
မတ် ၂၈ ရက်နေ့၊ နေ့လယ်ပိုင်းမှာလှုပ်ခတ်ခဲ့တဲ့ ငလျင်ဒဏ်ကိုအကြီးအကျယ်ခံစားခဲ့ရတဲ့ မန္တလေး၊ စစ်ကိုင်းနဲ့ ပလိပ်မြို့တို့မှာ ဧပြီ ၅ ရက်နေ့ ည ၉ နာရီဝန်းကျင်က မိုးသည်းသည်းထန်ထန် ရွာသွန်းပြီး လေပြင်းတိုက်ခတ်ခဲ့တာကြောင့် ငလျင်ဒဏ်သင့်ပြည်သူတွေနဲ့ ရှာဖွေကယ်ဆယ်ရေး လုပ်နေသူတွေ အခက်အခဲကြုံနေကြရပါတယ်။
မန္တလေးမြို့အခြေစိုက် လူမှုကူညီရေးအသင်းရဲ့အတွင်းရေးမှူးတယောက် “ညနေက မိုးအရမ်းသည်းတယ်။ လေကလည်းကြမ်းလိုက်တာလွန်တယ်။ လမ်းတွေပေါ်နဲ့ ကွင်းပြင်တွေမှာ ထွက်နေရသူတွေ တပူပေါ်နှစ်ပူဆင့်ဒုက္ခရောက်နေကြတယ်။ လူတွေတင်မကဘဲ ပစ္စည်းပစ္စယတွေရောဆိုတော့ ပိုဆိုးတာပေါ့ဗျာ။ လေကကြမ်းလို့ ယာယီမိုးကာတဲတွေလည်း အမိုးတွေလန်ပြီး ပျက်စီးကုန်တာပေါ့။ ဘဝတွေများ ဆိုးလွန်းလိုက်တာဗျာ” လို့ ပြောပါတယ်။
မန္တလေးမြို့က ငလျင်ဒဏ်သင့်ပြည်သူတယောက်က “ကျနော်တို့ တိုက်ကလေးက ပြိုတဲ့အထဲမှာမပါပေမဲ့ ဖြိုပစ်ရလောက်လို့ ဒီမန္တလေးမှာရှိတဲ့ မိတ်ဆွေတစ်ယောက်ရဲ့အိမ်မှာ မိသားစုလိုက်ရွှေ့နေရတယ်။ လမ်းတွေပေါ်၊ ကွင်းပြင်တွေ၊ ကျုံးဘေးတွေမှာ ယာယီတဲတွေ ထိုးနေကြတဲ့သူတွေက ကျနော်တို့ထက်ပိုပြီး ဒုက္ခရောက်နေကြတယ်။ စစ်တပ်ဘက်က အကူအညီရသလားဆိုတော့ သိပ်မပေးဘူးလို့ပဲ မြင်တယ်။ ပြည်သူအပေါ်မှာ စေတနာရှိလို့ လုပ်ပေးရတာမဟုတ်ဘဲ မဖြစ်သာလို့လုပ်ပေးရတဲ့ သဘောပေါ့ဗျာ။ အခုအချိန်မှာ ကျနော်တို့ရဲ့ပြည်သူ့အစိုးရက ဝန်ကြီးချုပ်ကြီး ဒေါက်တာဇော်မြင့်မောင်သာရှိရင် အရမ်းကောင်းမှာပေါ့။ ပြည်သူတွေ အခုလောက်ဒုက္ခရောက်မှာ မဟုတ်ဘူးလို့မြင်တယ်။ အဲ့ဒီအမြင်ကလေ ကျနော်တင်မကဘူး မန္တလေးပြည်သူအားလုံးမှာရှိတယ်။ ခင်ဗျားမယုံရင် လိုက်မေးကြည့်ကြည့်ဗျ” လို့ DVB ကို ပြောပါတယ်။
ငလျင်ဒဏ်ကို အပြင်းအထန်ခံစားခဲ့ရတဲ့ စစ်ကိုင်းမြို့မှာလည်း မိုးကြီးလေထန်ခဲ့တာကြောင့် ပြည်သူတွေအခက်အခဲတွေဖြစ်နေပြီး အရေးပေါ်အကူအညီတွေ လိုအပ်နေတယ်လို့ ငလျင်ဒဏ်ကြောင့် ကျောင်းပြိုကျခဲ့တဲ့ စစ်ကိုင်းမြို့က ဆရာတော်တပါးက မိန့်ပါတယ်။
ငလျင်ဒဏ်သင့် ပလိပ်မြို့မှာလည်း မိုးရွာ မိုးခြိမ်းပြီး လေပြင်းတိုက်ခတ်ခဲ့တယ်လို့ သိရပါတယ်။
ငလျင်ကြောင့် ဧပြီ ၅ ရက် ညနေ ၅ နာရီအထိ DVB Data Team က ကောက်ယူ စုဆောင်းထားတဲ့ စာရင်းတွေအရ စုစုပေါင်း သေဆုံးသူအယောက် ၄,၂၁၀၊ ထိခိုက်ဒဏ်ရာရရှိသူ ၆,၅၀၅ နဲ့ ပျောက်ဆုံးနေသူ ၄၄၈ ယောက်၊ ကယ်ဆယ်ရရှိသူ ၄၉၈ ယောက် ရှိကြောင်း သိရပါတယ်။
ဓာတ်ပုံ- BoBoWin