Pixar အန်နီမေးရှင်းစတူဒီယိုက ထုတ်လုပ်တဲ့ Inside Out 2 ဇာတ်ကားဟာ ၃ ပတ် မပြည့်သေးခင်မှာပဲ ကမ္ဘာတဝန်း ရုံတင်ဝင်ငွေ ဒေါ်လာ ၁ ဘီလီယံကျော်သွားခဲ့တယ်လို့ ဝေါ့ဒစ္စနေ ကုမ္ပဏီက ထုတ်ပြန်ပါတယ်။

ဒါဟာ အန်နီမေးရှင်းရုပ်ရှင်သမိုင်းမှာ အမြန်ဆုံး ဝင်ငွေ ၁ ဘီလီယံကျော်တာ ဖြစ်ပါတယ်။ ၂၀၂၄ ခုနှစ်အတွက်လည်း ဝင်ငွေအကောင်းဆုံးနဲ့ ဒေါ်လာ ၁ ဘီလီယံကျော် ရထားတဲ့ ပထမဆုံး ရုပ်ရှင်ဇာတ်ကား ဖြစ်လာပါတယ်။

မိန်းကလေးငယ်လေးတဦးရဲ့ အတွင်းစိတ်ခံစားချက်တွေကို အကောင်လေးတွေအဖြစ် ဖော်ကျူးထားတဲ့ ၂၀၁၅ ခုနှစ်က ထွက်ရှိခဲ့တဲ့ Inside Out ဇာတ်ကားရဲ့ အဆက်ဖြစ်ပါတယ်။

Inside Out 2 မှာတော့ အဓိကဇာတ်ကောင် ရိုင်လေဟာ ဆယ်ကျော်သက်ဖြစ်လာပြီး ခံစားချက်သစ်တွေဖြစ်တဲ့ anxiety (စိုးရိမ်ကြောင့်ကြမှု) နဲ့ envy (အားကျမှု၊ မနာလိုမှု) ဆိုတဲ့ ခံစားချက် အသစ်တွေနဲ့ ရင်ဆိုင်ရပုံကို ဖော်ကျူးထားပါတယ်။

မူလ Inside Out ဇာတ်ကားဟာ တကမ္ဘာလုံးအတိုင်းအတာနဲ့ ဒေါ်လာ ၈၅၈ သန်းကျော် ရရှိခဲ့ပါတယ်။

Source-Reuters