တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်၊ ပဝကျေးရွာကို လက်နက်ကြီးတွေနဲ့ ၂ ရက်ဆက်တိုက် ပစ်ခတ်တိုက်ခိုက်ခဲ့တာကြောင့် နေအိမ်တွေ ထိခိုက်ပျက်စီးခဲ့တယ်လို့ ဒေသခံတွေဆီက သိရပါတယ်။

မော်တုန်းရွာအခြေစိုက် ၃၀၆ အမြောက်တပ်ကနေ စက်တင်ဘာ ၂၄ ရက် နေ့လယ် ၂ နာရီ ကျော် လောက်မှာ ပဝကျေးရွာထဲကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ ဒေသခံပြည်သူတွေ က ပြောပါတယ်။

လက်နက်ကြီး ၃ လုံးခန့် ပစ်ခတ်ခဲ့တာဖြစ်ပြီး ပဝရွာထဲက လူနေအိမ်အနီး ကျရောက်ပေါက်ကွဲကာ ခြံထဲက အပင်တချို့ ထိခိုက်ပျက်စီးခဲ့သလို နေအိမ်တွေမှာပါ ကျည်အစ စင်ခဲ့တယ်လို့ ဒေသခံ အမျိုးသားတယောက်က ပြောပါတယ်။

“ပဝရွာနဲ့ အမြောက်တပ်က အလှမ်းဝေးတော့ လက်နက်ကြီးပစ်သံတွေ မကြားရဘူး။ ရွာသားမှာတော့ ထိခိုက်မှုမရှိပေမဲ့ လက်နက်ကြီးအသံမကြားဘဲ လာကျနေတော့ ကြောက်နေရတယ်။” 

စက်တင်ဘာ ၂၅ ရက် မနက် ၈ နာရီလောက်မှာလည်း အဆိုပါအမြောက်တပ်ကနေ ပဝရွာကို လက်နက်ကြီးတွေနဲ့ ထပ်မံပစ်ခတ်တိုက်ခိုက်ခဲ့ပြီး ထိခိုက်ပျက်စီးမှုအခြေအနေကိုတော့ မသိရသေးပါဘူး။

အဆိုပါ ၂ ရက်ဆက် လက်နက်ကြီးတွေနဲ့ ပစ်ခတ်တိုက်ခိုက်ရာမှာ လူနေအိမ်တွေသာ ထိခိုက် ပျက်စီးခဲ့ပြီးတော့ လက်ရှိအချိန်ထိ အရပ်သားပြည်သူထိခိုက်မှုတွေတော့ မရှိသေးဘူးလို့ ဒေသခံ တဦးက ပြောပါတယ်။

စက်တင်ဘာ ၂၃ ရက်ကလည်း တနင်္သာရီမြို့နယ်၊ ဘန်းလမွတ်ကျေးရွာအုပ်စု၊ ညောင်ပင်ကုန်းရွာကို ၃၀၆ အမြောက်တပ်က လက်နက်ကြီးတွေပစ်ခတ်တဲ့ ဒေသခံအမျိုးသမီး ၃ ဦးမှာ ကျည်အစ ထိမှန် ဒဏ်ရာ ရသွားပြီးတော့ လူနေအိမ်တချို့လည်း ထိခိုက်ပျက်စီးခဲ့ပါသေးတယ်။

စစ်ကောင်စီတပ်က စက်တင်ဘာ အစပိုင်းကတည်းက တနင်္သာရိမြို့နယ်၊ ကျေးရွာတွေဘက်ကို လက်နက်ကြီးတွေ ပစ်ခတ်တဲ့အပြင် ဒရုန်းတွေအသုံးပြုပြီး ရွာတွေထဲကို ဗုံးသီးချ တိုက်ခိုက်မှုတွေကြောင့် အရပ်သားသေဆုံးတာတွေ ရှိနေပါတယ်လို့ ဒေသခံပြည်သူတွေက ပြောပါတယ်။

ရှမ်းပြည်နယ် သီပေါမြို့နယ်မှာလည်း စစ်ကောင်စီက ၂ ရက်ဆက် ဗုံးကြဲခဲ့တာကြောင့် ပြည်သူ ၄ ယောက်သေဆုံးခဲ့တယ်လို့ တအာင်းအမျိုးသားလွတ်မြောက်ရေးတပ်မတော် (TNLA) က ထုတ်ပြန်ထားပါတယ်။

စက်တင်ဘာ ၂၃ ရက် ညနေ ၃ နာရီချိန်မှာ စစ်ကောင်စီက ဂျက်တိုက်လေယာဉ် ၂ စင်းနဲ့ လာရောက် ဗုံးကြဲခဲ့ပြီး နားလွယ်ကျေးရွာမှာ ကျရောက်ပေါက်ကွဲခဲ့တာကြောင့် အသက် ၁၈ နှစ်အရွယ် မောင်ကြည်တာ၊ ၂၁ နှစ်အရွယ် မောင်ဂူသာ၊ အသက် ၅၀ အရွယ် ဒေါ်မာလေးနဲ့ ၇၇ နှစ်အရွယ် ဒေါ်အေနွန်တို့ ပွဲချင်းပြီး သေဆုံးခဲ့ရတယ်လို့ ဆိုပါတယ်။

ပြီးတော့ အသက် ၂ နှစ်အရွယ် ကလေးအပါအဝင် အမျိုးသား ၃ ယောက်မှာ ဦးခေါင်းနဲ့ ခြေထောက်၊ ပေါင်၊ လက်မောင်းတို့ အပြင်းအထန်ဒဏ်ရာရခဲ့ပြီး နားလွယ်ရွာက အိမ် ၁၀ လုံးထက်မနည်း ပျက်စီးခဲ့ရသလို မပေါက်ကွဲသေးတဲ့ ဗုံး ၁ လုံးလည်း ကျန်နေတယ်လို့ ထုတ်ပြန်ချက်မှာ ဖော်ပြထားပါတယ်။

စက်တင်ဘာ ၂၂ ရက် ည ၈ နာရီခွဲလောက်ကလည်း စစ်ကောင်စီ Y-12 လေယာဉ်နဲ့ ဗုံး အလုံး ၂၀ ကျော် လာရောက်ကြဲချတိုက်ခိုက်ခဲ့ပြီး ဒေသခံပြည်သူတွေရဲ့ နေအိမ်တွေ ထိခိုက်ပျက်စီးခဲ့တယ်လို့ ဆိုပါတယ်။

စစ်ကောင်စီဟာ စက်တင်ဘာ ၁၆ ရက်နဲ့ ၁၇ ရက်ကလည်း သီပေါမြို့ကို ဗုံးကြဲတိုက်ခိုက်လို့ ဒေသခံတွေ ထိမှန်ဒဏ်ရာရပြီး တိုက်ပွဲပြင်းထန်နေတဲ့ နောင်ချိုမြို့ကိုလည်း လေယာဉ်နဲ့ အကြိမ်ကြိမ်လာရောက်ပြီး ဗုံးကြဲတိုက်ခိုက်လို့ ဒေသခံတွေ ထိခိုက်ဒဏ်ရာရသလို နေအိမ်တွေလည်း ပျက်စီးခဲ့ပါတယ်။