အစ္စရေးစစ်တပ်က မတ် ၁၉ ရက် မနက်အစောပိုင်းမှာ ဂါဇာစီးတီးနဲ့ ခန်းယူးနစ်မြို့တွေ အပါအဝင် ဂါဇာကမ်းမြောင် မြောက်ပိုင်း၊ အရှေ့ပိုင်းနဲ့ တောင်ပိုင်း အစိတ်အပိုင်းတွေထဲက နေရာအတော်များများမှာ နောက်တကျော့ အပြင်းအထန် လေကြောင်းကနေ တိုက်ခိုက်ခဲ့တယ်လို့ ဒေသခံ သတင်းရင်းမြစ်နဲ့ မျက်မြင်သက်သေတွေက ပြောပါတယ်။

ဗုဒ္ဓဟူးနေ့ တိုက်ခိုက်မှုကြောင့်ဖြစ်တဲ့ အသေအပျောက်စာရင်းကို ရှင်းရှင်းလင်းလင်း မသိရသေးပါဘူး။

အင်္ဂါနေ့က လေကြောင်းတိုက်ခိုက်မှုကြောင့် လူ ၄၁၃ ယောက်ထက်မနည်း သေဆုံးတယ်လို့ ဂါဇာအခြေစိုက် ကျန်းမာရေးအာဏာပိုင်တွေက ပြောပါတယ်။

အပစ်အခတ် ရပ်စဲရေးအတွက် အစ္စရေးနဲ့ ဟားမတ်စ်တို့ကြား သွယ်ဝိုက်ညှိနှိုင်းနေတဲ့ကြားက အင်္ဂါနေ့ အစောပိုင်းမှာ လေကြောင်းတိုက်ခိုက်မှု ဖြစ်ခဲ့တာပါ။

ညှိုနှိုင်းနေဆဲ အပစ်အခတ်ရပ်စဲရေးမှာ လက်ကျန် အစ္စရေး ဓားစာခံတွေကို ပြန်လွှတ်ပေးရေးနဲ့ စစ်ပွဲအဆုံးသတ်ရေးတို့ ပါပါတယ်။

ဒီ လေကြောင်းတိုက်ခိုက်မှုဟာ ၂ လနီးပါးကြာနေတဲ့ အပစ်အခတ်ရပ်စဲရေးကို ကျိုးပေါက်စေပြီး ၁၇ လကြာ စစ်ပွဲ အပြည့်အဝ ပြန်စစ်မီးတောက်လာမှာကို စိုးရိမ်စေခဲ့ပါတယ်။

အစ္စရေး လုံခြုံရေးတပ်ဟာ ဂါဇာကမ်းမြောင်တလွှား ပါလက်စတိုင်း အစ္စလာမစ် ဂျီဟဒ် လှုပ်ရှားမှုနဲ့ ဟားမတ်စ်တို့ရဲ့ အကြမ်းဖက် ပစ်မှတ်တွေလို့ သူတို့ခေါ်တဲ့ ပစ်မှတ်တွေကို ဆက်ပြီး တိုက်ခိုက်သွားမယ်လို့ အစ္စရေး ကာကွယ်ရေးတပ် (IDF) နဲ့ ရှင်းဘတ် လုံခြုံရေးဌာနတို့က အင်္ဂါနေ့ မွန်းလွဲပိုင်းမှာ ပူးတွဲ ကြေညာချက် ထုတ်ပြန်ကြေညာပါတယ်။

အစ္စရေးရဲ့ လေကြောင်းတိုက်ခိုက်မှုဟာ ဂါဇာတလွှား လူဦးရေသိပ်သည်းတဲ့ လူနေဧရိယာနဲ့ စစ်ရှောင်ပြည်သူတွေရဲ့ စခန်းတွေကို ပစ်မှတ်ထားခဲ့တယ်လို့ ဟားမတ်စ်တွေ ကြီးမှူးကွပ်ကဲတဲ့ ဂါဇာအစိုးရ မီဒီယာရုံးက ပြောပါတယ်။

သေဆုံးသူတွေထဲမှာ ဟားမတ်စ် အကြီးတန်းအရာရှိ ၅ ယောက်ထက်မနည်းနဲ့ သူတို့ရဲ့ မိသားစုတွေလည်း ပါတယ်လို့ ဟားမတ်စ် အစိုးရလုံခြုံရေး သတင်းရင်းမြစ်ကို ကိုးကားပြီး ရိုက်တာသတင်းဌာနက ဖော်ပြပါတယ်။

Source : Reuters