ရန်ကုန်မြို့က စည်ပင်ပိုင် သုသာန်တွေမှာ ‌လာမယ့် ဖေဖော်ဝါရီ ၁ ရက်နေ့ကစပြီး မီးသင်္ဂြိုဟ်စရိတ် တက်မယ်လို့ စည်ပင်ဌာနဆီက သိရပါတယ်။

လက်ရှိ မီးသင်္ဂြိုဟ်စရိတ် ကျပ် ၁ သောင်းကနေ ကျပ် ၁၅,၀၀၀ အထိ ဈေးတက်သွားမှာဖြစ်သလို ရေခဲတိုက်ကြေးကလည်း တရက်ကို ကျပ် ၅,၀၀၀ ကနေ တရက်ကို ကျပ် ၉,၀၀၀ ဖြစ်သွားမှာပါ။

အရပ်ဘက် နာကူအသင်းဝင်တယောက်က “ဆင်းရဲချို့တဲ့သူတွေကိုတော့ အသင်းက စိုက်ပေးရတာပေါ့။ ဒါတောင် တလောင်း သင်္ဂြိုဟ်ဖို့ ရေခဲတိုက်၊ ခန်းမကြေးမပါ အပြီးအစီး ၃ သောင်းကနေ ၆ သောင်းလောက် ကျတယ်။ မီးစက်ထဲထည့်ဖို့က သင်္ဂြိုဟ်ကတ် လိုသေးတယ်” လို့ ပြောပါတယ်။

မီးသင်္ဂြိုဟ်ရာမှာ အသုံးပြုတဲ့ သစ်သားကတ်တွေကို အရပ်ဘက် နာရေးကူညီမှုအသင်း‌တွေ၊ သုသာန်ဝန်ထမ်းတွေနဲ့ နီးစပ်ရင် ကျပ် ၁၅,၀၀၀နဲ့ ဝယ်ယူနိုင်မှာဖြစ်ပေမဲ့ စည်ပင်ဝန်ထမ်းတွေဆီက တိုက်ရိုက်ဝယ်ယူမယ်ဆိုရင်တော့ ကျပ် ၅၀,၀၀၀ အထိ ပေးနေရတယ်လို့ သိရပါတယ်။

နာရေးကူညီမှု အသင်းဝင်တယောက်က “တချို့ဆို ခန်းမကြေး ၂ နာရီစာ၊ ရေခဲတိုက်က အနည်းဆုံး ၂ ရက်ထားရင် ၂ ရက်စာ၊ ကတ်ဖိုး၊ သင်္ဂြိုဟ်ခတွေရော၊ စည်ပင်တွေက လက်ဖက်ရည်ဖိုး ထပ်တောင်းရင် ပေးရတာလည်း ရှိတယ်။ ပုံမှန်နာရေးဆို သေတဲ့အချိန်ကနေ ၂ သိန်း၊ ၃ သိန်းမှ မကုန်ရင် အဲဒီအလောင်း ပြာမဖြစ်ဘူး”လို့ ပြောပါတယ်။

ဒါ့အပြင် ရုပ်အလောင်းထားရှိမယ့် ခန်းမကြေးကို တနာရီ ကျပ် ၁၈,၀၀၀ အထိ ပေးနေရပြီး တတ်နိုင်တဲ့သူတွေ အသုံးပြုကြတဲ့ သစ်သားအခေါင်းတွေကတော့ ကျပ်ငွေ ၁ သိန်း ၈ သောင်းကနေ ၁၀ သိန်းကျော်အထိ ကျသင့်တယ်လို့ သိရပါတယ်။

ရန်ကုန်စည်ပင်ဧရိယာထဲက မင်္ဂလာဒုံ ရေဝေးသုသာန်၊ ရွှေပြည်သာ ကျူ‌ချောင်သုသာန်၊ လှိုင်သာယာ ထိန်ပင်သုသာန်နဲ့ တောင်ဒဂုံ ကျီစုသုသာန် နေရာ ၄ ခုစလုံးမှာ ဈေးတက်မှာဖြစ်ပြီး သန်လျင် အမိုးနီသုသာန်တော့ စည်ပင်ပိုင်မဟုတ်လို့ မပါဝင်ဘူးလို့ သိရပါတယ်။