ဂါဇာကမ်းမြောင်ဒေသ ဂျဘာလိယာမြို့ရှိ စစ်ဘေးရှောင်တွေ နေထိုင်တဲ့ ကုလသမဂ္ဂ ဆေးခန်းတခုကို ဧပြီ ၂ ရက်က အစ္စရေးတို့ရဲ့ တိုက်ခိုက်မှုအတွင်း ကလေးငယ်တွေ အပါအဝင် လူ ၁၉ ယောက် သေဆုံးခဲ့ကြောင်း ဂါဇာ ကျန်းမာရေးဝန်ကြီးဌာနက ပြောကြားခဲ့ပါတယ်။

အစ္စရေးစစ်တပ်ကတော့ ဟားမတ်စ်အဖွဲ့က တိုက်ခိုက်မှုတွေလုပ်ဖို့ အစီအစဉ်ဆွဲခဲ့တဲ့ ကွပ်ကဲရေးနဲ့ ထိန်းချုပ်ရေးစင်တာအဖြစ် အသုံးပြုခဲ့တဲ့ အရင်က ဆေးခန်းအဆောက်အအုံကို တိုက်ခိုက်ခဲ့တာ ဖြစ်ကြောင်း ပြောကြားခဲ့ပြီး အရပ်သားတွေကို အန္တရာယ်လျော့ပါးစေဖို့ စစ်တပ်က ထောက်လှမ်းရေး လုပ်ဆောင်ခဲ့ရတယ်လို့ ဆိုပါတယ်။

ဟားမတ်စ်ကတော့ အဲဒီအဆောက်အအုံကို အသုံးပြုခဲ့တယ် ဆိုတာကို ငြင်းဆိုခဲ့ပြီး အစ္စရေးရဲ့ စွပ်စွဲချက်က သူတို့အဖွဲ့ကို ပြောင်ပြောင်တင်းတင်း ဖန်တီးလုပ်ကြံမှုလို့ ခေါ်ဆိုခဲ့ပါတယ်။

အစ္စရေးဟာ ဗုဒ္ဓဟူးနေ့က ဂါဇာကမ်းမြောင်ဒေသမှာ စစ်ဆင်ရေးတွေ အကြီးအကျယ် တိုးချဲ့လုပ်ဆောင်မယ်လို့ ကြေညာခဲ့ပြီး နယ်မြေအများအပြားကို သိမ်းပြီးတော့ ဒေသခံတွေရဲ့ အကြီးစား ရွှေ့ပြောင်းမှုနဲ့အတူ သူ့ရဲ့ လုံခြုံရေးဇုန်တွေအတွင်းကို ပေါင်းထည့်မယ်လို့ ဆိုပါတယ်။

ကြေညာချက်ထဲမှာ ကာကွယ်ရေးဝန်ကြီး အစ္စရေးလ် ကတ်ဇ်က တိုက်ပွဲဖြစ်နေတဲ့ နယ်မြေဒေသတွေကနေ ရွှေ့ပြောင်းမှုတွေ လုပ်ရမှာဖြစ်ပြီး စစ်ပွဲအဆုံးသတ်ဖို့ တခုတည်းသော နည်းလမ်းဟာ ဟားမတ်စ်တွေကို ချေမှုန်းဖို့နဲ့ အစ္စရေးဓားစာခံတွေကို ပြန်ပို့ပေးရေးဖြစ်ကြောင်း ဂါဇာဒေသခံတွေကို တိုက်တွန်းထားပါတယ်။

ဂါဇာကမ်းမြောင်ဒေသမှာ ဗုဒ္ဓဟူးနေ့က အစ္စရေးရဲ့ တိုက်ခိုက်မှုအတွင်း လူ ၄၁ ယောက် သေဆုံးခဲ့တယ်လို့ ဂါဇာကျန်းမာရေးဝန်ကြီးဌာနက ပြောထားပါတယ်။

Source : Reuters