ထိုင်းနိုင်ငံမှာ ၂၀၂၅ ခုနှစ် နှစ်သစ်ကူးကာလအတွင်း ယာဉ်မတော်တဆ ထိခိုက်မှုအန္တရာယ် အရှိဆုံးကာလကို ၁၀ ရက်တာ သတ်မှတ်ပြီးစောင့်ကြည့်ရာမှာ ၇ ရက်အတွင်း သေဆုံးသူ ၃၂၁ ယောက်ရှိတယ်လို့ ထိုင်းနိုင်ငံ မတော်တဆထိခိုက်မှုနဲ့ ယာဉ်အန္တရာယ် တားဆီးကာကွယ်ရေးဌာနက ဇန်နဝါရီ ၃ ရက်မှာ ထုတ်ပြန်ပါတယ်။
၂၀၂၄ ဒီဇင်ဘာ ၂၇ မှ ၂၀၂၅ ဇန်နဝါရီလ ၂ ရက်ထိ ၇ ရက် တာအတွင်း ထိုင်းတနိုင်ငံလုံးမှာ ယာဉ်မတော်တဆထိခိုက်မှုအကြိမ်ပေါင်း ၁၉၃၈ ကြိမ်ဖြစ်ပွါးခဲ့ပြီး သေဆုံးသူ ၃၂၁ ယောက် ရှိကြောင်း၊ ထိခိုက်ဒဏ်ရာရသူ ၁၈၉၄ ယောက် ရှိပြီး သေဆုံးသူလုံးဝမရှိတဲ့ခရိုင်မှာ ၆ ခရိုင်သာကျန်တယ်လို့ ဆိုပါတယ်။
မတော်တဆထိခိုက်မှုအများဆုံးမှာ စူရတ်ဌာနီခရိုင် ၇၂ ကြိမ် ဖြစ်ပြီး ဒဏ်ရာရသူအများဆုံး ၈၂ ယောက်နဲ့ သေဆုံးသူအများဆုံး ၂၀ ယောက်မှာလည်း အဆိုပါစူရတ်ဌာနီကပဲလို့ ဆိုပါတယ်။
စူရတ်ဌာနီမတော်တဆထိခိုက်မှုမှာ ဇန်နဝါရီ ၂ ရက် မနက်က မိသားစုဝင် ၇ ယောက်ပါတဲ့ ဟိုင်းလပ်စ်ကားတစီးဟာ ချိုင်းယားမြို့ အမှတ် ၄၁ အာရှလမ်းမကြီးပေါ်မောင်းနှင်းလာစဉ် လမ်းဘေးကသစ်ပင်ကိုအရှိန်နဲ့ ဝင်တိုက်မိတာကြောင့် ကနဦးမှာ ကားပေါ်က ကလေး ၄ ယောက် ပွဲချင်းပြီးသေဆုံးပြီး လူကြီး ၃ ယောက် ဒဏ်ရာပြင်းထန်တယ် ၊ အဆိုပါ လူကြီး ၃ ယောက်လုံးဟာ ချိုင်းယာဆေးရုံရောက်ပြီးမကြာခင် သေဆုံးတာကြောင့် ကားပေါ်ပါသူ ၇ ယောက်လုံးသေဆုံးခဲ့တာ ဖြစ်ပါတယ်။
အဆိုပါနေရာနဲ့ ၄ ကီလိုသာကွာဝေးတဲ့နေရာမှာ ပြီးခဲ့တဲ့ နှစ်သစ်ကူး ဇန်နဝါရီ ၁ ရက် ကလည်း ခရီးသည်တင်ဘတ်စ်ကားကြီးတစီး လမ်းဘေးကသစ်ပင်ကိုဝင်တိုက်ပြီး ခရီးသည် ၅ ယောက် သေဆုံး ၃၀ ကျော်ဒဏ်ရာရခဲ့ပါတယ်။ အဆိုပါကားဟာ နှစ်သစ်ကူးအလှူအတန်းသွားဖို့ ကားကို စီးလုံးငှားလာတာလို့ ထိုင်းသတင်းတွေမှာ ဖော်ပြပါတယ်။
ဇန်နဝါရီ ၂ ရက် တနေ့တည်းတင် ယာဉ်မတော်တဆထိခိုက်မှု ၁၉၆ ကြိမ်၊ ဒဏ်ရာရသူ ၂၀၀ ယောက် ၊ သေဆုံးသူ ၄၃ ယောက်ရှိပြီး မတော်တဆဖြစ်ရခြင်းအကြောင်းမှာ သတ်မှတ်နှုန်း ထက်အမြန် မောင်းနှင်တာက အများဆုံးဖြစ်ပြီး ရှေ့ကဖြတ်မောင်းတာ၊ မူးယစ်တာ၊ အမြင်မကြည်လင်တာတွေ ကြောင့်လည်း အဖြစ်များပြီး မတော်တဆအဖြစ်များဆုံးယာဉ် ကတော့ မော်တော်ဆိုင်ကယ် ဖြစ်ပါတယ်။
Source: DDPM / Thai PBS
