မတ် ၂၈ ရက်က အင်အားပြင်းငလျင် လှုပ်ခတ်မှုအပြီး ဧရာဝတီတိုင်းက မြို့နယ်တွေမှာ လျှပ်စစ်မီးပြတ်တောက်ခဲ့ပြီး ဒီနေ့အထိ မီးမရဖြစ်နေတယ်လို့ ဧရာဝတီတိုင်း ဒေသခံတွေဆီကနေ သိရပါတယ်။
အင်အားပြင်းငလျင် လှုပ်ခတ်ခဲ့ပြီးနောက် ဧရာဝတီတိုင်းထဲက ပုသိမ်၊ ဟင်္သာတ၊ မအူပင်၊ မြောင်းမြ စတဲ့မြို့ကြီးတွေ အပါအဝင် မြို့နယ်များစုမှာ ဧပြီ ၁ ရက်အထိ လျှပ်စစ်မီးမရဘဲ ဖြစ်နေတာလို့ ဆိုပါတယ်။
ပုသိမ်မြို့ခံတယောက်က “မီးမရတော့ ဒုက္ခပတ်နေတယ်၊ မီးစက်ငှားပြီး ရေတင်နေရတယ်။ ၁ နာရီကို ၁၂,၀၀၀ လောက်ကနေ အခု ၁ နာရီကို ၂၇,၀၀၀ နဲ့ ငှားတင်နေရတယ်” လို့ ပြောပါတယ်။
လက်ရှိ ဧရာဝတီတိုင်းမှာ လျှပ်စစ်မီးမရသေးတဲ့အတွက် သောက်သုံးရေရရှိဖို့ မီးစက်ငှား ရေတင်ကြရတာတွေ ရှိသလို မီးစက်ငှားရမ်းခ ဈေးနှုန်းတွေ မြင့်တက်လာပြီး မီးစက်ငှားရမ်းဖို့ပါ ခက်ခဲသွားတယ်လို့ ဆိုပါတယ်။
မအူပင်ဒေသခံတယောက်က “မီးမလာတော့ ဖုန်းတလုံး ၁,၅၀၀၊ ၂,၀၀၀ နဲ့ အားသွင်း သုံးနေရတယ်။ သောက်ရေ၊ သုံးရေအတွက်က အဓိက ခက်ခဲနေတာ။ မီးပြန်ရဖို့ လုပ်နေတယ်လို့တော့ ပြောတာပဲ။ ပုံမှန်အခြေအနေမှာတောင် မီးကမမှန်တာလေ။ တချို့ စားသောက်ဆိုင်တွေတော့ ပိတ်ကုန်ပြီ” လို့ ပြောပါတယ်။
ဧရာဝတီတိုင်းမှာ လျှပ်စစ်မီး ပြန်မရသေးတဲ့အတွက် လျှပ်စစ်မီးကို အသုံးပြု လုပ်ငန်းလုပ်ကိုင်နေသူတွေအနေနဲ့ ကိုယ်ပိုင်မီးစက်တွေနဲ့ အသုံးပြုနေရပြီး စက်သုံးဆီဈေးနဲ့ တွက်ခြေမကိုက်တာကြောင့် တချို့လုပ်ငန်းတွေ ရပ်နားရတဲ့အထိ ဖြစ်လာတယ်လို့ ဆိုပါတယ်။
ဒါ့အပြင် ဧရာဝတီတိုင်းမှာ လျှပ်စစ်မီးပြန်မရဖြစ်နေတဲ့အတွက် လျှပ်စစ်မီးကို အသုံးပြု လုပ်ကိုင်နေတဲ့ စားသောက်ဆိုင်လုပ်ငန်းနဲ့ ဟိုတယ်လုပ်ငန်းတွေ အပါအဝင် တခြား ဆက်စပ်လုပ်ငန်းတွေ အဓိက ယာယီရပ်ရတဲ့အထိ အခက်အခဲဖြစ်နေတာလို့ ဆိုပါတယ်။
