ယူကရိန်းရဲ့ F-16 တိုက်လေယာဉ်ကို ရုရှားက ပစ်ချခဲ့တယ်လို့ ယူကရိန်း စစ်တပ်က ထုတ်ဖော်ပြောဆိုထား ပါတယ်။
တနင်္လာနေ့က ရုရှားရဲ့ အပြင်းအထန်တိုက်ခိုက်မှုတွေကြောင့် F-16 တိုက်လေယာဉ်ပျက်ကျခဲ့တာ ဖြစ်ပြီး လေယာဉ်မောင်းလည်း သေဆုံးခဲ့တယ်လို့ ယူကရိန်းစစ်တပ်က ဆိုပါတယ်။
ဒါဟာ ဒီလဆန်းကမှ ရရှိထားတဲ့ F-16 တိုက်လေယာဉ်ပထမဆုံးအကြိမ် ပျက်ကျမှုပဲဖြစ်ပါတယ်။ မဟာမိတ်တွေက ယူကရိန်းကို F-16 တိုက်လေယာဉ် ၂၄ စင်း ပေးအပ်ခဲ့တာဖြစ်ပြီး ပထမဆုံး လေယာဉ်ပျက်ကျမှုနဲ့ ကြုံတွေ့ခဲ့ရတာ ဖြစ်ပါတယ်။
တိုက်လေယာဉ် ပျက်ကျမှုက ရုရှားရဲ့ ဒုံးကျည်တွေရဲ့ တိုက်ရိုက်ထိခိုက်မှုကြောင့် မဟုတ်ဘူးလို့လည်း ပြောထားတာတွေရှိလို့ လေယာဉ်ပျက်ကျတဲ့အကြောင်းအရင်းမှန်ကိုတော့ မသိရသေးပါဘူး။
F-16 လေယာဉ်မှူးဟာ ရုရှားရဲ့ အကြီးဆုံး လေကြောင်း တိုက်ခိုက်မှုမှာ ခရုစ်ဒုံးကျည် ၃ စင်းနဲ့ ဒရုန်း ၁ စင်းကို ဖျက်ဆီးနိုင်ခဲ့ပါတယ်။
ယူကရိန်းသမ္မတ ဗိုလိုဒီမာဇလန်းစကီးက အမေရိကန်လုပ် F-16 လေယာဉ်ဟာ ရုရှားတွေရဲ့ ဒရုန်းတွေနဲ့ ဒုံးကျည်တွေကို ပစ်ချရင်းကနေ ပျက်စီးခဲ့တယ်လို့ အင်္ဂါနေ့မှာ ထုတ်ပြောထား ပါတယ်။
ဒါ့အပြင် ဇလန်းစကီးက ရုရှားနိုင်ငံထဲအထိ ရောက်တဲ့ တာဝေးပစ်ဒုံးကြည်တွေ အသုံးပြုခွင့်ပေးဖို့ မဟာမိတ်အဖွဲ့တွေဆီ တောင်းဆိုထားတာလည်း တွေ့ရပါတယ်။
F-16 တိုက်လေယာဉ်ပျက်ကျမှုဟာ လာမယ့်လမှာ အမေရိကန်သမ္မတဂျိုးဘိုင်ဒန်ဆီ အောင်ပွဲ အစီအစဉ်ပေးပို့မယ့် ဇလန်းစကီးအတွက် ထိုးနှက်ချက်တစ်ခုလည်း ဖြစ်ပါတယ်။
ယူကရိန်းဟာ ပြည်တွင်းထုတ် ဒုံးကျည်တမျိုး စမ်းသပ်မှုအောင်မြင်တယ်လို့ ပြောဆိုထားပေမဲ့ အသေးစိတ်ထုတ်ပြန်တာမျိုးတော့ မရှိသေးပါဘူး။
Source-Reuters
