစ်ရပ်ကို စစ်တပ်ရဲ့ တပ်ရင်း ၃ ဌာနချုပ်ကနေ စုံစမ်းစစ်ဆေးဖို့ အမိန့်ပေးထားတယ်လို့ ဆိုပါတယ်။
အိန္ဒိယအစိုးရကို ဘယ်လိုလုပ် ယုံကြည်ရတော့မလဲ
ကလေးနဲ့ ချင်းပြည်နယ်က PDF တာဝန်ရှိသူတွေဟာ ဒီဖြစ်ရပ်ကြောင့် တော်တော်လေး ထိတ်လန့်တုန်လှုပ်ခဲ့ကြပါတယ်။ မြန်မာသတင်းဝက်ဘ်ဆိုဒ်တွေမှာတော့ အာသံရိုင်ဖယ်က ပကဖ အဖွဲ့ဝင် ၁၀ ယောက်ကို တမင်တကာ သတ်ခဲ့တာလို့ စွပ်စွဲခဲ့ကြပါတယ်။ ချင်းတွင်းသတင်းအေဂျင်စီက Facebook မှာ "အိန္ဒိယရဲ့ အာသံရိုင်ဖယ်တပ်ဖွဲ့ဟာ သူတို့ထိန်းချုပ်မှုအောက်မှာရှိတဲ့တမူးမြို့နယ်ထဲမှာ ကင်းလှည့်နေတဲ့ PDF အဖွဲ့ဝင်တွေကို ပစ်ခတ်ခဲ့လို့ ဒီလုပ်ရပ်အတွက် တာဝန်ရှိပါတယ်”လို့ တင်ခဲ့တယ်။ အခင်းဖြစ်ပွားခဲ့တဲ့နေရာရဲ့ ဓာတ်ပုံ ၂ ပုံကိုလည်း ပို့စ်မှာ တင်ထားပါတယ်။
တမူးမြို့နယ်က PDF အဖွဲ့ဝင်တယောက်ဟာ လွန်ခဲ့တဲ့နှစ်နှစ်လောက်က အင်တာဗျူးတခုမှာ သူပြောခဲ့ဖူးတာကိုပဲ ထပ်ပြောပါတယ်။ "ကျနော်တို့ တော်လှန်ရေးအဖွဲ့တွေဟာ အိန္ဒိယ၊ မဏိပူရ်နဲ့ ပြည်နယ်အစိုးရကို ဘာအန္တရာယ်မှ မပြုလိုပါဘူး။ ကျနော်တို့ မြန်မာပြည်ကို ဖျက်ဆီးပစ်ဖို့ ကြိုးစားနေတဲ့၊ ရက်စက်ယုတ်မာပြီးအကျင့်ပျက်နေတဲ့ ကိုယ်ကျိုးရှာစစ်ကောင်စီကိုသာ ကျနော်တို့က တိုက်ခိုက်နေတာပါ။ NUG က စစ်ကောင်စီကို အနိုင်ရပြီး အစိုးရဖွဲ့နိုင်ရင် အိန္ဒိယအတွက် ပိုအကျိုးရှိမှာပါ။ ဒါပေမဲ့ ဒီလိုအခြေအနေမျိုးမှာ အိန္ဒိယအစိုးရကို ဘယ်လို ယုံကြည်ရမလဲ" လို့ သူက ဖုန်းဆက်မေးခဲ့ပါတယ်။
ပြီးခဲ့တဲ့နှစ်တုန်းကလည်း မြန်မာပြည် ရခိုင်ပြည်နယ်က ပညာတတ်အသိုက်အဝန်းကြားမှာ ဒီလိုပဲ ပြောသံတွေ ကြားခဲ့ရပါတယ်။ ၁၉၉၈ ခုနှစ်က ဖြစ်ခဲ့တဲ့ နာမည်ဆိုးနဲ့ကျော်ကြားတဲ့ Operation Leech ကို ပြောကြတာပါ။ အိန္ဒိယပိုင်ကျွန်းတကျွန်းကို လက်နက်မှောင်ခိုမှုအတွက်ဆိုပြီး လာရောက်ခဲ့တဲ့ ရခိုင်အမျိုးသားပါတီ (NUPA)နဲ့ ကရင်အမျိုးသားအစည်းအရုံး (KNU) က ၆ ယောက်ကို ပစ်သတ်ခဲ့ပြီး ၇၃ ယောက်ကို အိန္ဒိယစစ်တပ်က ဖမ်းဆီးခဲ့တဲ့ စစ်ဆင်ရေးတခုပဲ ဖြစ်ပါတယ်။
ချန်ဒယ်လ်မှာ ဖြစ်ပွားခဲ့တဲ့ လူသတ်မှုတွေကြောင့် အရှေ့မြောက်ဒေသမှာ အာသံရိုင်ဖယ်ရဲ့ လုပ်ဆောင်ပုံတွေနဲ့ပတ်သက်ပြီး မေးခွန်းများစွာ ထွက်ပေါ်စေခဲ့ပါတယ်။ ဒီတပ်ဖွဲ့ရဲ့ အငြင်းပွားဖွယ်ရာ သမိုင်းကြောင်းနဲ့ အတုအယောင် ထိပ်တိုက်တွေ့ဆုံမှု စွပ်စွဲချက်တွေဟာ အိန္ဒိယစစ်တပ်ရဲ့ ကွပ်ကဲမှုစနစ်မှာ ချို့ယွင်းချက်တွေ ရှိနေတာကို ရှင်းရှင်းလင်းလင်း ပြသနေသလို နှစ်ပေါင်းများစွာကြာအောင် ပိုထိရောက်တဲ့ စနစ်တစ်ခုကို မတည်ဆောက်နိုင်ခဲ့ပါဘူး။ ဒီလိုဖြစ်ရပ်တွေဖြစ်ပျက်ပြီးတိုင်း ကမူးရှုးထိုးတုံ့ပြန်မှုတွေနဲ့ ဖြစ်စဥ်အမှန်ကိုဖုံးကွယ်ဖို့ ကြိုးစားမှုတွေကိုသာ တွေ့ရလေ့ရှိပါတယ်။
The Diplomat မဂ္ဂဇင်း အယ်ဒီတာရဲ့ မှတ်ချက်
ဒီဆောင်းပါး ဖော်ပြပြီးနောက် အိန္ဒိယအစိုးရရဲ့ သတင်းပြန်ကြားရေးဌာန (ကာကွယ်ရေးဌာနခွဲ)က သူတို့ရဲ့ အမြင်နဲ့ ပြန်လည်ဖြေရှင်းချက် ထုတ်ပြန်ခဲ့ပါတယ်။ ထုတ်ပြန်ချက်အရ- အိန္ဒိယ-မြန်မာနယ်စပ် (IMB) တလျှောက် ဧရိယာက တော်တော်လေး ကြမ်းတမ်းပြီး ဖွံ့ဖြိုးမှုလည်း နည်းပါတယ်။ ဆက်သွယ်ရေးလည်း မကောင်းပါဘူး။ မြန်မာဘက်ခြမ်း IMB ဧရိယာက မတူညီတဲ့ တိုင်းရင်းသားလက်နက်ကိုင်အဖွဲ့တွေ အချင်းချင်းကြားမှာရော၊ မြန်မာစစ်တပ်နဲ့ပါ နယ်မြေထိန်းချုပ်ဖို့ တိုက်ခိုက်နေတာတွေကြောင့် ဆူပူမှုတွေ ဖြစ်နေတဲ့နေရာပါ။
အိန္ဒိယကတော့ ရန်သူတွေ အများအပြား ထိုးဖောက်ဝင်ရောက်တာကို ကာကွယ်ဖို့နဲ့ IMB ကိုဖြတ်ပြီး တရားမဝင်လုပ်ငန်းတွေကို တားဆီးဖို့အတွက် နယ်စပ်ခြံစည်းရိုးကို တည်ဆောက်နေပါတယ်။ အိန္ဒိယရဲ့ ခြံစည်းရိုးတည်ဆောက်ရေးကို ဒီလက်နက်ကိုင်အဖွဲ့တွေက ဆန့်ကျင်နေတယ်ဆိုတဲ့ သတင်းမျိုးစုံကိုလည်း ပုံမှန်ရနေပါတယ်။ အိန္ဒိယလုံခြုံရေးတပ်ဖွဲ့တွေ ကတော့ အိန္ဒိယပိုင်နက်မှာ လက်နက်ကိုင်တွေရဲ့တရားမဝင်လုပ်တာတွေနဲ့ နယ်စပ်လမ်းလုပ်ငန်းအဖွဲ့ (BRO) ရဲ့ ခြံစည်းရိုးလုပ်ငန်းကို အနှောင့်အယှက်မပေးနိုင်အောင် ပုံမှန်ကင်းလှည့်ပြီး နယ်မြေထိန်းချုပ်တာတွေ လုပ်နေပါတယ်။
၂၀၂၅ ခုနှစ် မေ ၁၄ ရက်မှာ အာသံရိုင်ဖယ်ရဲ့ ကင်းလှည့်တပ်ဖွဲ့တခုဟာ IMB တလျှောက် ခြံစည်းရိုးတည်ဆောက်နေတဲ့နေရာကို ရှင်းလင်းဖို့ ထွက်ခွာလာတုန်း လက်နက်ကိုင်တွေရဲ့ ပစ်ခတ်မှုကို ခံခဲ့ရပါတယ်။ လက်နက်ကိုင်တွေရဲ့ ရည်ရွယ်ချက်ကတော့ ဆောက်လုပ်ရေးလုပ်သားတွေ ဒါမှမဟုတ် အာသံရိုင်ဖယ်တပ်ဖွဲ့ဝင်တွေကို ပြင်းပြင်းထန်ထန် ထိခိုက်စေပြီး ခြံစည်းရိုးလုပ်ငန်းကို ဟန့်တားဖို့ ဖြစ်တာ ရှင်းပါတယ်။
အိန္ဒိယလုံခြုံရေးတပ်ဖွဲ့တွေက ပရော်ဖက်ရှင်နယ်ကျကျနဲ့ နည်းဗျူဟာပိုင်းအရ တုံ့ပြန်ခဲ့ရာမှာ စစ်သား ၁၀ ယောက်ကို ချေမှုန်းနိုင်ခဲ့ပြီး အလိုအလျောက် သေနတ်တွေနဲ့ တခြားစစ်သုံးပစ္စည်း အများအပြားကို သိမ်းဆည်းရမိခဲ့ပါတယ်။ သေဆုံးသူတွေရဲ့ ရုပ်အလောင်းတွေကို ဘယ်အဖွဲ့/အဖွဲ့ခွဲကမှ ပိုင်ဆိုင်ကြောင်း တောင်းဆိုတာ မရှိခဲ့ပါဘူး။ စစ်ဝတ်စုံဝတ်ထားတာကို တွေ့ရတဲ့ သေဆုံးသူစစ်သည်တွေကို နောက်ပိုင်းမှာ ပကဖ အဖွဲ့ဝင်တွေအဖြစ် ဖော်ထုတ်နိုင်ခဲ့ပါတယ်။
စစ်ဆင်ရေးရဲ့ ကနဦးအသေးစိတ်အချက်အလက်တွေကို အိန္ဒိယစစ်တပ်က စစ်ဆင်ရေးဖြစ်ပွားတဲ့နေ့ မေ ၁၄ ရက်မှာ မှာ လူမှုမီဒီယာကနေ မျှဝေခဲ့ပြီး အသေးစိတ်အချက်အလက်တွေကို ကာကွယ်ရေးဝန်ကြီးဌာန၊ ကိုဟီးမားက ပြောရေးဆိုခွင့်ရှိသူနဲ့ ပြည်သူ့ဆက်ဆံရေးအရာရှိ (PRO) က မေ ၁၅ ရက်မှာ ထပ်မံထုတ်ပြန်ခဲ့ပါတယ်။
မြန်မာဘက်ခြမ်း IMB တလျှောက် ဆက်သွယ်မှုတွေကို လက်ရှိ ပရိုတိုကောတွေအတိုင်း လုပ်ဆောင်ခဲ့ပြီး စစ်ဆင်ရေးအပြီး ၄၈ နာရီကျော်မှသာ သက်ဆိုင်ရာအဖွဲ့ရဲ့ ကိုယ်စားလှယ်တွေက ရုပ်အလောင်းတွေကို လာရောက်ယူဆောင်သွားခဲ့ပါတယ်။
အိန္ဒိယစစ်တပ်နဲ့ အာသံရိုင်ဖယ်တို့ဟာ သူတို့ရဲ့ လုပ်ပိုင်ခွင့်အာဏာအတိုင်း အိန္ဒိယပိုင်နက်အတွင်းမှာပဲ လုပ်ငန်းလုပ်ဆောင်တယ်ဆိုတာကို ထပ်လောင်းပြောကြားချင်ပါတယ်။ စွပ်စွဲချက်တွေဟာ ရည်ရွယ်ချက်ရှိရှိ အထင်အမြင်မှားအောင်လုပ်တာ၊ လုံးဝအခြေအမြစ်မရှိတာနဲ့ မကောင်းကြံစည်တာတွေပဲ ဖြစ်တယ်လို့ အိန္ဒိယအစိုးရရဲ့ သတင်းပြန်ကြားရေးဌာနက ထုတ်ပြန်ပါတယ်။
မြန်မာ-အိန္ဒိယ နယ်စပ်မှာ တမူးခရိုင်၊ ပြည်သူ့ကာကွယ်ရေးအဖွဲ့ (ပကဖ) ရဲဘော်တွေ သတ်ဖြတ်ခံရမှုနဲ့ပတ်သက်လို့ အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီးဌာန ကလည်း မေ ၂၀ ရက်မှာ သဘောထားကြေညာချက်ထုတ်ပြန်ထားပါတယ်။
NUG ကြေညာချက်အပြည့်အစုံ
၁။ စစ်ကိုင်းတိုင်းဒေသကြီး၊ တမူးခရိုင်၊ ကမ္မကြီးကျေးရွာအနီး မြန်မာ-အိန္ဒိယနှစ်နိုင်ငံ နယ်စပ် မြန်မာပြည်ဘက် အခြမ်းတွင် ယာယီစခန်းရွှေ့ပြောင်းတာဝန်ထမ်းဆောင်နေသော တမူးခရိုင်၊ ပြည်သူ့ကာကွယ်ရေး အဖွဲ့ (ပကဖ) ရဲဘော် (၁၀) ဦးစလုံးသည် ၁၄.၅.၂၀၂၅ ရက်နေ့ ၌ စခန်းမှ ပျောက်ဆုံးသွားပြီး အိန္ဒိယနိုင်ငံ နယ်စပ်လုံခြုံရေးတပ်ဖွဲ့ဖြစ်သည့် Assam Rifles (တပ်ရင်း ၁၊ ချန်ဒေခရိုင်၊ မဏိပူရ်ပြည်နယ်) ထံမှ ၁၆.၅.၂၀၂၅ ရက်နေ့တွင် ရုပ်အလောင်း (၁၀) လောင်း အနေဖြင့် ညှိနှိုင်း တောင်းဆိုလက်ခံရရှိခဲ့ပါသည်။
၂။ အမျိုးသားညီညွတ်ရေးအစိုးရ တာဝန်ရှိသူများအနေဖြင့် ပျောက်ဆုံးသည်ဟု သိရသည့် အချိန်မှ (က) ၂၄ နာရီ အတွင်း ပျောက်ဆုံး/ သေဆုံးမှုအား အတည်ပြုချက်ရယူရေးနှင့် ပျောက်ဆုံးသူ/ ရုပ်အလောင်းများ ပြန်လည်ရရှိရေး၊ (ခ) ၇ ရက်အတွင်း စုံစမ်းစစ်ဆေးမှုများ ပြုလုပ်ပြီး တရားဝင် သတင်းထုတ်ပြန်နိုင်ရေး၊ (ဂ) နောက်ဆက်တွဲလုပ်ငန်းများ ဆောင်ရွက်ရေး စသည့် လုပ်ငန်းများအား အိန္ဒိယနိုင်ငံနှင့် စပ်လျဉ်းသော ကိစ္စရပ်များအား ညှိနှိုင်းဆောင်ရွက် ရန် အထူးဖွဲ့စည်းထားသည့် Task Force for India အနေဖြင့် ဆောင်ရွက်ခဲ့ရပြီး ကနဦး မြေပြင် အခြေအနေ ကြားနာစစ်ဆေးမှု အစီရင်ခံစာ တွေ့ရှိချက်များအရ အိန္ဒိယအစိုးရ တာဝန်ရှိသူများ နှင့် တွေ့ဆုံ၍ အမှုမှန်ပေါ်ပေါက်စေရေး ညှိနှိုင်းဆောင်ရွက်လျက်ရှိပါသည်။
၃။ မြေပြင်အခြေအနေ စစ်ဆေးမှုများ၊ အစီရင်ခံစာ တွေ့ရှိချက်များ၊ ဆွေးနွေးတွေ့ရှိချက် များအရ ဖြစ်စဉ်အမှန်သည် အိန္ဒိယနိုင်ငံမီဒီယာများမှ ထုတ်ပြန်ချက်များနှင့် ကွဲလွဲနေပြီး တမူး ခရိုင်၊ ပြည်သူ့ကာကွယ်ရေးအဖွဲ့ (ပကဖ) ရဲဘော် (၁၀) ဦးမှာ အိန္ဒိယနိုင်ငံဘက်ခြမ်းတွင် ထိပ်တိုက်ရင်ဆိုင်တိုက်ပွဲဖြစ်ပွားကာ ကျဆုံးခြင်းမဟုတ်ဘဲ၊ ယာယီစခန်းရွှေ့ပြောင်းမှုအား သတင်းကြိုတင်ပေးပို့ထားသည့်ကြားကပင် Assam Rifles ( တပ်ရင်း ၁၊ ချန်ဒေခရိုင်၊ မဏိပူရ် ပြည်နယ်)၏ အကြောင်းပြချက်မခိုင်လုံစွာဖြင့် ဖမ်းဆီးခေါ်ဆောင်၊ နှိပ်စက်၊ သတ်ဖြတ်ခြင်း ခံရသည်ဟု သုံးသပ်တွေ့ရှိရပါသည်။ အလောင်းများ ပြန်လည်တောင်းခံယူရာတွင်လည်း (က) (ပကဖ) ရဲဘော်များမှ အိန္ဒိယနယ်နိမိတ်အတွင်း ဝင်ရောက်ကာ စတင်တိုက်ခိုက်သောကြောင့် နှိမ်နင်းခြင်းခံရကြောင်း၊ (ခ) နောက်နောင် နိုင်ငံနယ်နိမိတ် ခြံစည်းရိုးခတ်မှုအား မကန့်ကွက် ရန် သဘောတူပါကြောင်း စသည့် အချက်များအား မြန်မာဘက်မှ လာရောက်သည့် တာဝန်ခံများ အား ခေါ်ယူထားကာ ဖိအားပေးလက်မှတ်ထိုးစေပြီးမှ လွှဲပြောင်းပေးကြောင်း သိရှိရသည်။
၄။ စိစစ်တွေ့ရှိချက်များအပေါ်အခြေခံလျက် အိန္ဒိယနိုင်ငံအစိုးရအား အောက်ဖေါ်ပြပါ အချက်များအား ယခုသဘောထား ထုတ်ပြန်မှုနှင့်အတူ တောင်းဆိုအပ်ပါသည် -
(က) အမှုမှန်ပေါ်ပေါက်ရေး ဆောင်ရွက်ပေးရန်
(ခ) အိန္ဒိယကို ဆန့်ကျင်တိုက်ခိုက်နေသူများ မဟုတ်ဟု သိရှိပါလျက် ရက်စက်စွာ သတ်ဖြတ်ခြင်းအပေါ် တာဝန်ယူမှုရှိစွာဖြင့် စုံစမ်းစစ်ဆေး၊ အပြစ်ပေး အရေး ယူ ဖြေရှင်းပေးရန်
(ဂ) နစ်နာမှုများအတွက် တာဝန်ယူ ဆောင်ရွက်ပေးပြီး၊ နစ်နာသူ မိသားစုများအား နစ်နာကြေးပေးဆောင်ရန်
(ဃ) နောင်တွင် အလားတူ ကိစ္စများ မဖြစ်စေရေးအတွက် စီမံဆောင်ရွက်ပေးရန်
(င) နှစ်နိုင်ငံ နယ်ခြားစည်းညှိနှိုင်းမှု မပြီးပြတ်သေးသည့်ကာလတွင် တဖက်သတ် ခြံစည်းရိုးခတ်ခြင်းအားယာယီရပ်ဆိုင်းထားခြင်းဖြင့် ယခုကဲ့သို့ ဖြစ်စဉ်များအား ရှောင်လွှဲရန်
၅။ အမျိုးသားညီညွတ်ရေးအစိုးရအနေဖြင့် ယခုဖြစ်ပွားမှုသည် အိန္ဒိယနိုင်ငံအစိုးရ၏ မူဝါဒသဘောထားရပ်တည်ချက်တစုံတရာကို ကိုယ်စားပြုခြင်းမဟုတ်ဟု ယုံကြည်ပါကြောင်း၊ မိမိတို့အနေဖြင့် ယခင်ပေးပို့ထုတ်ပြန်ထားသည့် မိမိတို့၏မူဝါဒအတိုင်း အိမ်နီးချင်း နှစ်နိုင်ငံ အကြား ဆက်ဆံရေးကို အရှည်ရှေးရှုလျက် နယ်စပ်ဒေသကိစ္စရပ်များတွင် အတတ်နိုင်ဆုံး ပူးပေါင်းဆောင်ရွက်သွားမည် ဖြစ်ပါကြောင်း၊ ယခုထုတ်ပြန်ချက်မှာ မြန်မာပြည်သူများ၏ ဆန္ဒသဘောထားလည်း ဖြစ်သဖြင့် အိန္ဒိယနိုင်ငံအစိုးရအနေဖြင့် အလေးထား ဆောင်ရွက် မည်ဟု ယုံကြည်ပါကြောင်းနှင့် အမှုမှန်မပေါ်ပေါက်ခဲ့ပါက ဖြစ်ပေါ်လာမည့်ကိစ္စများတွင် မိမိ တို့အနေဖြင့် ကိုင်တွယ်ဖြေရှင်းရန် ခက်ခဲမည်ဖြစ်ပါကြောင်း အထူးမေတ္တာရပ်ခံ တောင်းဆို အပ်ပါသည်။
၆။ မြန်မာနိုင်ငံအတွင်းရှိ မိဘပြည်သူများ၊ အိန္ဒိယနိုင်ငံအတွင်းရှိ မြန်မာနိုင်ငံသားများ အနေဖြင့်လည်း တမူးခရိုင် ပြည်သူ့ကာကွယ်ရေးအဖွဲ့ (ပကဖ) ရဲဘော်များ သတ်ဖြတ်ခံရမှုနှင့် ပတ်သက်၍ အမျိုးသားညီညွတ်ရေး အစိုးရအနေဖြင့် သက်ဆိုင်ရာ အိန္ဒိယအစိုးရနှင့် ပူးပေါင်း ဆောင်ရွက်နေမှုအား သိရှိနားလည်ယုံကြည်ကာ၊ အခြားမလိုလားအပ်သော နှစ်နိုင်ငံ ချစ်ကြည်ရေးကို ထိခိုက်စေမည့်ကိစ္စများ၊ အထူးသဖြင့် နယ်စပ်ဒေသရှိ တော်လှန်ရေးအဖွဲ့များ အနေဖြင့်လည်း နိုင်ငံကြီးသားမပီသသည့် မည်သည့်ဆောင်ရွက်ချက်များကိုမျှ မပြုလုပ်ရန် နှင့် မြန်မာ-အိန္ဒိယနှစ်နိုင်ငံ နယ်စပ်ဒေသအတွင်း မူးယစ်ဆေးဝါးတရားမဝင် ရောင်းဝယ် သယ်ဆောင်မှုထိန်းချုပ်ရေးအပါအဝင် တရားဥပဒေစိုးမိုးရေးကိစ္စရပ်များကို သက်ဆိုင်ရာ အဖွဲ့ အစည်းများနှင့် အစဥ်တစိုက်ပူးပေါင်းဆောင်ရွက်ကြပါရန် အထူးမေတ္တာရပ်ခံအပ်ပါသည်။
၇။ သို့ဖြစ်ပါ၍ မြန်မာ-အိန္ဒိယနှစ်နိုင်ငံနယ်စပ်တွင် တမူးခရိုင်၊ ပြည်သူ့ကာကွယ်ရေးအဖွဲ့ (ပကဖ) ရဲဘော်များ သတ်ဖြတ်ခံရမှုနှင့်ပတ်သက်၍ အမျိုးသားညီညွတ်ရေးအစိုးရအနေဖြင့် ဆောင်ရွက်ချက်များ၊ သက်ဆိုင်ရာ အိန္ဒိယနိုင်ငံအစိုးရအပေါ် တောင်းဆိုချက်များနှင့် ပြည်သူ လူထုထံ ပန်ကြားချက်များအား သဘောထားထုတ်ပြန်အပ်ပါသည်။
ရာဂျစ် ဘာတချာရီယာ
(သူ့အတွေး သူ့အမြင် – Op-Ed)
(ဤဆောင်းပါးသည် စာရေးသူ၏ အတွေးအမြင်သာဖြစ်ပြီး ဒီဗွီဘီ၏ အာဘော်မဟုတ်ပါ။)
