မြန်မာနိုင်ငံမှာ မတ် ၂၈ ရက်နေ့လယ်က လှုပ်ခတ်ခဲ့တဲ့ အင်အားပြင်းငလျင်ကြောင့် ပြည်သူအချို့ ထိခိုက်ဒဏ်ရာရရှိမှုတွေ ရှိတဲ့အတွက် အရေးပေါ်သွေးလိုအပ်တဲ့ အခြေအနေရှိတယ်လို့ စစ်ကောင်စီက ထုတ်ပြန်ပါတယ်။
ငလျင်ဒဏ်သင့်ခံခဲ့ရတဲ့အတွက် ပြည်သူအချို့ သေဆုံးခဲ့ရသလို ထိခိုက်ဒဏ်ရာ ရရှိတာတွေ ရှိတဲ့အတွက် စစ်ကိုင်း၊ မန္တလေး၊ နေပြည်တော်တို့က ပြည်သူ့ဆေးရုံတွေမှာ အများအပြား ဆေးကုသခံယူနေရပြီး အရေးပေါ် သွေးလိုအပ်ချက်တွေ ရှိနေတဲ့အတွက် ဆေးရုံတွေကို အမြန်ဆုံး ဆက်သွယ်ပြီး သွေးလှူဒါန်းပေးကြဖို့ ထုတ်ပြန်ချက်က တိုက်တွန်းပြောဆိုထားပါတယ်။
စစ်ကောင်စီ ခေါင်းဆောင် မင်းအောင်လှိုင်ကလည်း ငလျင်ဘေးကြောင့် ပျက်စီးဆုံးရှုံးသွားတဲ့ နေပြည်တော်ရှိ နေရာတွေနဲ့ ထိခိုက်ဒဏ်ရာ ရရှိသူတွေကို သွားရောက် ကြည့်ရှုခဲ့ပါတယ်။
စစ်ကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ် ဇော်မင်းထွန်းကလည်း “ဒီငလျင်ဟာ ခန့်မှန်းချက်တွေအရ ဒီကနေ့ ညနေ ၃ နာရီလောက်ထိ နောက်ဆက်တွဲ ငလျင်များ လှုပ်နိုင်ပါတယ်။ ဒါကြောင့် ဘေးကင်းတဲ့နေရာမှာ နေကြဖို့ အရေးကြီး တိုက်တွန်း ပြောကြားလိုပါတယ်” လို့ ပြောပါတယ်။
