တန့်ဆည်နဲ့ ချောက်မြို့မှာ ပြည်သူ့စစ်နဲ့ ပေါ်တာဆွဲခံရတဲ့တပ်သားသစ်တို့ လက်နက်ခဲယမ်းတွေနဲ့ အလင်းဝင်လာတယ်လို့ သက်ဆိုင်ရာတပ်ဖွဲ့တွေဆီက သိရပါတယ်။
စစ်ကိုင်းတိုင်း၊ တန့်ဆည်မြို့နယ်မှာ ပြည်သူ့စစ်တပ်ဖွဲ့ဝင် ၂ ယောက်ဟာ မေ ၁၂ ရက်နေ့က လက်နက်ခဲယမ်းတွေနဲ့အတူအလင်းဝင်လာတယ်လို့ အမှတ် ၁ စစ်ဒေသ ပြည်သူ့ကာကွယ်ရေး တပ်မတော် ဗျူဟာ ၅၂ (ပေါ်ဦးစစ်ကြောင်း) ဆီကနေ သိရပါတယ်။
ပေါ်ဦးစစ်ကြောင်းရဲ့ပြန်ကြားရေးတာဝန်ခံက “တန့်ဆည်မြို့ပေါ်မှာ အခြေစိုက်တဲ့ ခမရ ၃၆၁ တပ်ရင်းမှ ပစ (ပြည်သူ့စစ်) ၂ ယောက် က MA2 သေနတ် ၁ လက်၊ MA3 သေနတ် ၁ လက်၊ လက်ပစ်ဗုံး ၁ လုံး၊ ကျည်ဘောက်အပိုတွေကျည်ဆံတွေနဲ့အတူ အလင်းဝင်လာခဲ့တာပါ” လို့ ပြောပါတယ်။
အလင်းဝင်လာကြသူတွေကို ငွေကျပ်သိန်း ၅၀ စီ ဆုချီးမြှင့်ပေးထားခဲ့တယ်လို့လည်း ဆိုပါတယ်။
ဗျူဟာ ၅၂ (ပေါ်ဦးစစ်ကြောင်း) ရဲ့ ပြောရေးဆိုခွင့်ရှိတဲ့ မနှင်းဆီ ကလည်း “သူတို့တွေဟာ တပ်တွင်းထဲမှာ ကြီးနိုင်ငယ်ညှဉ်း နှိပ်စက်တာတွေနဲ့ မတရားလုပ်ကိုင်တာတွေမခံနိုင်တာတော့လို့ အမြင်မှန်ရပြီး ပြည်သူ့ဘက်ကို ရပ်တည်ကူးပြောင်းလာခဲ့ကြတာပါ။ အရင်တခါ လက်နက်မဲ့ အလင်းဝင်လာကြတဲ့ ရဲတပ်ဖွဲ့ဝင် ၂ ယောက်နဲ့ဆိုရင် စုစုပေါင်း ၄ ယောက်ရှိပြီ။ သူတို့တွေအားလုံးကို နွေးနွေးထွေးထွေးကြိုဆိုဆက်ဆံပေးခဲ့တယ်။ အခုတော့ သူတို့အားလုံး လွတ်မြောက်နေရာကို ရောက်သွားကြပါပြီ” လို့ DVB ကို ပြောပါတယ်။
မကွေးတိုင်း၊ ချောက်မြို့ပေါ်ကနေ ပေါ်တာဆွဲခံရပြီး စစ်ကောင်စီတပ်ဖွဲ့ဝင်အဖြစ် တာဝန်ထမ်းဆောင်နေရသူ ၁ ယောက်ဟာလည်း လက်ပစ်ဗုံးတွေနဲ့အတူ မေ ၁၅ ရက်နေ့မှာ အလင်းဝင်ရောက်လာတယ်လို့ People Defence Force Chauk (သခင်ဖိုးလှကြီးတပ်ဖွဲ့) ဆီကနေ သိရပါတယ်။
သခင်ဖိုးလှကြီးတပ်ဖွဲ့ရဲ့ပြန်ကြားရေးတာဝန်ရှိသူက “သူက ချောက်မြို့နယ်ဇာတိပါ။ ပြီးခဲ့တဲ့နှစ် နိုဝင်ဘာလထဲမှာ ချောက်မြို့ပေါ်ကိုစျေးဝယ်တက်လာရင်း ပေါ်တာဆွဲခံခဲ့ရတာဖြစ်ပါတယ်။ အဲဒီနောက် ရှမ်းပြည်နယ်တောင်ပိုင်းက ကျိုင်းတောင်းအခြေစိုက် အမှတ် ၃ တန်းမြင့်လေ့ကျင့်ရေးကျောင်းကို ပို့ဆောင်ခံခဲ့ရပြီးတော့ စစ်မှုထမ်းသင်တန်းအပတ်စဉ် ၁၀ သင်တန်းကို ၂ လခွဲတက်ရောက်ခဲ့ရပါတယ်” လို့ ပြောပါတယ်။
အလင်းဝင်ရောက်လာသူ အသက် ၂၂ နှစ်အရွယ် တပ်သား ကျော်ထူး ဟာ ရှေ့တန်းနယ်မြေကို ပို့ဆောင်ခံရတုန်း ယာယီနားခိုတဲ့စစ်ကာင်စီတပ်ရင်းထဲကနေ လက်ပစ်ဗုံး ၂ လုံးယူဆောင်ပြီး ထွက်ပြေးလာခဲ့တာလို့ ဆိုပါတယ်။
သခင်ဖိုးလှကြီးတပ်ဖွဲ့တာဝန်ခံက “ကိုကျော်ထူး က ကျိုင်းတောင်းကနေ သင်တန်းဆင်းတော့ ဟဲဟိုးက ခမရ ၁၈ ကို အပို့ခံခဲ့တယ်။ အဲဒီကနေ အခုလဆန်းပိုင်းမှာ မွန်နဲ့ကရင်ပြည်နယ်ထဲက ရှေ့တန်းစစ်မြေပြင်ကိုပို့တော့ သန်လျင် က ခလရ ၁၃၉ တပ်ရင်းထဲမှာ ယာယီတည်းခိုနေရတဲ့အချိန် လက်ပစ်ဗုံး ၂ လုံးယူပြီး ထွက်ပြေးလာရင်းနဲ့ ကျနော်တို့တပ်ဖွဲ့ဆီကို ဆက်သွယ်ပြီးတော့မှ အလင်းဝင်လာတာဖြစ်ပါတယ်။ ကျနော်တို့တပ်ဖွဲ့ဆီကို အလင်းဝင်လာတာကတော့ သူက ပထမဆုံးပါပဲဗျ” လို့ DVB ကို ပြောပါတယ်။
လက်ရှိမှာတော့ အလင်းဝင်ရလာတဲ့ ကိုကျော်ထူး ကို သခင်ဖိုးလှကြီးတပ်ဖွဲ့ဝင်တွေက စောင့်ရှောက်ပေးထားတယ်လို့ သူက ဆက်ပြောပါတယ်။
