မကွေးတိုင်း၊ ဂန့်ဂေါမြို့နယ်မှာ စစ်ကောင်စီရဲ့ လေကြောင်းကနေ ဗုံးကြဲတိုက်ခိုက်မှုကြောင့် သက်ကြီးပိုင်းအရွယ် အရပ်သား ၂ ယောက် သေဆုံးပြီး တယောက် ထိခိုက်ဒဏ်ရာရထားတယ်လို့ ဒေသခံတွေက ပြောပါတယ်။
မတ် ၅ ရက် ည ၈ နာရီဝန်းကျင်က မိတ္ထီလာ ရှမ်းတဲလေးလေတပ်ကနေ ပျံသန်းလာတဲ့ ဂျက်တိုက်လေယာဉ် တစီးဟာ ဂန့်ဂေါမြို့နယ်မြောက်ပိုင်းက ကန်ရွာစာသင်ကျောင်းအနီးက နေအိမ်တွေကို မီးလောင်ဗုံးနဲ့ ၂ ကြိမ် ကြဲချခဲ့တာပါ။
လေကြောင်းတိုက်ခိုက်မှုကြောင့် ကန်ရွာစာသင်ကျောင်းနဲ့ ကပ်လျက်က နေအိမ် ၃ လုံး မီးလောင်ခဲ့ပြီး အသက် ၆၀ ကျော်အရွယ် ဦးအောင်ဖြိုးနဲ့ ဒေါ်ထားမြင့်တို့ လင်မယား ၂ ယောက်လည်း ပွဲချင်းပြီး သေဆုံးခဲ့ကာ ချွေးမဖြစ်သူကတော့ စိုးရိမ်ရတဲ့ အခြေအနေ ရှိနေတယ်လို့ အခင်းဖြစ်ပွားရာကို ရောက်ရှိနေတဲ့ ကန်ရွာသားတယောက်က ပြောပါတယ်။
လေကြောင်းတိုက်ခိုက်မှုတွေ ဆက်လက်ပြုလုပ်မှာကို စိုးရိမ်တာကြောင့် သေဆုံးသူ ဇနီးမောင်နှံ ၂ ယောက်ကို မတ် ၆ ရက် ဒီနေ့မနက်ပိုင်း မီးသင်္ဂြိုဟ်လိုက်ရပါတယ်။
လေကြောင်းတိုက်ခိုက်မှုအပြီး မြို့နယ်တွင်းမှာ အဓိကထား အသုံးပြုနေရတဲ့ MPT ဆက်သွယ်ရေးလိုင်းတွေလည်း ပြတ်တောက်နေတယ်လို့ သိရပါတယ်။
ဇန်နဝါရီ ၂၉ ရက် ညကလည်း ဂန့်ဂေါနယ်မြောက်ပိုင်းက ကျွန်းခုံသာရွာအနီးကို စစ်တပ်က လေကြောင်းကနေ ၂ ကြိမ်တိုင် ဗုံးကြဲတိုက်ခိုက်ခဲ့တာကြောင့် YDF ရဲဘော်တယောက် ဒဏ်ရာရရှိခဲ့ပါသေးတယ်။
စစ်အာဏာသိမ်းခဲ့တဲ့ ၂၀၂၁ ဖေဖော်ဝါရီ ၁ ရက်ကနေ ၂၀၂၅ မတ် ၅ ရက်အထိ စစ်ကောင်စီလက်ချက်ကြောင့် အရပ်သား ၆,၃၈၀ ယောက် သေဆုံးထားကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP)က ထုတ်ပြန်ထားတယ်။
