ရန်ကုန်မြို့က မြောက်ဒဂုံ၊ ရွှေပြည်သာ၊ မြောက်ဥက္ကလာမြို့နယ်ထဲက ရပ်ကွက်အုပ်ချုပ်ရေးမှူးတွေကို စစ်ကောင်စီအဖွဲ့က သေနတ်တွေကို အကြွေးစနစ်နဲ့ ရောင်းချပေးနေတယ်လို့ အုပ်ချုပ်ရေးအဖွဲ့နဲ့ နီးစပ်သူတွေက ပြောပါတယ်။
မြောက်ဒဂုံမြို့နယ်ထဲက သေနတ်အကြွေးယူထားတဲ့ အုပ်ချုပ်ရေးမှူးတွေကို ထားဝယ်ချောင် ရဲစခန်းအတွင်းမှာ ဇန်နဝါရီလကစပြီး လက်နက်ငယ် အဖြုတ်အတပ်သင်တန်း ပေးနေတယ်လို့ မြို့ခံတယောက်က ပြောပါတယ်။
“၄၉၊ ၅၀၊ ၅၁ က ရပ်ကွက်လူကြီးတွေ ပါတယ်။ တရပ်ကွက်ကို ၃ ယောက်နှုန်းနဲ့ သွားနေကြတာ။ သေနတ်က ပစ္စတိုတွေ။ တလ ဘယ်လောက်နဲ့ အရစ်ကျခွဲသွင်းရမှာ အကြွေးစနစ်နဲ့။”
ရွှေပြည်သာမြို့နယ်ထဲက ရပ်ကွက်အုပ်ချုပ်ရေးမှူးတွေနဲ့ ရုံးအဖွဲ့ဝင်တွေကိုတော့ စစ်ကောင်စီက ၂၀၂၄ ခုနှစ်အတွင်းမှာ လက်နက်ငယ်သင်တန်း ၂ ကြိမ် ပေးခဲ့ဖူးသလို ရဲနဲ့ စစ်မှုထမ်းဟောင်းတွေကိုပါ ရုံးလုံခြုံရေးအဖွဲ့မှာ ထည့်သွင်းပေးထားပါတယ်။
သေနတ်မရရှိချိန်က ဧည့်စာရင်းစစ်ဆေးရေးအဖွဲ့တွေမှာ လက်နက်ကိုင်ရဲနဲ့ စစ်သားတွေ ပါဝင်ပေမဲ့ လက်နက်ရရှိပြီးချိန်ကစလို့ ရုံးအဖွဲ့နဲ့ ဘေးတွဲသမားတွေသာ ပါဝင်တော့တယ်လို့ မြို့ခံတယောက်က ပြောပါတယ်။
“၉ ရပ်ကွက်၊ ၄ ရပ်ကွက်၊ ၈ ရပ်ကွက်ကတော့ အဆိုးဆုံးထဲမှာ ပါတယ်။ အရင်ကတော့ စစ်သားတွေပါတယ်။ အခု ကိုယ့်ရပ်ကွက်မို့လို့ ညှာမယ်မထင်နဲ့။ သေနတ်ရှိတော့ ပိုလုပ်လာတာ။ ဧည့်စာရင်းရက်ကျော်ရင ယောကျ်ားလေးဆို တခါတည်း လိုက်သွားရတာ။ ရုံးမှာ ထိပ်တုံးခတ်ထားတာ။ ဆေးတွေ ဘာတွေမိရင် ရဲတောင် မအပ်တော့ဘူး။ တခါတည်း စစ်ထဲထည့်တာ။”
မြောက်ဥက္ကလာပမြို့နယ်ထဲက ရပ်ကွက် ၂ ခုကနေ မြို့သစ်ဖြစ်လာတဲ့ ဝေဘာဂီမြို့သစ်နဲ့ ရွှေပေါက္ကံမြို့သစ် အုပ်ချုပ်ရေးအဖွဲ့တွေမှာတော့ စစ်မှုထမ်းဟောင်း အရေအတွက် များပြားပြီး စက်ရုံ၊ အလုပ်ရုံတွေကနေ အခွန်ပိုရတာကြောင့် စစ်ကောင်စီ အကြွေးနဲ့ပေးမယ့် သေနတ်ကို လက်ငင်းဝယ်ကိုင်နေကြတဲ့ လိုင်စင်ရ လက်နက်ကိုင်အုပ်ချုပ်ရေးအဖွဲ့ဝင် ပိုများလာနေပါတယ်။
ထွေအုပ်ရုံးနဲ့ နီးစပ်သူတွေ ပြောပြချက်အရ ၉ မမ ကျည်ဆန်ထည့်ပစ်ရတဲ့ စစ်ကောင်စီထုတ် ပစ္စတိုသေနတ်တလက်ကို မြန်မာကျပ်ငွေ သိန်း ၄၀ အထိ ရှိနေပြီး ရပ်ကွက်ရုံးအမည်ပေါက်နဲ့ သေနတ်တလက်ကို ၅ နှစ် အရစ်ကျစနစ်နဲ့ ထုတ်ပေးထားတာလို့ သိရပါတယ်။
