နိုင်ငံခြားငွေဈေး ထိန်းချုပ်ဖို့ကြိုးစားနေတဲ့ စစ်ကောင်စီ ဗဟိုဘဏ်ဟာ နိုဝင်ဘာ ၄ ရက်မှာ အမေရိကန်ဒေါ်လာ ၁၅ သန်း၊ ထိုင်းဘတ် သန်း ၁၀၀၊ တရုတ်ယွမ်ငွေ ၁ သန်းခွဲ အသီးသီး ထုတ်ရောင်းခဲ့ပါတယ်။
အမေရိကန်ဒေါ်လာကို တဒေါ်လာ ၃၅၇၅ ကျပ်၊ ထိုင်းဘတ်ကို တဘတ် ၁၂၅ကျပ်၊ တရုတ်ယွမ်ကို တယွမ် ၅၂၉ ဒသမ ၉ နဲ့ ဗဟိုဘဏ်ရဲ့ အွန်လိုင်းပလက်ဖောင်းကတဆင့် ထုတ်ရောင်းခဲ့တာ ဖြစ်ပါတယ်။
ပြင်ပဈေးကွက်မှာတော့ အမေရိကန်ဒေါ်လာဟာ နိုဝင်ဘာ ၄ ရက်မှာ တဒေါ်လာ ၄၄၀၀-၄၅၀၀ ဈေးပေါက်ခဲ့ပြီး ထိုင်းဘတ်ငွေဈေးကတော့ တဘတ်ကို ၁၂၉-၁၃၃ကျပ်၊ တရုတ်ယွမ်ဈေးကတော့ တယွမ်ကို ၆၁၅-၆၃၅ကျပ် ပေါက်ဈေးရှိပါတယ်။
စစ်ကောင်စီရဲ့ ဗဟိုဘဏ်ဟာ ပြီးခဲ့တဲ့ အောက်တိုဘာလ တလတည်းမှာတင် အမေရိကန်ဒေါ်လာ ၉၁ သန်း၊ ထိုင်းဘတ် ၆၁၀ သန်း၊ တရုတ်ယွမ် ၉ ဒသမ ၈ သန်းအထိ သန်းပေါင်းများစွာ ထုတ်ရောင်းပြီး ဒေါ်လာဈေးကို ထိန်းချုပ်နေတာဖြစ်ပါတယ်။
ဒါကြောင့်လည်း ပြီးခဲ့တဲ့ ဩဂုတ်လအတွင်းက တဒေါ်လာ ၇၀၀၀ ကျပ်အထိ မြင့်တက်ခဲ့တဲ့ ဒေါ်လာဈေးဟာ တရိပ်ရိပ် ပြန်ကျလာခဲ့ပြီး ၄၅၀၀ ကျပ် ဝန်းကျင်မှာ ငြိမ်နေပါတယ်။
