ခရစ္စမတ်သစ်ပင်ပေါင်း  ၆၀၅ ပင်နဲ့ နေအိမ် တအိမ်တည်းမှာ  ခရစ္စမတ်သစ်ပင် အလှဆင်မှု အများဆုံးအဖြစ် ဂျာမနီနိုင်ငံရှိ မိသားစုက ကမ္ဘာ့စံချိန်တင်ခဲ့ပါတယ်။

ဂျာမနီအနောက်မြောက်ပိုင်းမှာရှိတဲ့ အိမ်တအိမ်မှာ သစ်ပင် ၆၀၅ ပင်၊ အလှဆင်ပစ္စည်း ၁၂၀,၀၀၀၊ မီး ၅၀,၀၀၀၊ ခရစ္စမတ်အရုပ် ထောင်ပေါင်းများစွာနဲ့ ပြုလုပ်ထားတာကို ဂျာမနီစံချိန်သတ်မှတ်ရေး RID က အတည်ပြုပေးခဲ့ပါတယ်။

ခရစ္စမတ်နဲ့ပတ်သက်ပြီး အလှဆင်ရတာကို ချစ်မြတ်နိုးတဲ့ သောမတ်ဂျရိုမင်ဟာ တအိမ်လုံးအပြည့် သန့်စင်ခန်းတွေပါ မချန် ခရစ္စမတ်သစ်ပင်တွေနဲ့ အလှဆင်ခဲ့တာဖြစ်ပါတယ်။

ဂျရိုမင်မိသားစုဟာ ၂၀၁၇ ခုနှစ်ကနေ ၂၀၂၁ ခုနှစ်အထိ ဒီလိုစံချိန်တင်နိုင်မှုတွေ ပြုလုပ်ခဲ့ပြီး ၂၀၂၃ ခုနှစ်မှာလည်း ပြုလုပ်ခဲ့တာ တွေ့ရပါတယ်။

ပြီးခဲ့တဲ့နှစ်က ခရစ္စမတ်သစ်ပင် ၅၅၅ ပင်နဲ့ စံချိန်သစ်တင်နိုင်ခဲ့တဲ့ ဒီမိသားစုဟာ ခရစ္စမတ်သစ်ပင် အလှဆင်မှုစံချိန် ၇ ကြိမ် ရရှိခဲ့ဖူးပါတယ်။

ခရစ္စမတ်သစ်ပင်နဲ့ပတ်သက်ပြီး နောက်ထပ် ထူးခြားတဲ့ သတင်းတပုဒ်အဖြစ် ဥရောပရဲ့ တန်ဖိုးအကြီးဆုံး ခရစ္စမတ်သစ်ပင်ကိုလည်း ဂျာမနီနိုင်ငံ မြူးနစ်မြို့မှာ ဒီဇင်ဘာ ၃ ရက်က ပြသခဲ့ပါတယ်။

အမြင့် ၃ မီတာရှိတဲ့ ရွှေနဲ့ပြုလုပ်ထားတဲ့ ခရစ္စမတ်သစ်ပင်က ယူရို ၅ ဒသမ ၂ သန်းကျော် တန်ကြေးရှိပါတယ်။

ခရစ္စမတ်သစ်ပင်ပုံစံ ပြုလုပ်ထားတဲ့ ပုံစံထဲမှာ ဒင်္ဂါး ၁ ပြားကို ၂၀ အောင်စရှိတဲ့ ဗီယင်နာဖီလ်ဟာမိုနစ် အကြွေစေ့တွေနဲ့ အလှဆင်ထားပါတယ်။

ဥရောပရဲ့ တန်ဖိုးအကြီးဆုံး ခရစ္စမတ်သစ်ပင်ကို ရောင်းချမှာ မဟုတ်ဘဲ ဒီဇင်ဘာ ၅ ရက် အထိ ပြသသွားမှာ ဖြစ်ပါတယ်။

Source: Reuters