
မြန်မာငလျင်ဘေးအတွက် ကမ္ဘာ့ဘောလုံးအဖွဲချုပ် (ဖီဖာ) အပါအဝင် နိုင်ငံတကာ ဘောလုံးအဖွဲ့ချုပ်တွေက မြန်မာနိုင်ငံဘောလုံးအဖွဲ့ချုပ်ထံ ဝမ်းနည်းကြောင်း စာပေးပို့ခဲ့ပါတယ်။
မတ် ၂၈ ရက်က စစ်ကိုင်းနဲ့ မန္တလေးမြို့တွေကို ဗဟိုပြုပြီး အင်အား ရစ်ချ်တာစကေး ၇ ဒသမ ၇ ရှိ ငလျင်ကြီး လှုပ်ခတ်ခဲ့ပြီး အသက်အိုးအိမ် ဆုံးရှုံးခဲ့ရတဲ့ မြန်မာပြည်သူတွေအတွက် ဝမ်းနည်းကြောင်း စာပေးပို့ခဲ့ကြတာပါ။
မြန်မာနိုင်ငံဘောလုံးအဖွဲ့ချုပ်က လက်ခံရရှိတဲ့ ဝမ်းနည်းကြောင်းစာတွေထဲမှာ ဖီဖာဥက္ကဋ္ဌ အင်ဖန်တီနို၊ အာရှဘောလုံးအဖွဲ့ချုပ် ဥက္ကဋ္ဌ ရှိတ်ဆာလ်မန်ဘင်အီဗရာဟင်တို့ရဲ့ ဝမ်းနည်းကြောင်း သဝဏ်လွှာတွေလည်း ပါဝင်ပါတယ်။
ဒါ့အပြင် ထိုင်း၊ အင်နီးရှား၊ ဗီယက်နမ်၊ ဘင်္ဂလားဒေ့ရှ်၊ နီပေါ၊ မြောက်မာရီယားနားနိုင်ငံ ဘောလုံးအဖွဲ့ချုပ်တွေကလည်း ငလျင်ဘေးသင့် ပြည်သူတွေနဲ့အတူ ထိခိုက်ခံစားရကြောင်း စာပေးပို့ခဲ့ကြတယ်လို့ မြန်မာနိုင်ငံဘောလုံးအဖွဲ့ချုပ်က ထုတ်ပြန်ပါတယ်။
ငလျင်ဘေးကြောင့် မန္တလေးမှာရှိတဲ့ မြန်မာဘောလုံးအကယ်ဒမီ အဆောက်အအုံလည်း ထိခိုက်မှုရှိခဲ့တဲ့အတွက် ဥက္ကဋ္ဌ ဦးဇော်ဇော်နဲ့ တာဝန်ရှိသူတွေက သွားရောက်စစ်ဆေးပြီး ငလျင်ဘေးသင့် ဝန်ထမ်းတွေကို ကူညီပံ့ပိုးခဲ့ပါတယ်။
ငလျင်ဘေးကြောင့် ပြည်တွင်းရှိ မြန်မာနေရှယ်နယ်လိဂ်အပါအဝင် ဘောလုံးပြိုင်ပွဲတွေနဲ့ တခြား ဘောလုံးလှုပ်ရှားမှုတွေကိုလည်း ရပ်နားထားကြောင်း မြန်မာနိုင်ငံဘောလုံးအဖွဲ့ချုပ်က ထုတ်ပြန်ထားပါတယ်။