ဒီကနေ့ကျရောက်တဲ့ တန်ဆောင်မုန်းလပြည့်နေ့မှာ ရွှေတိဂုံစေတီတော်ကို ဘုရားဖူး လာရောက်သူတွေ နည်းပါးခဲ့ပါတယ်။
ရွှေတိဂုံစေတီတော် ဂေါပကအဖွဲ့ကတော့ မသိုးသင်္ကန်း ရက်လုပ်ပူဇော်ပွဲကို မနေ့ နိုဝင်ဘာ ၁၄ ရက် ညနေ ၄ နာရီခွဲမှာ ကျင်းပခဲ့ပြီး ဒီကနေ့ လပြည့်နေ့မနက် ၄ နာရီမှာ စေတီတော်နဲ့ အာရုံခံတန်ဆောင်းများရှိ ဗုဒ္ဓရုပ်ပွားတော်များအား ကပ်လှူပူဇော်ခဲ့ပါတယ်။
တန်ဆောင်မုန်းလပြည့်နေ့ဟာ ဗုဒ္ဓဘာသာဝင်တို့ အထွတ်အမြတ်ထားရာ နေ့ထူးနေ့မြတ်ဖြစ်ပြီး ဘုရားရှင်ကို ဆီမီးထွန်းညှိပူဇော်တဲ့ပွဲတော် ဖြစ်သလို အမြင့်မြတ်ဆုံးဖြစ်တဲ့ ကထိန်သင်္ကန်း ဆပ်ကပ်လှူဒါန်းခွင့်ရတဲ့ နောက်ဆုံးနေ့ရက်လည်း ဖြစ်ပါတယ်။
ဒါ့အပြင် ထီးနန်းရလိုမှုနဲ့ ဖခင်ကို သတ်ဖြတ်ခဲ့တဲ့ အဇာတသတ်မင်းကို မြတ်စွာဘုရားရှင်က သာမညဖလသုတ်တော် ဟောကြားခဲ့တဲ့ နေ့ထူးနေ့မြတ်တရက်လည်း ဖြစ်ပါတယ်။
တန်ဆောင်မုန်းလပြည့်နေ့မှာ နေ့မကူးဘဲ ရက်လုပ်ထားတဲ့ မသိုးသင်္ကန်း ဆပ်ကပ်လှူဒါန်းပွဲကိုလည်း ရှေးယခင်ကတည်းက ကျင်းပကြတာဖြစ်ပါတယ်။
