မြန်မာနဲ့ ထိုင်းနိုင်ငံမှာ လှုပ်ခတ်ခဲ့တဲ့ ငလျင်ကြောင့် အရေးပေါ်ကယ်ဆယ်ရေးတွေ ပြုလုပ်နိုင်ဖို့ ကနဦးပံ့ပိုးမှု စင်ကာပူဒေါ်လာ ၁၅၀,၀၀၀ ထောက်ပံ့မှာဖြစ်ကြောင်း စင်ကာပူကြက်ခြေနီအဖွဲ့က ကတိပြုပါတယ်။

အရေးပေါ်နေရာတွေမှာ ထောက်ပံ့ကြေးတွေ အသုံးပြုမှာဖြစ်တယ်လို့ စင်ကာပူ ကြက်ခြေနီအဖွဲ့က  မတ် ၂၉ ရက်မှာ သတင်းထုတ်ပြန်ပါတယ်။

အဲ့ဒီပံ့ပိုးမှုထဲမှာ ရေ၊ အစားအသောက်၊ စောင်၊ မိုးကာစတွေ၊ တကိုယ်ရေသုံးပစ္စည်းတွေ စတဲ့ မရှိမဖြစ် အသုံးအဆောင်တွေ ပါဝင်ပြီး မြန်မာနဲ့ ထိုင်း ကြက်ခြေနီအဖွဲ့တွေ ပေးအပ်မှာ ဖြစ်ပါတယ်။

စင်ကာပူကြက်ခြေနီ အထွေထွေအတွင်းရေးမှူး ဝီလျံက “ငလျင်ဒဏ်ခံစားရမှုနဲ့ ပတ်သက်ပြီး ကျနော်တို့ အရမ်းစိတ်မကောင်းဖြစ်ရပါတယ်။ ဒဏ်ရာရတာတွေ၊ စွန့်ခွါထွက်ပြေးရတာတွေနဲ့ အကူအညီတွေ အရေးပေါ် လိုအပ်နေပါတယ်။ အဆောက်အအုံတွေလည်း ပျက်စီးခဲ့လို့ အရေးပေါ် ကူညီမှုတွေ လိုအပ်နေပြီး မြေပြင်ကယ်ဆယ်ရေးတွေလည်း လုပ်နေရပါတယ်။ ငလျင်ဒဏ် ခံစားနေရတဲ့နေရာတွေမှာ အမြန်ဆုံးကူညီမှု၊ လူသားချင်းစာနာထောက်ထားမှုတွေနဲ့ ပူးပေါင်းရမှာပါ။ ကြက်ခြေနီအဖွဲ့တွေနဲ့ ကူညီမှုတွေ ပူးပေါင်းမှာဖြစ်ပြီး လူထုကလည်း ကူညီမှုတွေမှာ ပါဝင်အောင် ကျနော်ကြိုးစားမှာပါ” လို့ ပြောပါတယ်။

မြန်မာနဲ့ ထိုင်းမှာ သောကြာနေ့က လှုပ်ခတ်ခဲ့တဲ့ ငလျင်ကြောင့် လူပေါင်း ၁,၀၀၀ ကျော် သေဆုံးခဲ့ပြီး  အဆောက်အအုံတွေလည်း ပြိုကျမှု‌ခဲ့လို့ သေဆုံးသူအရေအတွက် ပိုပြီး တိုးလာမယ်လို့ ခန့်မှန်းရပါတယ်။

မြန်မာနိုင်ငံအလယ်ပိုင်းရှိ စစ်ကိုင်းတိုင်းမှာ ပြင်းအား ရစ်ချ်တာစကေး ၇ ဒသမ ၇ အဆင့်ရှိ ငလျင်လှုပ်ခတ်ခဲ့ပြီးနောက် မိနစ်အနည်းငယ်အကြာမှာ ပြင်းအား ၆ ဒသမ ၄ အဆင့် ငလျင် ထပ်မံလှုပ်ခတ်ခဲ့ပါတယ်။

ပြင်းထန်တဲ့ ငလျင်ကြောင့် မြန်မာနိုင်ငံမှာ လူနေအိမ်တွေ၊ စေတီဘုရားတွေနဲ့ ဘာသာရေး အဆောက်အဦတွေ  ပြိုကျမှု၊ လမ်းတံတားတွေ လမ်းပျက်စီးမှုတွေဖြစ်ခဲ့သလို ထိုင်းနိုင်ငံ ဘန်ကောက်မှာလည်း ဆောက်လက်စ အထပ်မြင့်တိုက်တလုံး ပြိုကျခဲ့ပါတယ်။

Source : Reuters