သေဆုံးသူတွေထဲမှာ ၇ ယောက်ကတော့ မိသားစုလိုက်သေဆုံးတာဖြစ်ပြီး အသက် ၃ နှစ်၊ ၉ နှစ်နဲ ၁၀ နှစ်အရွယ် ကလေး ၃ ယောက် ပါဝင်တယ်လို့ ဒေသခံတွေက ပြောပါတယ်။
“မနက်အစောကြီး ဖြစ်သွားတာ။ မိသားစုလိုက် ၇ ယောက်။ ကလေးက ၃ နှစ် မိန်းကလေး၊ ၁၀ နှစ်လည်း မိန်းကလေး၊ ယောက်ျားလေးက ၉ နှစ်။ အလောင်းတွေက တစစီပဲ။ မိသားစုဟုတ်တယ်၊ ၇ ယောက်လုံးက။ အိမ်တွေလည်း ပျက်စီးသွားတယ်”
KIO သတင်းနဲ့ပြန်ကြားရေးဌာနကလည်း စစ်ကောင်စီကြဲတဲ့လေယာဉ်ဗုံးဟာ မိုးမောက်မြို့နယ် ဝငန် (Wa Ngang) ရွာက ဦးမောင်ဦးရဲ့ နေအိမ်ထဲကျရောက်ပေါက်ကွဲခဲ့ပြီး၊ ကလေး ၃ ယောက် အပါအဝင် မိသားစု ၇ ယောက် သေဆုံးခဲ့ကြောင်းနဲ့ နန်းအီ (Nang I) ကျေးရွာမှာလည်း လေယာဉ်ဗုံး ၂ လုံး ကြဲချခဲ့တာကြောင့် ကလေး ၁ ယောက် အပါအဝင် ၅ ယောက် ထိခိုက်ဒဏ်ရာရရှိခဲ့ကြောင်း သတင်းဖော်ပြထားပါတယ်။
မိုးမောက်မြို့နယ်ဟာ လက်ရှိ မြို့သိမ်းတိုက်ပွဲဖြစ်ပွားနေတဲ့ ဗန်းမော်မြို့နဲ့ နယ်မြေချင်းထိစပ်တဲ့ မြို့နယ်ဖြစ်ပါတယ်။
စစ်ကောင်စီဟာ အမှတ် ၂၁ စစ်ဆင်ရေးကွပ်ကဲမှုဌာနချုပ် (စကခ - ၂၁) အခြေစိုက်တဲ့ ဗန်းမော်မြို့ လက်မလွှတ်ရေးအတွက် အလူးအလဲခုခံနေရချိန် မြေပြင်တိုက်ပွဲမဖြစ်တဲ့ ကချင်ပြည်နယ်ရဲ့ တခြားဒေသတွေကိုလည်း လေကြောင်းနဲ့ ဒရုန်းတွေအသုံးပြု တိုက်ခိုက်နေတေဖြစ်ပါတယ်။
အခု ဖေဖော်ဝါရီလအတွင်းမှာပဲ ကချင်ပြည်နယေနေရာအနှံ့အပြားမှာ တိုက်ပွဲဖြစ်ပွားတမရှိတဲ့ အရပ်သားပြည်သူနေထိုင်ရာ ကျေးရွာတွေကိုပစ်မှတ်ထားပြီး လေယာဉ်နဲ့ဗုံးကြဲတိုက်ခိုက်တာ၊ ဒရုန်းနဲ့ ဗုံးကြဲတာတွေကြောင့် အရပ်သားထိခိုက် သေဆုံးတာတွေရှိနေပါတယ်။
