ရခိုင်ပြည်၊ ဂွမြို့နယ်၊ ကျိန္တလီမြို့ကို စစ်တပ်က ဇွန် ၂၀ ရက် နေ့လယ်မှာ ဗုံးကြဲလို့ ဒေသခံ ၂ ယောက် ဒဏ်ရာရသွားတယ်လို့ သိရပါတယ်။
ပေါင် ၅၀၀ ဗုံးကြဲခဲ့တာလို့ သိရပြီး သိပ္ပံလမ်းနဲ့ ကိန္နရီလမ်းကို ကျရောက်ပေါက်ကွဲလို့ ကျိန္တလီမြို့၊ အမှတ် ၂ ရပ်ကွက်က အသက် ၅၇ နှစ်အရွယ် ဒေါ်တင်တင်ဝင်း နဲ့ ၆၇ နှစ်အရွယ် ဦးခင်မောင်ဝင်း တို့ ဖြစ်ကြပါတယ်။
အိမ်တချို့လည်း ပြိုကျပျက်စီးခဲ့ပြီး ဇွန် ၁၄ ရက် နေ့ကလည်း ဂွမြို့နယ်၊ ကျောက်ချွန်ရွာကို စစ်တပ်က ဂျက်ဖိုက်တာနဲ့ ၂ ကြိမ် ဗုံးကြဲတိုက်ခိုက်ခဲ့လို့ ပြည်သူ ၁ ယောက် ဒဏ်ရာရပြီး အိမ်မွေးတိရစ္ဆာန်တချို့ သေဆုံးသလို စာသင်ကျောင်းတကျောင်းအပါဝင် လူနေအိမ်တချို့ ပျက်စီးခဲ့တယ်လို့ သိရပါတယ်။
ဒေသခံတယောက်က “ကျိန္တလီကိုပဲ လာလာပစ်တယ် လေကြောင်းကနေပြီး။ ရေကြောင်းကဆိုလည်း နေဗီက မကြာမကြာ ပစ်ခတ်ခံရတယ်။ ဒေသခံတွေက လေကြောင်းနဲ့ ရေကြောင်းကို အဓိကထား ကြောက်နေရတယ်” လို့ ပြောပါတယ်။
အလားတူ ဇွန် ၁၅ ရက် ည ၇နာရီလောက်ကလည်း ကျိန္တလီမြို့၊ ရမ္မာကျွန်းကျေးရွာကို စစ်တပ်က ဗုံးကြဲတိုက်ခိုက်ခဲ့တာကြောင့် ဒေသခံပြည်သူ ၂ ယောက် သေဆုံး၊ ၄ ယောက် ထိခိုက်ဒဏ်ရာရခဲ့ပြီး လူနေအိမ်တချို့ ပျက်စီးသွားခဲ့ရတယ်လို့ အာရက္ခတပ်တော် AA က ထုတ်ပြန်ထားပါတယ်။
ပြီးခဲ့တဲ့ရက်ပိုင်းတွေမှာ ရခိုင်ပြည်နယ်က ကျောက်တော်နဲ့ ဂွမြို့နယ်ထဲကို ရက်ဆက်ဆိုသလို ဗုံးကြဲတိုက်ခိုက်နေတာ ဖြစ်ပါတယ်။
