စပါးအသင်းအပေါ် ပရိသတ်တွေရဲ့ ဝေဖန်မှုအပေါ် အသင်းဥက္ကဋ္ဌ လီဗိုင်းက ပြန်လည်တုံ့ပြန်သွားပါတယ်။

မြောက်လန်ဒန်ကလပ်ဟာ အခုနှစ်ဘောလုံးရာသီမှာ စွမ်းဆောင်ရည်ကျဆင်းနေပြီး ပရီးမီးယားလိဂ်ပွဲစဉ် ၂၉ အပြီးမှာ အဆင့် ၁၄ နေရာ ရောက်ရှိနေတာပါ။

အသင်းရဲ့ရလဒ် မကောင်းမှုတွေအပေါ် အသင်းပိုင်ရှင်ရဲ့ အပြောင်းအရွှေ့မှာ ရင်းနှီးမြှုပ်နှံမှု အားနည်းကြောင်း ပရိသတ်တွေက ဝေဖန်ခဲ့ကြတာပါ။

စပါးအသင်းဥက္ကဋ္ဌ လီဗိုင်းကတော့ ကွင်းသစ်ပြီးစီးခဲ့တဲ့ ၂၀၁၉ ခုနှစ်ကနေ ၂၀၂၄ ခုနှစ်အတွင်းမှာ ကစားသမား အပြောင်းအရွှေ့တွေအတွက် ပေါင်သန်း ၇၀၀ အထိ အသုံးပြုခဲ့ကြောင်း၊ စပါးအသင်းဟာ ကမ္ဘာ့အချမ်းသာဆုံးကလပ်အဆင့်မှာ အဆင့် ၉ နေရာမှာ ရှိကြောင်းနဲ့  လက်ရှိစည်းမျဉ်းတွေအရ ရေရှည်ရပ်တည်နိုင်ဖို့အတွက်လည်း ချင့်ချိန် လုပ်ဆောင်နေရကြောင်း အသင်းဥက္ကဋ္ဌ လီဗိုင်းက ပြောသွားပါတယ်။

ယူရိုပါလိဂ်မှာ ကွာတားဖိုင်နယ်ရောက်ရှိနေပြီး ချန်ပီယံဖြစ်အောင် စွမ်းဆောင်နိုင်မယ်ဆိုရင် လာမယ့်ရာသီအတွက် ဘဏ္ဍာရေးအင်အား တောင့်တင်းအောင် ကူညီပေးနိုင်ကြောင်း လီဗိုင်းက ပြောသွားပါတယ်။