ကရင်နီပြည် ပြည်သူ့လွတ်မြောက်ရေးတပ်မတော် (KPLA) ရဲ့ အမှတ် ၉၄၂၀ တပ်ရင်း တည်ထောင်တာ နိုဝင်ဘာ ၁၈ ရက်မှာ ၂ နှစ်ပြည့်ခဲ့ပြီလို့ တပ်ရင်းက ထုတ်ပြန်ထားပါတယ်။

အမှတ် ၉၄၂၀ တပ်ရင်းကို ၂၀၂၂ ခုနှစ် နိုဝင်ဘာ ၁၈ ရက်မှာ စတင်တည်ထောင်ခဲ့ကာ တော်လှန်ရေးကာလ ၂ နှစ်တာကို ဖြတ်သန်းခဲ့ပြီး စစ်ကောင်စီတပ်ကို ဆက်လက် တော်လှန်သွားမယ်လို့ ဆိုပါတယ်။

KPLA အမှတ် ၉၄၂၀ တပ်ရင်း ပြန်ကြားရေးတာဝန်ရှိသူက “တပ်ရင်းတည်ထောင်တာ ၂ နှစ်ပြည့်တဲ့ အထိမ်းအမှတ်အနေနဲ့ အမှတ်တရဖြစ်အောင် ပြုလုပ်ဖြစ်တာပါ။ ပူးပေါင်းတပ်က အရာရှိတွေ တက်ရောက် အမှာစကားပြောတာ၊ အားကစားအစီအစဥ်တွေလည်း လုပ်ဖြစ်ပါတယ်” လို့ ပြောပါတယ်။

၂ နှစ်ပြည့် အခမ်းအနားမှာ တပ်ရင်းက ဥက္ကဋ္ဌ၊ ဒုဥက္ကဋ္ဌ၊ အတွင်းရေးမှူးတွေက အမှာစကားပြောတာ၊ သစ္စာအဓိဋ္ဌာန် ရွတ်ဆိုတာ၊ ခြင်းလုံးပြိုင်ပွဲ၊ ဘောလုံးပြိုင်ပွဲ အစီအစဥ်တွေနဲ့ ကျဆုံးခဲ့ရတဲ့ ရဲဘော်တွေအတွက် အရုဏ်ဆွမ်း ကပ်လှူပူဇော်တာတွေ ပြုလုပ်ခဲ့တယ်လို့ သိရပါတယ်။

အခုလက်ရှိမှာ ဖားဆောင်းမြို့သိမ်းတိုက်ပွဲနဲ့ ဘောလခဲမြို့နယ်မှာရှိတဲ့ စခန်းကုန်းသိမ်း တိုက်ပွဲတွေမှာ တော်လှန်ရေးအင်အားစုတွေနဲ့အတူ ပူးပေါင်းပါဝင်နေပြီး ၂ နှစ်တာ ကာလအတွင်း တပ်ရင်းက ရဲဘော် ၃၂ ယောက်အထိ ကျဆုံးခဲ့တယ်လို့ သိရပါတယ်။