ထိုင်း-မြန်မာနယ်စပ်၊ တာ့ခ်ခရိုင်၊ ထာ့ဆောင်ယန်းမြို့နယ်ထဲမှာ မေလ ၄ ရက်က တရားမဝင် ဝင်ရောက်လာတဲ့ မြန်မာအမျိုးသား ၁၁ ယောက်ကို လမ်းပြ/ယာဉ်မောင်း ထိုင်းအမျိုးသား ၂ ယောက်နဲ့အတူ ဖမ်းဆီးရမိတယ်လို့ ထိုင်းသတင်းတွေမှာ ဖော်ပြပါတယ်။
နယ်မြေထဲမှာ တရားဥပဒေစိုးမိုးရေး၊ ဥပဒေချိုးဖောက်မှုပပျောက်ရေးအတွက် ထိုင်းစစ်တပ် အမှတ် ၃၅ ခြေလျင်တပ်ရင်းလက်အောက်ခံ ၃၅၀၄ နဲ့ ၃၅၀၆ စစ်ကြောင်းကတပ်ဖွဲ့ဝင်တွေဟာ ထာ့ဆောင် ယန်းမြို့နယ် ရဲတပ်ဖွဲ့ဝင်တွေနဲ့ပူးပေါင်းပြီး မဲ့ဆောင်ရွာနဲ့ မယ်လကျေးရွာအနီးမှာ စစ်ဆေးရေးဂိတ်ချ စောင့်ကြပ်နေခဲ့တယ်။
အဲဒီအချိန်မှာ ဟိုင်းလပ်စ်ကားတစင်းက စစ်ဆေးရေးဂိတ်ရှေ့ ဖြတ်မောင်းလာပါတယ်။ တာဝန်ရှိသူတွေက တားဆီးစစ်ဆေးရာမှာ နောက်ခန်းက အမျိုးသား ၆ ယောက် လိုက်ပါလာပြီး မှတ်ပုံတင် အထောက်အထား တစုံတရာ မပြနိုင်ဘူး၊ ယာဉ်မောင်းထိုင်းအမျိုးသားကတော့ သူတို့ဟာ မြန်မာနိုင်ငံသားတွေဖြစ်ပြီး ထိုင်းနိုင်ငံအတွင်းပိုင်းမှာ အလုပ်သွားလုပ်ဖို့ ခေါ်ဆောင်ခဲ့တာဖြစ်ကြောင်း ဝန်ခံသွားပါတယ်။
စစ်ဆေးရေးဂိတ် နောက်တနေရာမှာတော့ သံသယရှိတဲ့ ဆိုင်ကယ် ၃ စီးနဲ့ လူ ၆ ယောက်ကို တားဆီးစစ်ဆေးခဲ့တယ်။ ဆိုင်ကယ်တစီးကို လူ ၂ ယောက်စီ စီးလာတာဖြစ်တယ်။ အထောက်အထားတွေ စစ်ဆေးရာမှာ အမျိုးသား တယောက်သာလျှင် ထိုင်းမှတ်ပုံတင်ရှိတယ်။ အဆိုပါ ထိုင်းကလည်း မြန်မာလုပ်သားတွေကို အတွင်းပိုင်းဘက် ဆက်ပို့ပေးဖို့ လမ်းပြခေါ်ဆောင်ခဲ့ကြောင်း ဝန်ခံပါတယ်။
တာဝန်ရှိသူတွေက ဟိုင်းလပ်စ် ၁ စီး၊ ဆိုင်ကယ် ၃ စီးနဲ့ မြန်မာ ၁၁ ယောက် ထိုင်း ၂ ယောက် ပေါင်း ၁၃ ယောက်တို့ကို ဖမ်းဆီးထိန်းသိမ်းထားပြီး တဖွဲ့တည်း ဟုတ်၊ မဟုတ် ဆက်လက် စစ်ဆေးနေတယ်လို့ Banmuang ထိုင်းသတင်းမှာ ဖော်ပြပါတယ်။
ဒီမတိုင်ခင် မေ ၂ ရက်ကလည်း ထိုင်းအလယ်ပိုင်း အယုဒ္ဓယမြို့၊ ဘန့်ကောဝ်အုပ်စုရှိ အဝေးပြေးလမ်းမပေါ်မှာ တရားမဝင် မြန်မာ ၉ ယောက် ဖမ်းဆီးခံခဲ့ရပါသေးတယ်။
ယာဉ်မောင်း အသက် ၃၃ နှစ်ရွယ်ရှိ ဦးတင်အောင်ဟာ သူငယ်ချင်းအဆက်အသွယ်နဲ့ အဲဒီလူတွေကို ဘန်ကောက်ကို ပို့ပေးဖို့ ဆင်းပူးရီးနဲ့ နခွမ်းဆဝမ်ကနေ တယောက်ကို ဘတ် ၂,၀၀၀ နှုန်းနဲ့ တင်ဆောင်လာတာလို့ ဝန်ခံပါတယ်။
ကားပေါ်ပါသူတွေကတော့ သူတို့ဟာ မဲဆောက်ဘက်ကလာပြီး ဘန်ကောက်သွားဖို့ ပွဲစားကို တယောက်လျှင် ဘတ် ၈,၀၀၀ ပေးခဲ့ရကြောင်း ထွက်ဆိုထားပါတယ်။
Source: Banmuang / Khao Ayutthaya
