ဧပြီလရဲ့ပထမ ၁၀ ရက်အတွင်း တိုင်းနဲ့ ပြည်နယ် တော်တော်များများမှာ မိုးထစ်ချုန်းရွာနိုင်ပြီး အင်အားပြင်းငလျင်ကြီးရဲ့ နောက်ဆက်တွဲအဖြစ် ဧပြီ ၁ ရက် ဒီနေ့မှာ ငလျင် ၅ ကြိမ် လှုပ်ခတ်ခဲ့တယ်လို့  မိုးဇလဌာနက ဧပြီ ၁ ရက် ဒီနေ့ ထုတ်ပြန်ပါတယ်။

နွေကာလမှာ နေ့အပူချိန်များလာလို့ အပူပျံတက်တိမ်တွေကြောင့် မွန်းလွဲနဲ့ ညနေတို့မှာ မိုးတိမ်တောင်တွေဖြစ်နိုင်ပြီး ရွေ့လျားရာလမ်းတလျှောက်မှာ လေပြင်းတိုက်တာ၊ မိုးရွာတာ၊ မိုးကြိုးပစ်တာ၊ မိုးသီးကြွေတာ စတာတွေ ဖြစ်တတ်တယ်လို့ ဆိုပါတယ်။

တကယ်လို့ လေပြင်းတိုက်မယ်ဆိုရင်တော့ ၁ နာရီကို မိုင် ၅၀ အထိပြင်းထန်နိုင်တယ်လို့လည်း ခန့်မှန်းထားပါတယ်။

အခု ဧပြီပထမပတ်အတွင်း ရန်ကုန်၊ ဧရာဝတီနဲ့ တနင်္သာရီတိုင်း၊ ကချင်၊ ကယား၊ ကရင်၊ မွန်နဲ့ ရှမ်းပြည်နယ် မြောက်ပိုင်းနဲ့ အရှေ့ပိုင်းတို့မှာ ၄ ရက်ကနေ ၈ ရက်လောက်အထိ မိုးထစ်ချုန်းရွာနိုင်ပြီး နေပြည်တော်၊ မန္တလေး၊ ပဲခူး၊ မကွေးနဲ့ စစ်ကိုင်းတိုင်း၊ ချင်း၊ ရခိုင်နဲ့ ရှမ်းပြည်နယ်တောင်ပိုင်းတို့မှာတော့ ၁ ရက်ကနေ ၃ ရက်အထိ မိုးထစ်ချုန်းရွာနိုင်တယ်လို့ ဆိုပါတယ်။

နေပြည်တော်၊ မန္တလေး၊ ပဲခူး၊ မကွေးနဲ့ စစ်ကိုင်းတိုင်း၊ ကယားနဲ့ ချင်းပြည်နယ်တို့မှာတော့ ဧပြီလရဲ့ ပျမ်းမျှအပူချိန်ထက် ၁ ဒသမ ၅ ဆဲလ်စီးယပ်အထက်ပိုလာနိုင်တယ်လို့လည်း ခန့်မှန်းထားပါတယ်။

ပြီးတော့ ကျောက်ဆည်မြို့နယ်မှာ မတ် ၃၁ ရက်က အပူချိန် ၄၂ ဒီဂရီနဲ့ လွန်ခဲ့တဲ့ ၅၂ နှစ်က ၄၁ ဒသမ ၅ ဒီဂရီကို ကျော်လွန်စံချိန်သစ်တင်ပါတယ်။

နေပြည်တော်မှာလည်း မတ် ၃၁ ရက်က အပူချိန် ၃၉ ဒသမ ၅ ဒီဂရီဆဲလ်စီးယပ်နဲ့ လွန်ခဲ့တဲ့ ၁၂ နှစ်က ၃၉ ဒသမ ၃ ဒီဂရီကို ကျော်လွန်စံချိန်သစ်တင်လိုက်ပါတယ်။

ငလျင်လှုပ်ခတ်မှုတွေလည်းဆက်ရှိနေပြီး ဒီမနက်အစောပိုင်း ၁၂ နာရီ ၅၃ မိနစ်က မန္တလေးတိုင်း စဉ့်ကိုင်မြို့နားမှာ အင်အားရစ်ချ်တာစကေး ၃ ဒသမ ၄ အဆင့်ငလျင်တကြိမ်၊ မနက် ၁ နာရီ ၄၁ မိနစ်ကလည်း စဉ့်ကိုင်မြို့နားမှာ အင်အားရစ်ချ်တာစကေး ၄ ဒသမ ၄ ရှိတဲ့ ငလျင်တကြိမ်၊ မနက် ၄ နာရီ ၁၅ မိနစ်က နေပြည်တော် တပ်ကုန်းမြို့နားမှာ အင်အားရစ်ချ်တာစကေး ၃ ဒသမ ၆၊ မနက် ၄ နာရီ ၂၆ မိနစ်က ပြင်ဦးလွင်မြို့နားမှာ အင်အားရစ်ချ်တာစကေး ၄၊ မွန်းလွဲ ၁ နာရီ ၁၂ မိနစ်က  နေပြည်တော် ပုဗ္ဗသီရိအနီး အင်အားရစ်ချ်တာစကေး ၄ ဒသမ ၉ နဲ့ အသီးသီးလှုပ်ခတ်ပါတယ်။

အခုရက်ပိုင်း လှုပ်ခတ်ခဲ့သမျှငလျင်တွေအများစုဟာ အနက် ၁၀ ကီလိုမီတာကနေ လှုပ်ခတ်ခဲ့ပေမဲ့ ဒီနေ့မှာတော့ ၆ ကီလိုမီတာမှာတကြိမ်နဲ့ ၄ ကီလိုမီတာအနက်မှာတကြိမ် လှုပ်ခတ်ခဲ့တာကို တွေ့ရပါတယ်။

မိုးလေဝသဌာနက ၅ ကြိမ်လှုပ်တယ်လို့ပဲ ဖော်ပြပေမဲ့ ဒီမနက် ၁၁ နာရီ ၁၆ မိနစ်က မိတ္ထီလာမြို့မှာ ခပ်ကြမ်းကြမ်းတကြိမ်လှုပ်ခတ်ခဲ့တယ်လို့ ဒေသခံတွေဆီက သိရပါတယ်။

မတ် ၂၈ ရက်မှာစတင်လှုပ်ခတ်တဲ့ အင်အားပြင်းငလျင်အပါအဝင် နောက်ဆက်တွဲငလျင်အ ကြိမ်ပေါင်း ၅၂ ကြိမ်ရှိပြီလို့လည်း မိုးလေဝသဌာနက ဖော်ပြထားပါတယ်။