
ရခိုင်ပြည်နယ်၊ ကျောက်ဖြူမြို့နယ်၊ ကြတ္တိန်ကျေးရွာကို မတ် ၁၂ ရက် နေ့လယ်ပိုင်းမှာ စစ်ကောင်စီတပ်က ဒရုန်းနဲ့ ဗုံးကြဲခဲ့လို့ ဘုန်ကြီးကျောင်းနဲ့ ဓမ္မာရုံအဆောက်အအုံ ထိခိုက်ပျက်စီးခဲ့တယ်လို့ ဒေသခံတွေဆီကနေ သိရပါတယ်။
ကျောက်ဖြူမြို့နယ်၊ ကြတ္တိန်ကျေးရွာကို မတ် ၁၂ ရက် နေ့လယ် ၁၂ နာရီလောက်မှာ ဓညဝတီ ရေတပ်စခန်း ဌာနချုပ်က ဒရုန်းနဲ့ ဗုံး ၂ လုံး ကြဲချခဲ့တယ်လို့ ကျောက်ဖြူမြို့နယ် ဒေသခံတယောက်က DVB ကို ပြောပါတယ်။
အဲဒီဗုံးသီးတွေ ပေါက်ကွဲခဲ့လို့ ဘုန်းကြီးကျောင်းနဲ့ ဓမ္မာရုံအဆောက်အအုံ ထိခိုက်ပျက်စီးခဲ့တယ်လို့ ဆိုပါတယ်။
ကြတ္တိန်ကျေးရွာကို မတ် ၇ ရက်၊ ၉ ရက်နဲ့ ၁၁ ရက်နေ့တွေမှာလည်း စစ်ကောင်စီဘက်က ဒရုန်းနဲ့ ဗုံးကြဲခဲ့လို့ နေအိမ် ၄၅ လုံးနဲ့ ဆန်တောင်း(၆ပြည်) ၁၀,၁၀၀ မီးလောင်ဆုံးရှုံးခဲ့ရတယ်လို့ ပြောပါတယ်။
ကျောက်ဖြူမြို့နယ်မှာ စစ်ကောင်စီတပ်နဲ့ အာရက္ခတပ်တော် (AA) တို့ တိုက်ပွဲပြင်းထန်နေပြီး အရပ်သားပြည်သူ ၂၀,၀၀၀ ကျော်လောက် ဘေးလွတ်ရာနေရာတွေကို ထွက်ပြေးတိမ်းရှောင်နေရကာ လူသားချင်းစာနာထောက်ထားမှုဆိုင်ရာ အရေးပေါ် အကူအညီတွေ လိုအပ်နေတယ်လို့ သိရပါတယ်။