စစ်ကိုင်းတိုင်းဒေသကြီး၊ ချင်းတွင်းမြစ်ကမ်းမှာရှိတဲ့ ဟုမ္မလင်းမြို့မှာ ဇူလိုင် ၅ ရက် မနေ့မနက်ပိုင်းကစတင်ကာ မြစ်ရေမြင့်တက်လာပြီး ရပ်ကွက်တွေထဲ ရေတွေ စတင်ဝင်ရောက်လာတယ်လို့ ဒေသခံတွေဆီက သိရပါတယ်။
ချင်းတွင်းမြစ်ရေဟာ ဇွန်လပိုင်း ဒုတိယအပတ်ကစတင်ကာ မြစ်ဖျားပိုင်းက အဆက်မပျက်မိုးရွာသွန်းကာ ရှိဆဲမြစ်ရမျက်နှာပြင်ထက် ၇ ပေလောက် မြင့်တက်လာခဲ့တာ ဖြစ်ပါတယ်။
ဒေသခံတဦးက “ ဒီလ၊ ဒီအချိန်ကတော့ မြစ်ရေက ပုံမှန်မြင့်တက်နေကျပါပဲ။ ဒီနေ့ မနက်ပိုင်းက တော့ကျနော်တို့ ဟုမ္မလင်းမြို့ကတော့ ဒီနေ့ မနက်ခင်းကစတင်ပြီး မြို့ထဲရေဝင်လာတယ်။ ရေကြီးလာလို့ မြို့ခံတွေကတော့ ပြောင်းရွှေ့ကြတာမျိုး သိပ်မတွေ့ရသေးဘူး”လို့ ပြောပါတယ်။
ချင်တွင်းမြစ်ရေဟာ အရင်နှစ်တွေက အခုလို ရေကြီးလာပြီး ဟုမ္မလင်းမြို့ထဲက ရပ်ကွက်ထဲ ရေဝင်လာပြီဂ ၁၀ ရက်၊ ၁၅ ရက်လောက်မှာ မြစ်ရေပြန်လည်ကျဆင်းလေ့ရှိတယ်လို့လည်း သိရပါတယ်။
“ညနေ ၇ နာရီ နောက်ဆုံး ချင်းတွင်းမြစ်ရေ တိုင်းထွာချက်အရ ဟုမ္မလင်းမြို့ရဲ့ စိုးရိမ်ရေမှတ် ၂၉၀၀စင် တီမီတာအားကျော်လွန်ပြီး ၃၀၅၆ စင်တီမီတာအထိရောက်ရှိနေ ပါတယ်ဗျ။ မြစ်ရေက ဒီထက်မက တိုးလာဦးမယ်ဆိုရင်တော့ မြို့သူ၊ မြိုသားတွေ နေရပ်စွန်ခွာပြီး ဘေးလွတ်ရာမှ နေဖို့သင်တယ်လို့ လူမှုကယ်ဆယ်ရေးပရဟိတအဖွဲ့ ခေါင်းဆောင်တဦးက ပြောပါတယ်။
ဇူလိုင် ၁ ရက် မိုးဇလရဲ့ ၁၀ ရက်တာခန့်မှန်းထုတ်ပြန်ချက်အရ ဧရာဝတီမြစ်ရေဟာ ဗန်းမော်၊ ရွှေကူ၊ ကသာ၊ သပိတ်ကျင်း၊ မန္တလေး၊ စစ်ကိုင်း၊ မြင်းမူစတဲ့မြို့တွေမှာ ၆ ပေမှ ၁၀ ပေခန့်၊ ချင်းတွင်းမြစ်ရေဆိုရင်လည်း ခန္တီး၊ ဟုမ္မလင်း၊ ဖောင်းပြင်၊ မော်လိုက်၊ ကလေးဝ၊ မင်းကင်း၊ ကနီ၊ မြင်းမူစတဲ့မြို့တွေမှာ ၈ ပေမှ ၁၃ ပေခန့်အထိ မြင့်တက်လာနိုင်တယ်လို့ ထုတ်ပြန်ထားပါတယ်။
