မကွေးတိုင်း၊ ပခုက္ကူမြို့နယ်ထဲက ကျေးရွာတွေကို စစ်ကောင်စီတပ်က ဧပြီ ၂၃ ရက်နေ့၊ ညနေ ၄ နာရီခွဲဝန်းကျင်မှာ လေယာဥ်နဲ့ ဗုံးကြဲချခဲ့တာကြောင့် ဒေသခံပြည်သူ ၁ ဦးသေဆုံးကာ ပြည်သူတချို့လည်း ဒဏ်ရာရရှိခဲ့ကြပြီး ဘုန်းကြီးကျောင်း၊ စာသင်ကျောင်းနဲ့ လူနေအိမ်တွေလည်း ပျက်စီးကုန်တယ်လို့ ပခုက္ကူမြို့နယ် လူထုလှုပ်ရှားမှုကော်မတီဆီကနေ သိရပါတယ်။

ပခုက္ကူမြို့နယ် လူထုလှုပ်ရှားမှုကော်မတီရဲ့တာဝန်ခံ ကိုစိုးထွဋ်က “ပခုက္ကူမြို့နယ်ထဲက ရွာ ၄ ရွာကို တိုက်လေယာဥ် ၂ စီးနဲ့ ဗုံး ၃ လုံးထက်မနည်းကြဲပြီး တိုက်ခိုက်သွားတာ။ အမျိုးသမီး ၁ ယောက် သေသွားတယ်။ ၃၊ ၄ ယောက်လောက်လည်း ဒဏ်ရာရတယ်လို့တော့ သိထားတယ်။ ကျနော်နဲ့က ဝေးနေတော့ မြေပြင်အနေအခြေက အဲ့ဒိထက်ပိုနိုင်တယ်” လို့ ပြောပါတယ်။

စစ်ကောင်စီတပ်ဟာ ပခုက္ကူမြို့နယ်ထဲက ဖလံအို၊ ရွာသစ်၊ ဆယ်ပင်စုနဲ့ အောက်ကျင်းကျေးရွာ တွေ ဝန်းကျင်ကို ဗုံးကြဲတိုက်ခိုက်ခဲ့တာဖြစ်လို့ ဒေသခံပြည်သူတွေ သေဆုံးဒဏ်ရာရခဲ့ကြတဲ့အပြင် လူနေအိမ် ၅ လုံး၊ စာသင်ကျောင်းနဲ့ ဘုန်းကြီးကျောင်းဆောင်တွေလည်း ထိခိုက်ပျက်စီးကုန်တယ်လို့ ဆိုပါတယ်။

လေကြောင်းတိုက်ခိုက်ခံရသူတွေကို ကူညီပေးနေတဲ့ ပခုက္ကူအခြေစိုက်တော်လှန်ရေးတပ်ဖွဲ့တခုရဲ့ တာဝန်ခံက “အခု ဗုံးကြဲခံရတဲ့ရွာတွေက သင်္ကြန်ကာလကတည်း လေကြောင်းတိုက်ခိုက်တာ ခံနေရတာ ၃၊ ၄ ကြိမ်ရှိနေပြီ။ အခုတကြိမ်ကလည်း ဆယ်ပင်စုရွာက စစ်ဘေးရှောင်တွေ ယာယီနေကြတဲ့ ဘုန်းကြီးကျောင်းကို ပစ်မှတ်ထားပြီး တိုက်ခိုက်သွားတာတွေ့ရတယ်။ တိုက်ပွဲဖြစ်တာမရှိဘဲ အသားလွတ်တိုက်ခိုက်သွားတာလို့ ဆိုရမယ်။ အခုဆုံးသွားတဲ့သူက အသက် ၂၀ လောက်ပဲ ရှိသေးတဲ့ ဆယ်ပင်စုရွာကနေ အဲ့ဒီရွာ ဘုန်းကြီးကျောင်းမှာ စစ်ဘေးရှောင်နေကြတဲ့ မိသားစုတွေထဲက ကလေးမလေး ၁ ယောက်ပါ။ ကျန်တဲ့ ဒဏ်ရာရသူတွေက PDF ရဲဘော် ၁ ယောက်အပါအဝင် ၄ ယောက်ပါ။ သူတို့တွေထဲမှာလည်း ဗိုက်မှာ ဗုံးစထိတဲ့ ၂ ယောက်ကတော့ စိုးရိမ်ရတယ်။ ဆေးကုသပေးတာတွေတော့ အဆက်မပြတ် လုပ်ပေးနေကြတယ်” လို့ DVB ကို ပြောပါတယ်။

စစ်ကောင်စီတပ်ဟာ ပခုက္ကူမြို့နယ်ထဲက အဆိုပါကျေးရွာတွေကို ပြီးခဲ့တဲ့ သင်္ကြန်ကာလမှာ လေကြောင်းတိုက်ခိုက်ခဲ့တဲ့အတွက် ဒေသခံ ထောင်ချီပြီး စာသင်ကျောင်း၊ ဘုန်းကြီးကျောင်း စတဲ့နေရာတွေမှာ ယာယီစစ်ဘေးရှောင်နေကြရတယ်လို့ ဆိုပါတယ်။

စစ်ကောင်စီတပ်ဟာ ယာယီအပစ်အခတ်ရပ်စဲ​တယ်လို့ ကြေညာထားပေမဲ့ တိုက်ပွဲဖြစ်ပွားတာမရှိ တဲ့ ကျေးရွာတွေက ပြည်သူတွေနဲ့ စစ်ဘေးရှောင်တွေနေထိုင်နေကြတဲ့ ယာယီစစ်ဘေးရှောင်စခန်းတွေကို လေကြောင်းတိုက်ခိုက်နေတဲ့အတွက် ပြည်သူတွေ ဗုံးခိုကျင်းတွေ တူးထားကြဖို့နဲ့ တော်လှန်ရေးတပ်ဖွဲ့တွေရဲ့ လေကြောင်းရန်သတိပေးချက်တွေကို အမြဲတစေနားစွင့်ထားပေးကြဖို့ တိုက်တွန်းထားပါတယ်။

ဧပြီ ၂၃ ရက် ညနေပိုင်းမှာလည်း ပခုက္ကူအခြေစိုက် တပ်မ ၁၀၁ ထဲကနေ ကျေးရွာတွေကို လေကြောင်းတိုက်ခိုက်ဖို့ တက်လာတဲ့ စက်တပ်လေထီးတွေထဲက ၁ စီးကို တော်လှန်ရေးတပ်ဖွဲ့တွေဘက်ကပစ်ချကာ မီးရှို့ဖျက်ဆီးခဲ့ပါသေးတယ်။