အမေရိကန်ပြည်ထောင်စုရဲ့ သွင်းကုန်အကောက်ခွန်မူဝါဒသစ်ကြောင့် ဧပြီလမှာ ကမ္ဘာ့စားနပ်ရိက္ခာဈေးနှုန်းတွေ မြင့်တက်လာခဲ့တယ်လို့ ကုလသမဂ္ဂစားနပ်ရိက္ခာနဲ့ စိုက်ပျိုးရေးအဖွဲ့ (FAO)က ထုတ်ပြန်ပါတယ်။

FAO စားနပ်ရိက္ခာဈေးနှုန်ညွှန်းကိန်းဟာ တကမ္ဘာလုံးမှာ ရောင်းဝယ်ဖောက်ကားနေတဲ့ စားသောက်ကုန်အားလုံးရဲ့ နိုင်ငံတကာစျေးနှုန်းတွေ လစဉ်အပြောင်းအလဲကို  အခြေခံထားတာပါ။

ဧပြီလမှာ ပျမ်းမျှ ၁၂၈ ဒသမ ၃ မှတ်ရှိပြီး၊ မတ်လကနေ ၁ ဒသမ ၀ ရာခိုင်နှုန်းနဲ့ မနှစ်က အလားတူကာလထက် ၇ ဒသမ ၆ ရာခိုင်နှုန်း မြင့်တက်လာခဲ့ပါတယ်။

သကြားနဲ့ ဟင်းသီးဟင်းရွက်ဆီတွေ ဈေးနှုန်းကျဆင်းနေပေမဲ့ ကောက်နှံစေ့တွေနဲ့ ပဲမျိုးစုံတွေ၊ နို့ထွက်ပစ္စည်းတွေ အသားတွေအတွက် ဈေးနှုန်းတွေ မြင့်တက်ခဲ့တယ်လို့ FAO က ဆိုပါတယ်။

ရာသီအလိုက် ဝယ်လိုအားနဲ့ ရုရှားကနေ ဂျုံတင်ပို့မှု လျော့ကျသွားပြီး အမေရိကန် ဒေါ်လာတန်ဖိုး အားနည်းနေပေမဲ့ FAO အစားအစာ ဈေးနှုန်းညွှန်းကိန်းရဲ့ အကြီးဆုံး အစိတ်အပိုင်းဖြစ်တဲ့ ကောက်နှံစေ့တွေနဲ့ ပဲမျိုးစုံတွေအပေါ် အမေရိကန်ရဲ့ ထပ်ဆောင်းခွန်က အပြင်းထန်ဆုံး သက်ရောက်နေတာကို တွေ့ရတယ်လို့ FAO က ပြောပါတယ်။

နို့ထွက်ပစ္စည်းဈေးတွေ လစဉ် ၂ ဒသမ ၄ ရာခိုင်နှုန်း တက်လာပြီး အသားဈေး ၃ ဒသမ ၂ ရာခိုင်နှုန်း ခုန်တက်သွားခဲ့တာပါ။

အမေရိကန်အကောက်ခွန်မူဝါဒတွေ မကြာခဏ အပြောင်းအလဲများနေတာကြောင့် ကမ္ဘာ့ကုန်သွယ်ရေးတလျှောက် လှိုင်းဂယက်ရိုက်ခတ်နေပြီး တချို့နိုင်ငံတွေက နောက်ထပ် စည်းကြပ်မှုတွေအတွက် ကုန်ပစ္စည်းတွေ သိုလှောင်ထားနိုင်တယ်လို့ စီးပွားရေးပညာရှင်တဦးက ပြောပါတယ်။

ရေတိုဝယ်လိုအား မြင့်တက်လာခြင်းကြောင့် အထူးသဖြင့် မရှိမဖြစ်လိုအပ်တဲ့ စားသောက်ကုန်တွေ ဈေးနှုန်းတိုးမြင့်လာနိုင်တယ်လို့ ဘောဂဗေဒပညာရှင်တယောက်က ပြောပါတယ်။ 

Source: Reuters