ကချင်ပြည်နယ်၊ ဖားကန့်မြို့၊ ဆိုင်းတောင်ရွာမှာ စစ်ကောင်စီတပ်နဲ့ KIA၊ KPDF ပူးပေါင်းတပ်တွေကြား တိုက်ပွဲပြင်းထန်နေပြီး ဒေသခံ လူငယ် ၃ ယောက် ထိခိုက်ဒဏ်ရာရ သေဆုံးခဲ့တယ်လို့ ဒေသခံတွေက သိရပါတယ်။
စက်တင်ဘာ ၆ ရက်နေ့ညမှာ အင်အား ၁၀၀ ဝန်းကျင်ရှိတဲ့ စစ်ကောင်စီတပ်တွေက ဆိုင်းတောင်ရွာက Lucky Man Hotel မှာ KIA KPDF တွေရှိတယ်ဆိုပြီး ဝင်စီးခဲ့ပြီးနောက် တိုက်ပွဲစတင်ဖြစ်ပွားခဲ့တာပါ။
ဒေသခံတယောက်က “မနေ့က ပြည်သူ ၃ ဦး သေတယ်။ လူငယ် အမျိုးသား ၃ ယောက်ပေါ့။ အလောင်းတွေကိုတော့ မနက်ကမှ လာကောက်သွားကြတယ်။ အခု ဆိုင်းတောင်က အဝင်အထွက် အကုန်ပိတ်ထားတယ်။ အခုက Lucky Man Hotel မှာ ဝင်စီး စစ်ကြောင်းထိုးတဲ့ စကစကို ပြန်ဝိုင်းထားတဲ့ အခြေအနေ။ ယူမာဘက် လမ်းတွေလည်း အကုန်ပိတ်ထားတယ်” လို့ ပြောပါတယ်။
ဒီကနေ့ စက်တင်ဘာ ၈ ရက်နေ့အထိ စစ်ရေးတင်းမာနေဆဲဖြစ်ပြီး ဆိုင်းတောင်ရွာ အဝင်အထွက်လမ်းတွေကိုလည်း အကုန်ပိတ်ဆို့ထားတယ်လို့ သိရပါတယ်။
ဒေသခံတယောက်က “၆ ရက်ည ၁၁ နာရီလောက် ဆိုင်းတောင်ရွာကို စစ်ကြောင်းဝင်လာတယ်။ Lucky Man Hotel ကို ဝင်စီးပြီး ဟိုတယ်ထဲက လူတွေကိုလည်း ဖမ်းထားတယ်။ ၆ ရက်ညနဲ့ ၇ ရက်မနက်ကတော့ တောက်လျှောက် လက်နက်ကြီး၊ လက်နက်ငယ်သံတွေ ကြားရတယ်။ မနေ့ကလည်း တနေကုန်ပဲ လက်နက်ကြီး၊ လက်နက်ငယ်သံတွေ ပစ်ခတ်သံတွေ ကြားရတယ်။ ဒီမနက် ၈ ရက်နေ့လည်း မနက်ကတည်းက သေနတ်သံတွေကြားနေရပြီ” လို့ ပြောပါတယ်။
စစ်ကောင်စီတပ်တွေ စစ်ကြောင်းထိုးဝင်လာတာကြောင့် ဆိုင်းတောင်ရွာထဲက ဒေသခံတချို့ကတော့ တိုက်ပွဲဖြစ်လာနိုင်တဲ့အတွက် ညတွင်းချင်း တိမ်းရှောင်သွားကြပြီး တချို့ကတော့ ရွာထဲ ကျန်ရှိနေသေးတယ်လို့ သိရပါတယ်။
လက်ရှိ ဆိုင်းတောင်ရွာအတွင်းမှာတော့ စစ်ရေးတင်းမာနေဆဲဖြစ်ပြီး ကျန်နေခဲ့တဲ့ ပြည်သူတွေကတော့ နေအိမ်ထဲ တံခါးပိတ်နေကြရတယ်လို့ ဒေသခံတွေက ပြောပါတယ်။
ကချင်ပြည်နယ်အတွင်း ဖုန်းလိုင်း၊ အင်တာနက်လိုင်းနဲ့ ဝိုင်ဖိုင်လိုင်းတွေကို ဖြတ်တောက်ခံထားရတာာ ၂ လနီးပါး ရှိလာပြီဖြစ်ပြီး စစ်ကောင်စီဘက်ကလည်း ကုန်းလမ်း၊ ရေလမ်းအပြင် လေကြောင်းကနေပါ အင်အားဖြည့်တင်းနေတာ ဖြစ်ပါတယ်။
စက်တင်ဘာလ ၄ ရက်နေ့ကလည်း ဖားကန့်-ဆိုင်းတောင်-လုံးခင်း လမ်းဟောင်းဘက် ဂျန်ဂတ်ရွာဘက်ကို စစ်ကြောင်းထိုးလာတဲ့ စစ်ကောင်စီတပ်တွေကို KIA KPDF ပူးပေါင်းတပ်တွေ ကြားဖြတ်တိုက်ခိုက်ခဲ့တာကြောင့် ဂျန်ဂတ်ဘက်မှာလည်း လက်ရှိအချိန်ထိ တိုက်ပွဲပြင်းထန်နေဆဲဖြစ်ပါတယ်။
ဩဂုတ် ၁၅ ရက်နေ့က ဖားကန့် လမောင်ဗျူဟာစခန်းကုန်းနဲ့ တောမှော်တပ်စခန်းကို လက်လွှတ်ထားရတဲ့ စစ်ကောင်စီတပ်ဟာ ဩဂုတ် ၂၃ ရက်နေ့ကစပြီး ရဟတ်ယာဉ်နဲ့ စစ်အင်အားဖြည့်နေရာကနေ ဩဂုတ်လနောက်ဆုံးအပတ်မှာ စတင် စစ်ရေးလှုပ်ရှားလာပြီး စက်တင်ဘာ ၄ ရက်နေ့မှာတော့ မရှီကထောင်ဘက်မှာ စစ်ရေးလှုပ်ရှားလာပါတယ်။
