မြန်မာနိုင်ငံတဝန်း ငလျင်ဒဏ်ကြောင့် ထိခိုက်ပျက်စီးဆုံးရှုံးတွေ များနေချိန် စစ်ကောင်စီက အရပ်သားပြည်သူတွေကို ပစ်မှတ်ထားပြီး ရခိုင်ပြည်၊ မြောက်ဦးမြို့မှာ မတ် ၃၁ ရက် ညအချိန်က ဗုံးကြဲတိုက်ခိုက်ခဲ့တာကြောင့် အရပ်သားတယောက်သေဆုံးပြီး ၇ ယောက် ထိခိုက်ဒဏ်ရာရရှိခဲ့တယ်လို့ မြေပြင်သတင်းရင်းမြစ်က ပြောပါတယ်။
မတ် ၃၁ ရက်နေ့ ည ၈ နာရီကျော်အချိန်မှာ စစ်ကောင်စီက ဂျက်ဖိုက်တာတစီးနဲ့ Cluster ဗုံး (ပဒေသာဗုံး) ကြဲချခဲ့ပြီး မြောက်ဦးမြို့၊ အလယ်ဈေးရပ်ကွက်အပါအဝင် နေရာ ၄ ခုမှာ ကျရောက်ပေါက်ကွဲခဲ့တယ်လို့ သိရပါတယ်။
အခုလို ဗုံးကျရောက်ပေါက်ကွဲခဲ့တာကြောင့် အလယ်ဈေးရပ်ကွက်က အသက် ၆၆ နှစ်အရွယ် ဦးအောင်ကျော်ဇံဟာ နေရာမှာတင် သေဆုံးသွားခဲ့ပြီး အရပ်သားပြည်သူ ၇ ယောက်လောက် ထိခိုက်ဒဏ်ရာရရှိသွားတယ်လို့ မြေပြင်သတင်းရင်းမြစ်က ပြောပါတယ်။
“တယောက်သေပါတယ်၊ အရပ်သားပါ၊ အလယ်ဈေးရပ်ကွက်က အောင်ကျော်ဇံဆိုသူပါ။ နေအိမ်ရှေ့လမ်းလျှောက်နေတာက ခေါင်းကိုထိပြီးဆုံးသွားတာပါ။ ကျန်တဲ့လူတွေကတော့ ဒဏ်ရာရပါတယ်၊ ၇ ယောက်လောက်ရတယ်လို့ ကြားပါတယ်။ လောလောဆယ်မှာ ဒဏ်ရာရရှိသူတွေကတော့ ဆေးကုသမှုခံယူနေဆဲပါ၊ အသေးစိတ်ကိုတော့ ကျနော်စုံစမ်းနေဆဲပါ” လို့ ပြောပါတယ်။
ငလျင်ဘေးဒဏ်ကြောင့် ပြည်သူတွေ ထိခိုက်သေဆုံးမှုတွေ ဆက်တိုက်တိုးလာနေတဲ့အချိန်မှာလည်း စစ်ကောင်စီကတော့ အရပ်သားပြည်သူတွေကို ပစ်မှတ်ထားပြီး ဗုံးကြဲချတာတွေ ဆက်တိုက်ပြုလုပ်နေဆဲပါ။
မတ် ၂၈ ရက် မွန်းလွဲပိုင်းမှာ စစ်ကိုင်းမြို့အနီးကို ဗဟိုပြုပြီး အင်အား ရစ်ချ်တာစကေး ၇ ဒသမ ၇ ရှိ အင်အားပြင်းငလျင် လှုပ်ခတ်ခဲ့တာကြောင့် မန္တလေးတိုင်း ၊ စစ်ကိုင်းတိုင်း ၊ ရှမ်းပြည်နယ် တောင်ပိုင်း၊ မကွေးတိုင်း နဲ့ ပဲခူးတိုင်းအတွင်းရှိ မြို့ရွာတွေမှာ လူ့အသက်ပေါင်းစွာသေဆုံးတာ၊ ထိခိုက်တာ၊ ပျောက်ဆုံးနေတာတွေအပြင် လမ်းတံတားတွေနဲ့ လူနေအိမ်ပေါင်း မြောက်မြားစွာလည်း ပျက်စီးဆုံးရှုံးခဲ့ရပါတယ်။
ကေခိုင်
