ထိုင်းတောင်ပိုင်း နာရာသီဝပ်နဲ့ ပတ္တနီခရိုင် ၂ ခုမှာ ပြီးခဲ့တဲ့ စနေနေ့ညက တညတည်း အကြမ်းဖက် ပစ်ခတ်၊ ဗုံးဖောက်ခွဲမှု ၆ ကြိမ်ဖြစ်ပွားပြီး တာဝန်ကျဝန်ထမ်း ၅ ယောက်နဲ့ ပြည်သူတွေပါ ၁၀ ယောက်ကျော် ဒဏ်ရာရရှိတယ်လို့ ထိုင်းသတင်းတွေမှာ ဖော်ပြပါတယ်။ 

နာရာသီဝပ်ခရိုင်မှာဆိုရင် မတ် ၈ ရက် ည ၇ နာရီ ၁၀ မိနစ်က ဆုငိုင်ကိုလုတ် မြို့နယ်အုပ်ချုပ်ရေးမှူးရုံး ၊ ည ၇ နာရီ ၂၈ မိနစ်က အွန်ကန် ရထားသံလမ်းနား၊ ၇ နာရီခွဲက ဆုငိုင်ကိုလုတ်ကုန်တိုက်ရှေ့နဲ့ ည ၇ နာရီ ၅၂ မိနစ်က တလိန်ဆုန်တံတားအနီး ဓာတ်မီးတိုင်မှာ ပစ်ခတ် ဖောက်ခွဲမှုတွေ ဖြစ်ခဲ့တာပါ။

မြို့နယ်အုပ်ချုပ်ရေးမှူးရုံးဖြစ်စဉ်မှာ အကြမ်းဖက်သမား ၆ ယောက်၊ ၇ ယောက်လောက်က တောင်ပိုင်းသူအမျိုးသမီးဝတ်စုံ (အနက်ရောင်ခေါင်းမြီးခြုံ) ဝတ်ဆင်ပြီး ကား ၂ စီးနဲ့ ဝင်ရောက်လာကာ မြို့နယ်ရုံးရှေ့မှာ တာဝန်ထမ်းဆောင်နေတဲ့ လုံခြုံရေးတပ်ဖွဲ့တွေကို သေနတ်နဲ့ပစ်သလို ဗုံးနဲ့လည်း ပစ်ပေါက်ခဲ့လို့ လုံခြုံရေးတပ်သား ၂ ယောက် ကျဆုံးပြီး ဝန်ထမ်းနဲ့ လုံခြုံရေးတပ်သား ၈ ယောက်ဒဏ်ရာရခဲ့တဲ့အပြင် အနီးနားနေပြည်သူ ၃ ယောက် ဒဏ်ရာရခဲ့တယ်လို့ ဆိုပါတယ်။

အဆိုပါပစ်ခတ်ဖောက်ခွဲမှုမှာ မြို့နယ်အစည်းအဝေးခန်းမ၊ သမဝါယမရုံး၊ အုပ်ချုပ်ရေးဌာနရုံးခန်း၊ မော်တော်ကားရုံနဲ့ ကားရုံထဲရပ်ထားတဲ့ ကားနဲ့ ဆိုင်ကယ်တွေပါ ပျက်စီးဆုံးရှုံးခဲ့တယ်လို့ အုပ်ချုပ်ရေး တာဝန်ရှိသူက ပြောပါတယ်။

ပတ္တနီခရိုင်မှာလည်း မတ်လ ၈ ရက် ညနေ ၆ နာရီက ဆိုင်ဘူရီမြို့နယ် ခရော့ဘွန်ရပ်ကွက်ရှိ အမှတ် ၄၄၁၁ ခြေလျင်တပ်ရင်း သေနတ်နဲ့ ချောင်းပစ်ခံရပြီး ဒီဖြစ်စဉ်မှာ ထိခိုက်ဒဏ်ရာရသူ မရှိခဲ့ပါဘူး။

တမြို့တည်းမှာပဲ  ည ၉ နာရီ ၂၀ မိနစ်မှာ ခရော့ဘွန်ရပ်ကွက်၊ နားခိုဇရပ်အနီး ပေါက်ကွဲမှုဖြစ်ပြီး ပြည်သူ့လုံခြုံရေးတပ်ဖွဲ့ဝင်  တယောက်၊ လက်ထောက်ရပ်ကွက်အုပ်ချုပ်ရေးမှူး ၂ ယောက်  စုစုပေါင်း ၃  ယောက်  ပွဲချင်းပြီးသေဆုံးပြီး  နောက်ထပ် လက်ထောက်ကျေးရွာအုပ်ချုပ်ရေးမှူး  တယောက် ဒဏ်ရာရသွားပါတယ်။

အခင်းဖြစ်တဲ့နေရာတွေကို အမှတ် ၄ တိုင်းဒေသ တပ်ဖွဲ့ဝင်တွေ ရောက်ရှိလာပြီး ပျက်စီးဆုံးရှုံး မှုတွေ စစ်ဆေးကာ အကြမ်းဖက်သမားတွေကိုလည်း အပူတပြင်း လိုက်လံထောက်လှမ်း စစ်ဆေး နေတယ်လို့   သတင်းမှာ ဖော်ပြသွားပါတယ်။ 

ထိုင်းတောင်ပိုင်းမှာ မွတ်စလင်ခွဲထွက်ရေးအဖွဲ့တွေ မကြာခဏ အကြမ်းဖက်မှုတွေ ကျူးလွန်နေတာ ဖြစ်ပါတယ်။ 

Source:  Thairath / The Reporters