ရန်ကုန်၊ တောင်ဒဂုံမြို့နယ်၊ တောင်မြောက်လမ်းဆုံအနီး၊ အမှတ် ၂ လမ်းမကြီးပေါ်က တောင်ဒဂုံ ရဲစခန်း အဝင်အထွက်ကင်းဂိတ်ကို ဖေဖော်ဝါရီ ၂၅ ရက်ညက အဝေးထိန်း မိုင်း ၂ လုံးနဲ့ တိုက်ခိုက်ခဲ့တယ်လို့ Dark Shadow က ပြောပါတယ်။
ရဲစခန်းအတွင်းကနေ ပြန်လည်ပစ်ခတ်နိုင်တာ မရှိဘူးလို့ Dark Shadow သတင်းပြန်ကြားတာဝန်ရှိသူက ပြောပါတယ်။
“ရဲစခန်း ရဲကင်းဂိတ်ကိုတိုက်ခိုက်ခဲ့တာပါ။ ထိခိုက်မှုအခြေအနေမသိရသေးပါဘူး။ ရဲဘော်များ ဘေးကင်း လုံခြုံစွာပြန်ရောက်ရှိပါပြီ။ စကစဘက်က ပြန်လည်ပစ်ခတ်တာမျိုးမရှိဘဲ တိတ်ဆိတ်ငြိမ်သက်သွားတာမျိုးပဲ ရှိပါတယ်။”
မနေ့ ည ၇ နာရီခွဲလောက်က ရဲစခန်းနားမှာ ပေါက်ကွဲသံတွေ ကြားခဲ့ရတယ်လို့ မြို့ခံတွေက ပြောပါတယ်။
ဒီစစ်ဆင်ရေးအပါအဝင် Dark Shadow အဖွဲ့ဟာ စစ်ကောင်စီကို တိုက်ခိုက်မှုပေါင်း ၆၀ ကျော် ပြုလုပ်ခဲ့ပြီးပြီ ဖြစ်ပြီး ဒီအဖွဲ့ဟာ အာဏာရှင်စစ်တပ်ကို တော်လှန်ခဲ့တာ ၃ နှစ်ကျော် ခဲ့ပြီလို့ သိရပါတယ်။
Dark Shadow သတင်းပြန်ကြားတာဝန်ရှိသူက “တော်လှန်ပြည်သူတွေကိုအသိပေးချင်တာတော့ အခုကာလမှာ သွားသတိ၊ လာသတိနဲ့နေကြပါ။ စကစက စစ်မှူထမ်းဥပဒေနဲ့ လူငယ်တွေကို တနေ့တမျိုးမရိုးရအောင် ဒုက္ခပေးနေပါတယ်”လို့ ပြောပါတယ်။
ဖေဖော်ဝါရီ ၂၃ ရက်၊ ည ၆ နာရီ မိနစ် ၅၀ လောက်ကလည်း မှော်ဘီမြို့နယ်၊ အမှတ်၄ လမ်းဆုံ၊ အောက်မင်္ဂလာဒုံလမ်းမကြီးပေါ်က မှော်ဘီမြို့နယ်ရဲတပ်ဖွဲ့မှုးရုံးကို Operation Flame OF အဖွဲ့က အဝေးထိန်းမိုင်း ၂ လုံးနဲ့ ရဲဝန်းအဝင်အဝမှာ ဖောက်ခွဲခဲ့တာကြောင့် ရဲတပ်ဖွဲ့ဝင်တွေ ထိခိုက်မှု ရှိခဲ့ပါတယ်။
