တိုကျိုမြို့တော် ရဲတပ်ဖွဲ့ဟာ နိုဝင်ဘာ ၁၃ ရက်က အသက် ၆၅ နှစ်အရွယ် အမေရိကန် အမျိုးသားတယောက်ကို မေဂျီဂျင်းဂုနတ်ကွန်းရဲ့ တိုးရိဂိတ်ပေါက်က တိုင်လုံးတလုံးမှာ အက္ခရာစာလုံးတွေ ရေးထွင်းတယ်ဆိုတဲ့ သံသယနဲ့ ဖမ်းဆီးခဲ့ပါတယ်။

ဒါဟာ ခရီးသွားလုပ်ငန်း အရှိန်အဟုန် မြင့်တက်နေချိန်မှာ ခရီးသွားဧည့်သည်တွေရဲ့ အကျင့်ပျက် အပြုအမူတွေကို ရင်ဆိုင်ဖြေရှင်းဖို့ ဂျပန်နိုင်ငံရဲ့ နောက်ဆုံးအရေးယူ ဆောင်ရွက်ချက် ဖြစ်ပါတယ်။

သံသယရှိသူနဲ့ သူ့မိသားစုဟာ နိုဝင်ဘာ ၁၁ ရက်က လည်ပတ်ကြည့်ရှုဖို့ ဂျပန်နိုင်ငံသို့ ရောက်ရှိလာခဲ့တာပါ။

လုံခြုံရေးကင်မရာ မှတ်တမ်းတွေအရ သစ်သားတိုင်မှာ သူ့မိသားစုရဲ့ နာမည်တွေကို ကိုယ်စားပြုတဲ့ အက္ခရာ ၅ လုံးကို လက်သည်းနဲ့ခြစ်ပြီးရေးတယ်ဆိုတဲ့ သံသယနဲ့ ရဲတွေက သူ တည်းခိုတဲ့ဟိုတယ်မှာ သူ့ကို လာဖမ်းဆီးနိုင်ခဲ့တယ်လို့ ဆိုပါတယ်။

အမေရိကန်သံရုံးဝန်ထမ်းတွေဟာ အမေရိကန်နိုင်ငံသားဆီကို လာတွေ့ခဲ့ကြပြီး ကောင်စစ်ဝန်ဆိုင်ရာ အကူအညီတွေ ပေးနေကြောင်း ပြောရေးဆိုခွင့်ရှိသူက ပြောကြားပါတယ်။ ဒါပေမဲ့ ကိုယ်ရေးကိုယ်တာ လုံခြုံရေးအကြောင်းရပ်တွေကြောင့် နောက်ထပ်အသေးစိတ် အချက်အလက်တွေကိုပေးဖို့တော့ ငြင်းဆိုထားပါတယ်။

ဂျပန်နိုင်ငံဟာ စက်တင်ဘာလအထိ ခရီးသွားဧည့်သည် ၂၇ သန်းနီးပါးကို စံချိန်တင် အရှိန်အဟုန်နဲ့ ကြိုဆိုခဲ့ပြီး သူတို့ရဲ့စီးပွားရေးအတွက် ယန်း ၅ ဒသမ ၈၆ ထရီလီယံ (ဒေါ်လာ ၃၇ ဒသမ၅ ဘီလီယံ) တိုးခဲ့ပါတယ်။

ဒါပေမဲ့ လူသွားလူလာများတဲ့ နေရာတွေမှာ အများပြည်သူပိုင် ပစ္စည်းတွေ၊ အနုပညာလက်ရာတွေကို ဖျက်လိုဖျက်ဆီးလုပ်ခြင်း၊ လူသူကြားထဲ မူးယစ်ရမ်းကားခြင်း၊ နာမည်ကြီး အလည်အပတ်နေရာတွေမှာ ခရီးသွားဧည့်သည်တွေ စုပြုံရောက်ရှိလာခြင်း စတဲ့ ဖြစ်ရပ်တွေမှာ ခရီးသည်တွေ အလွန်အကျွံ များပြားခြင်းတွေနဲ့ စည်းကမ်းဖောက်ဖျက်သူတွေကို ဘယ်လိုနိုင်နင်းအောင် ကိုင်တွယ်မလဲ ဆိုတာတွေကို ဆွေးနွေးငြင်းခုံခဲ့ရပါတယ်။

ဂျပန်နိုင်ငံ တိုကျိုမြို့တော်ရှိ ရှီဘုယရပ်ကွက်ရှိ ဧကရာဇ်ဘုရင် မေဂျီနဲ့ သူ့မိဘုရားရှိုကန် ဘုရင်မ တို့ကို ရည်စူးပြီးတော့ မေဂျီ နတ်ကွန်းကို ၁၉၂၀ ပြည့်မှာ တည်ဆောက်ခဲ့တာဖြစ်ပါတယ်။   

Source : Reuters