ပြည်သူ့လွှတ်တော် အစိုးရရဲ့ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီ ရဲ့ အစီရင်ခံစာတရပ်ကို ဒီနေ့ကျင်းပတဲ့ လွှတ်တော်ထံ တင်သွင်းခဲ့ပြီး ၀န်ကြီးဌာနအသီးသီးက လုပ်ကိုင်ဆောင်ရွက်ဖို့ ကတိပေးထားတဲ့ လုပ်ငန်းပေါင်း ၅၀၀ ကျော်ကျန်ရှိနေတယ်လို့ ကော်မတီအတွင်းရေးမှူး ဦးသန်းမြင့်က ဒီဗွီဘီကို ပြောပါတယ်။ ဒါဟာ ပထမအကြိမ်လွှတ်တော်ကနေ န၀မအကြိမ်လွှတ်တော်တွင်း ပေးထားတဲ့ကတိက၀တ်တွေ မလုပ်ပေးတာလို့ သူက ပြောပါတယ်။
လွှတ်တော်ကို ပေးထားတဲ့ကတိက၀တ်တွေအတိုင်း အများဆုံး အကောင်အထည် မဖော်ပေးနိုင်တဲ့ ၀န်ကြီးဌာနတွေက မွေးမြူရေးကျေးလက်ဖွံ့ဖြိုးရေး၊ ကျန်းမာရေးနဲ့ ဆောက်လုပ်ရေးဝန်ကြီးဌာနတို့ ဖြစ်တယ်လို့လည်း ဦးသန်းမြင့်က ပြောပါတယ်။
ပြည်သူ့လွှတ်တော် အစိုးရရဲ့ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီ အတွင်းရေးမှူး ဦးသန်းမြင့်ကို ဒီဗွီဘီဝိုင်းတော်သား ကိုရွှေအောင်က ဆက်သွယ်မေးမြန်း ထားပါတယ်။
