အိန္ဒိယ-မြန်မာနယ်စပ် စစ်ကိုင်းတိုင်း၊ တမူးမြို့နယ် နန်းမွန်းတားရွာအနီး ပစ်ခတ်မှုမှာ နှစ်ဖက်ထိခိုက်ကျဆုံးမှုတွေ ရှိခဲ့ပြီး စစ်ကောင်စီဘက်က ကသည်းလက်နက်ကိုင်တပ်ဖွဲ့ဝင်တယောက်ကို ဖမ်းဆီးရမိခဲ့တယ်လို့ တမူး PDF တပ်ရင်း ၄ က ပြောပါတယ်။

အောက်တိုဘာ ၂၃ ရက် မနက် ၅ နာရီအကျော်မှာ ပန်းသာရွာက စစ်ကောင်စီနဲ့ ကသည်းလက်နက်ကိုင် ပူးပေါင်းတပ်က အင်အား ၅၀ ခန့်ပါ စစ်ကြောင်းဟာ နန်းမွန်းတာရွာဘက်ကို စစ်ကြောင်းထိုးစဉ် ဒေသခံကာကွယ်ရေးတပ်ရဲ့ ရှေ့တန်းကာကင်း ပစ်ခတ်ခံရပြီး တမူး PDF ရဲဘော် ၃ ယောက်ကျဆုံးခဲ့တယ်လို့ ဆိုပါတယ်။

အဲ့ဒီနောက် ပန်းသာရွာက စစ်ကောင်စီလက်အောက်ခံ ကသည်းလက်နက်ကိုင် ၁၀ ယောက်ဟာ နန်းမွန်းတာရွာဘက်ကို ဆက်လက် စစ်ကြောင်းထိုးဖို့ လာရောက်စဉ် နန်းမွန်းတာရွာအဝင် တံတားအနီးမှာ ဒေသကာကွယ်ရေးတပ်ဘက်က ပစ်ခတ်လို့ ကသည်းလက်နက်ကိုင် ၃ ယောက် ကျဆုံးပြီး တယောက်ကို ‌ဒေသခံကာကွယ်ရေးတပ်ဘက်က ဖမ်းဆီးရမိခဲ့တာပါ။

တမူး PDF တာဝန်ရှိသူတယောက်က “ပန်းသာအနီးရှေ့တန်းကာကင်းမှာ အမတို့ ကာကင်းထားတာ၊ ရဲဘော် ၇ ဦးမှာ ၄ ဦးက ထွက်ပြေးခဲ့တယ်။ နောက် ၃ ဦးကတော့ ကင်းမှာပဲ ပစ်သတ်ခံခဲ့ရတာ။ ကာကင်းကို သူတို့သိမ်းပြီး ဆက်စစ်ကြောင်းထိုးလာတာ။ အဲ့ဒီမှာ ရှေ့ဆုံးက ဆိုင်ကယ် ၅ စီးနဲ့ လာခဲ့တဲ့ ကသည်းလက်နက်ကိုင်တွေကို ကလေးတွေက နန်းမွန်းတား တံတားအဝင်မှာပစ်တာ။ သူတို့ဘက်က ၃ ဦးကျတယ်၊ ၁ ဦးကို ဖမ်းမိထားတယ်။‌ ကျန်တဲ့ ၆ ဦးကတော့ ထွက်ပြေးသွားတယ်” လို့ပြောပါတယ်။

ဖမ်းဆီးရမိထားတဲ့ ကသည်းလက်နက်ကိုင်တယောက်ကိုတော့ ဒဏ်ရာတွေရထားတာကြောင့် ဆေးကုသမှုပေးထားပြီး စစ်ဆေးမေးမြန်းနေတယ်လို့ ဆိုပါတယ်။

စစ်ကောင်စီရဲ့ ပစ်ခတ်မှုကြောင့် ကျဆုံးသွားတဲ့သူတွေကတော့ တမူး PDF တပ်ရင်း ၄ က တပ်စိတ်မှူး သော်ဇင်ထွန်း၊ ရဲဘော်ပိုင်မင်းစံနဲ့ ရဲဘော် အငယ်ကောင်တို့ ဖြစ်ပါတယ်။

လက်ရှိ တမူးမြို့အနီးမှာ စစ်ကောင်စီနဲ့ ဒေသခံကာကွယ်ရေးတပ်တွေကြား စစ်ရေးအခြေအနေ တင်းမာနေတယ်လို့ သိရပါတယ်။