ကချင်လွတ်လပ်ရေးအဖွဲ့ ( KIO) ဌာနချုပ်၊ လိုင်ဇာမြို့ရှိ ဂျေယန့်စစ်ရှောင်စခန်းက ကလေး ၃ ယောက်ကို ပြန်ပေးဆွဲသတ်ဖြတ်ခဲ့တဲ့ တရားခံကို တရားရုံးက သေဒဏ်ချမှတ်လိုက်ပါတယ်။
ကျူးလွန်သူ အုန်ဆောင်းဒွဲအောင်ကို ပုဒ်မ ၆ ခုနဲ့ တရားစွဲဆိုခဲ့တာဖြစ်ပြီး မတ် ၂၉ ရက်က သီးသန့်တရားရုံးမှာ ရုံးထုတ်ခဲ့ပြီးနောက် တရားရုံးက အမြင့်ဆုံးပြစ်ဒဏ်အဖြစ် သေဒဏ်ချမှတ်လိုက်တယ်လို့ KIO/KIA ပြန်ကြားရေးသတင်းမီဒီယာ ဧပြီ ၈ ရက် ဒီမနက်က ထုတ်ပြန်ပါတယ်။
ဒီအမှုနဲ့ ပတ်သက်လို့ မတ် ၄ ရက်မှာ သီးခြားတရားရုံးကို ဖွဲ့စည်းကာ မတ် ၁၇ ရက်ကနေ ၂၉ ရက်အထိ စစ်ဆေးကြားနာခဲ့ပြီးနောက် ရာဇသတ်ကြီးဥပဒေပါ ပုဒ်မ ၃၆၄ အရ ထောင်ဒဏ် ၁၀ နှစ်၊ ရာဇသတ်ကြီး ပုဒ်မ ၃၇၆ အရ အလုပ်ကြမ်းနဲ့ ထောင်ဒဏ် အနှစ် ၂၀၊ လူသတ်မှု ရာဇသတ်ကြီး ပုဒ်မ ၃၀၂-၁( B) မသေမချင်း သေဒဏ် အမိန့်ကို ချမှတ်လိုက်တာ ဖြစ်ပါတယ်။ သေဒဏ်အမိန့်ကို ချမှတ်ပြီးသွားပြီ ဖြစ်တဲ့အတွက် ကျန်ပုဒ်မတွေဟာ ပယ်ပျက်ပြီးသားဖြစ်တယ်လို့လည်း KIO/KIA သတင်းဌာနက ဖော်ပြပါတယ်။
အသက် ၂၅ နှစ်အရွယ် တရားခံ အုန်ဆောင်းဒွဲအောင်ဟာ ဖေဖော်ဝါရီ ၂၂ ရက် ညနေ ၃ နာရီဝန်းကျင်က ကလေးငယ် ၃ ယောက်ကို ဖမ်းဆီးခေါ်ဆောင်သွားပြီးနောက် ကလေးငယ် မိဘတွေကို တရုတ်ငွေ ၃ သိန်းနဲ့ ပြန်လာရွေးယူဖို့ ပြောဆိုခဲ့တာပါ။
ဖေဖော်ဝါရီ ၂၅ ရက် မနက်ပိုင်းမှာ KIA တာဝန်ရှိသူတွေက အုန်ဆောင်းဒွဲအောင်ကို ဖမ်းဆီးရမိခဲ့ပြီး ကလေးငယ်တွေ ရုပ်အလောင်းရှိရာနေရာတွေကို ပြောပြခဲ့တယ်လို့ သိရပါတယ်။
ပြန်ပေးဆွဲသတ်ဖြတ်ခံရတဲ့ မိန်းကလေးငယ် ၃ ယောက်ကတော့ အသက် ၁၀ နှစ်အရွယ် ၂ ယောက်နဲ့ အသက် ၁၁ နှစ်အရွယ် တယောက် ဖြစ်ပါတယ်။
ကလေးတွေ ပျောက်ဆုံးပြီးနောက် ၅ ရက်လောက်အကြာမှာ ၂ ယောက်ကို ရေနစ် သေဆုံးနေတဲ့ ရုပ်အလောင်းအဖြစ် ပြန်လည်တွေ့ရှိခဲ့ပြီး ကျန်တယောက်ကို လိုင်ဇာမြို့နဲ့ ၁၅ မိုင်ခန့်အကွာရှိ အလောဘွမ်အနီးမှာ ဆွဲကြိုးချသတ်ဖြတ်ထားတဲ့ ရုပ်အလောင်းအဖြစ် ပြန်လည်တွေ့ရှိခဲ့တာ ဖြစ်ပါတယ်။
တရားခံ အုန်ဆောင်းဒွဲအောင်ဟာ ၂၀၂၂ ခုနှစ်မှာလည်း လက်နက်ခဲယမ်း တရားမဝင်ရောင်းချမှုနဲ့ KIA က ထောင်ဒဏ် ၃ နှစ်ချမှတ်ခဲ့ပြီးနောက် ပြန်လည်လွတ်မြောက်လာပြီး ၁၀ ရက်ကျော်အကြာမှာ ဒီအမှုကို ပြန်လည်ကျူးလွန်ခဲ့တာ ဖြစ်ပါတယ်။
