ရန်ကုန်၊ လှိုင်သာယာမြို့နယ်နဲ့ တောင်ဒဂုံမြို့နယ်က ရပ်ကွက်အုပ်ချုပ်ရေးမှူး ၂ ဦးနဲ့ အဖွဲ့ဟာ ပြည်သူတွေကို လူမိုက်တွေနဲ့ ခြိမ်းခြောက်အကျပ်ကိုင်၊ စစ်မှုထမ်းခိုင်းနေတယ်လို့ မြို့ခံတွေက ပြောပါတယ်။
လှိုင်သာယာမြို့နယ်၊ ၅ ရပ်ကွက် အုပ်ချုပ်ရေးမှူးအသစ် ဇွန်ကို(ခ) ဂျွန်ကိုဟာ နယ်ခံလူမိုက်တွေနဲ့ ပူးပေါင်းပြီး စစ်ကောင်စီစစ်မှုထမ်းဖို့ အဓမ္မစစ်သား စုဆောင်းပေးနေတဲ့အပြင် ရဲသတင်းပေးအဖြစ် လုပ်ကိုင်နေတယ်လို့ မြို့ခံတယောက်က ပြောပါတယ်။
“အခု အုပ်ကြီးက အရင်အုပ်ကြီး ညွန့်တင်ရဲ့ တပည့်ပါပဲ။ ညွန့်တင်တုန်းကလည်း စစ်တပ်အမာခံ၊ မြေတွေ သိမ်း၊ စစ်တပ်သတင်းပေးပါ။ ၅ ရပ်ကွက် အခုအုပ်ကြီးက ဇွန်ကို။ သူ့ကြောင့် လူငယ်တွေ ထွက်ပြေးရတာ မနည်းဘူး။”
အရင်အရပ်သားအစိုးရလက်ထက်က ထောင်ကျဖူးတဲ့ သီဟမျိုးနိုင်(ခ)နိုင်ဒဂုံဟာ တောင်ဒဂုံမြို့နယ်၊ ၅၄ ရပ်ကွက်၊ အုပ်ချုပ်ရေးမှူးဖြစ်ပြီး စစ်မှုထမ်းဖို့အတွက် လူငယ်တွေကို ကိုယ်တိုင်ဖမ်းဆီးပေးနေတဲ့အပြင် ရပ်ကွက်ရုံးခန်းကို စစ်ကြောရေးလို သုံးနေတာလို့ မြို့ခံတွေက ပြောပါတယ်။
၂၀၂၄ ခုနှစ်၊ ဒီဇင်ဘာလအတွင်းကလည်း ၅၄ ရပ်ကွက်၊ နွယ်နီလမ်းက စစ်မှုထမ်းစာရင်းပါတဲ့ ဒုလ္လဘရဟန်းတပါးကို ရုံးအဖွဲ့တွေက ဆိုင်ကယ်နဲ့ ချုပ်နှောင်ခေါ်ဆောင်သွားပြီး သင်္ကန်းချွတ် လက်ထိတ်ခတ် ဖမ်းဆီးခဲ့တယ်လို့ ဆိုပါတယ်။
မြို့ခံတယောက်က “သူက ထောင်ထွက်၊ ဘေးတွဲသမားတွေဆီကနေ တလဘယ်လောက်နှုန်း တောင်းပြီး စကစကို ပြန်ပေးတာ။ လိုင်းကြေးလိုမျိုး။ အရပ်သားပြည်သူတွေ ဖမ်းဆီးခံရတာတွေ၊ သူ့ရဲ့ရုံးမှာ ဖမ်းဆီးနှိပ်စက်တာတွေ ပါသေးတယ်။ ရပ်ကွက်ထဲမှာ မဲနှိုက်တာတွေဘာတွေ မလုပ်တော့ဘူး။ တွေ့ကရာလူငယ်တွေကို ပေါ်တာဆွဲတဲ့သဘောမျိုး ဖမ်းသွားတာ။ တော်လှန်ရေးရဲဘော်တွေရဲ့ သတင်းတွေကို စကစကို သတင်းပေးတာတွေ ရှိသေးတယ်။ ရာအိမ်မှူးက ဟိန်းထက်၊ ဆယ်အိမ်မှူးက လူပျိုကြီးလို့ ခေါ်တယ်။ စစ်မှုထမ်းစာရင်းကောက်နေတာ” လို့ ပြောပါတယ်။
ဒါ့အပြင် ရပ်ကွက်ဈေးသည်တွေဆီကနေ လတိုင်း အခွန်ကောက်သလို ရပ်ကွက်နေသူတွေကို ဧည့်စာရင်းကြေး၊ ထောက်ခံစာကြေးတွေအပြင် လစဉ် ကင်းကြေး တအိမ်ထောင် ၁၅၀၀ ကျပ်၊ ဘုရားတည် အာစိန္တကံကြေးကို လစဉ် ၃၀၀၀ ကျပ်နဲ့ စျေးဆိုင်တွေကနေ လစဉ်ဝင်ငွေခွန် ၅၀,၀၀၀ ကျပ် ကောက်ယူနေတယ်လို့ သိရပါတယ်။
