စစ်ကိုင်းတိုင်း၊ မုံရွာမြို့နယ်ထဲကို စစ်ကောင်စီတပ်က မေ ၁၇ ရက် မွန်းလွဲ ၂ နာရီခွဲဝန်းကျင်မှာ စက်တပ်လေထီး (Paramotor) နဲ့ ဗုံးကြဲလို့ ကလေးငယ် ၁ ယောက် အပါအ၀င် ပြည်သူ ၄ ယောက် သေဆုံးခဲ့တယ်လို့ မုံရွာမြို့နယ် ပြည်သူ့လုံခြုံရေးအဖွဲ့တာဝန်ခံ ကိုအာကူးက ပြောပါတယ်။
မုံရွာရဲ့အရှေ့ဘက်က စည်သာလေးရွာနားမှာရှိတဲ့ တောတိုက် (တဲတိုက်) ကို မုံရွာ နမခ ထဲကတက်လာတဲ့ Paramotor နဲ့ ဗုံး ၂ လုံး ကြဲချသွားတာလို့ ဆိုပါတယ်။
မုံရွာခရိုင်အမှတ် ၁ တပ်ရင်းရဲ့ ပြန်ကြားရေးတာဝန်ခံ ကိုဒီမို က “တောင်ယာလုပ်ဖို့ အလွယ်တကူ ရွာပြင်ထွက်ပြီး နေကြတဲ့ တဲတိုက်ပါဗျာ။ အိမ်တွေက ၅ အိမ်တောင်မပြည့်ဘူး။ တိုက်ပွဲဖြစ်တာလည်းမရှိဘဲ အသားလွတ်ကြဲသွားတာပါ။ ပွဲချင်းပြီးနေရာမှာတင် ဆုံးသွားတာက ၁၀ နှစ်သားလေး အပါအဝင် ၃ ယောက်ပါ။ နောက်ပြီးမှ ၁ ယောက်က ဆေးကုနေရင်း ညနေရောက်မှ ထပ်ဆုံးသွားတာ။ ကျန်တဲ့ ၁ ယောက်ကတော့ ဆေးကုပေးနေတုန်းပဲ။ နေရာမှာတင် ဆုံးသွားသူတွေက တော်တော်လေး ရုပ်ပျက်ဆင်းပျက်တွေပါ။ အလောင်းတွေက မကြည့်ရက်စရာတွေပါ” လို့ DVB ကို ပြောပါတယ်။
စစ်ကောင်စီတပ်ဟာ မုံရွာမြို့ရဲ့အရှေ့မြောက်ဘက်က အရာတော်မြို့နယ်ထဲမှာရှိတဲ့ ဝါးတန်းကျေးရွာကိုလည်း အဲဒီနေ့ ညနေပိုင်းမှာ စက်တပ်လေထီးနဲ့ ဗုံး ၂ လုံး ထပ်မံကြဲချခဲ့ပြီး ထိခိုက်ပျက်စီးတဲ့ အခြေအနေကိုတော့ စုံစမ်းနေဆဲဖြစ်တယ်လို့လည်း သူက ဆက်ပြောပါတယ်။
အာဏာသိမ်းစစ်ကောင်စီတပ်ဟာ အခုမေလကုန်အထိ အပစ်အခတ် ရပ်စဲထားတယ်လို့ ကြေညာထားပေမဲ့ နေ့စဥ်နဲ့အမျှ လေကြောင်းတိုက်ခိုက်မှုတွေ ဆက်တိုက်ပြုလုပ်နေလို့ အရပ်သားပြည်သူတွေ ထိခိုက်သေဆုံးနေကြရပါတယ်။
