စစ်ကိုင်းတိုင်း၊ ကလေးမြို့နယ်က ကျေးရွာ ၅ ရွာကို စစ်ကောင်စီက လေကြောင်းကနေ တိုက်ခိုက်ခဲ့တာကြောင့် ဒေသခံ ၂ ယောက် ထိခိုက်ဒဏ်ရာရခဲ့ပြီး နေအိမ်အဆောက်အအုံတချို့ ထိခိုက်ပျက်စီးသွားသလို နွား ၃ ကောင်လည်း သေဆုံးခဲ့တယ်လို့ ဒေသခံတွေကပြောပါတယ်။
မတ် ၁၉ ရက်နေ့က နေ့ခင်းပိုင်း ၃နာရီဝန်းကျင်က လက်ပံချောင်းရွာ၊ စမိတ်ကွင်းရွာ၊ ပြည်တော်သာရွာ၊ ညပိုင်း ၇ နာရီဝန်းကျင်မှာ ဟားခါးလေးရွာနဲ့ မတ် ၂၀ ရက်နေ့ ညနေ ၅ နာရီဝန်းကျင်မှာတော့ ရာဇဂြိုလ်ရွာတို့ကို စစ်ကောင်စီက လေကြောင်းကနေတိုက်ခိုက်ခဲ့တာပါ။
စစ်တပ်ရဲ့လေကြောင်းတိုက်ခိုက်မှုကြောင့် ဟားခါးလေးရွာက ဒေသခံပြည်သူ ၁ ယောက် ထိခိုက်ဒဏ်ရာရခဲ့ပြီး နေအိမ် ၂ လုံးပျက်စီးခဲ့သလို လက်ပံချောင်းရွာက ဒေသခံ ၁ ယောက် ခြေထောက်ထိမှန်ခဲ့ပြီး နွား ၃ ကောင် သေဆုံးခဲ့တယ်လို့ ကလေးနယ်က တော်လှန်ရေးအင်အားစုအဖွဲ့ဝင်တယောက်က DVB ကို ပြောပါတယ်။
လက်ရှိမှာ ဒဏ်ရာရရှိသူ ၂ ယောက်ဟာ စိုးရိမ်ရတဲ့အခြေအနေမရှိသလို လေကြောင်းတိုက်ခိုက်မှုကြောင့် ဒေသခံအချို့ ကျေးရွာတွင်းကနေ တိမ်းရှောင်ခဲ့ကြပေမဲ့ အခုတော့ ပြန်လည်ဝင်ရောက်နေထိုင်နေကြပြီလို့လည်း သူက ဆက်ပြောပြပါတယ်။
ပြီးခဲ့တဲ့ ဖေဖော်ဝါရီ ၁၄ ရက်ကလည်း စစ်ကောင်စီက ကလေးမြို့နယ် သံဖိုရွာနဲ့ ကျော်ရွာကျေးရွာကို လေကြောင်းကနေတိုက်ခိုက်ခဲ့တာကြောင့် ကလေးငယ်တွေအပါအဝင် ဒေသခံ ၈ ယောက် သေဆုံးခဲ့ပါသေးတယ်။
