ပဲခူးတိုင်း ပြည်မြို့နယ်၊ ၀က်ထီးကန်တိုက်နယ်ထဲက ကျောသာကျေးရွာအုပ်စုမှာ သောက်သုံးရေ တွင်း ၂ တွင်း၊ မိရိုးဖလာတူးထားတဲ့ အုပ်တွင်း ၃ တွင်းကိုပဲ မှီခိုနေရတာကြောင့် နွေမိုးဆောင်း ၃ ရာသီစလုံး ရေအခက်အခဲဖြစ်နေပါတယ်။

အိမ်ခြေ ၂၃၅ ရှိတဲ့ ကျောသာအုပ်စုမှာ စည်ပင်က ကုန်ကျစရိတ်ခံပြီး တူးပေးထားတဲ့ စက်ရေတွင်း အ၀ီဇိတွင်း ၂ တွင်းဟာ ပေ ၂၃၀ အထိနက်ပြီး ရေမထွက်တဲ့အတွက် အဲဒီ ၂ တွင်းထဲက ၁ တွင်းကိုပဲ ဒေသခံရွာသားတွေက ပေ ၄၀၀ အထိ အ၀ီဇိထပ်မံတူးဖော် အသုံးပြုခဲ့ရပါတယ်။

ကျန်တဲ့ စက်ရေတွင်း ၁ တွင်းကိုတော့ စည်ပင်က တူးပေးခဲ့တဲ့ ပေ ၂၃၀ အတိုင်းပဲ အသုံးပြုနေတာကြောင့် ရေထွက်နည်းပြီး မိုးတွင်းလို အချိန်မျိုးမှာတောင် ရေရှားပါးနေတာ ဖြစ်ပါတယ်။

ကျေးရွာအုပ်ချုပ်ရေးမှူး ဦးအောင်သောင်းက “ရေတွင်းတူးပေးတုန်းက ပေ ၂၃၀ အထိပဲ တာဝန်ယူတယ်။ ပေ ၂၃၀ နဲ့ ရေမထွက်ရင်၊ ရွာက ကိုယ့်ငွေနဲ့ ကိုယ်စိုက်ထုတ်တူး ရတော့ တွင်း ၂ တွင်းကို ၁ တွင်းကပဲ ပေ ၄၀၀ ထိ ငွေစိုက်ထုတ်ပြီး တူးလို့ ရေရတယ်။ ကျန်တဲ့ ၁ တွင်းကတော့ ဆက်မတူးတော့ မိသားစုတစု သုံးဖို့အတွက်လောက်ပဲ ရေကရတယ်။ ရေကတော့ နွေ၊ မိုး၊ ဆောင်း၊ ၃ ရာသီလုံးရှားတာ” လို့ ပြောပါတယ်။

အ၀ီဇိတွင်းတွေကို ၂၀၀၈ ခုနှစ်မှာ ၁ တွင်း၊ ၂၀၁၃ ဘဏ္ဍာနှစ်မှာ နောက် ၁ တွင်း စည်ပင်သာယာရေးဝန်ကြီးဌာနက ပေ ၂၃၀ အနက်ထိ တူးဖော်ပေးခဲ့တာပါ။

လောလောဆယ်မှာတော့ ဘိုးဘွားစဉ်စက်ကရှိတဲ့ အုပ်တွင်း ၃ တွင်းကို တရွာလုံး အားထား အသုံးပြုနေရပြီး ရေမသန့်တာကိုလည်း ကြုံတွေ့နေရတယ်လို့ ကျောသာကျေးရွာသား ကိုအောင်ဝင်းက ပြောပါတယ်။

မိုးရွာချိန်မှာ ရေလှောင် အသုံးပြုတာတွေ ရှိသလို နွေရာသီဆိုရင်တော့၊ ပတ်ဝန်းကျင်ရွာတွေကို လှည်းနဲ့ သွားပြီး ရေသွားခပ်ယူနေရတယ်လို့ ရွာသားတွေက ပြောပါတယ်။