ကမ္ဘာမြေက မမြင်နိုင်တဲ့ လရဲ့ အခြားတဖက်ခြမ်းက မြေနဲ့ ကျောက်သားနမူနာတွေ ယူဆောင်လာတဲ့ တရုတ်လဆင်းယာဉ် ချန်အီ-၆ ဟာ တရုတ်နိုင်ငံမြောက်ပိုင်း အတွင်းမွန်ဂိုးလီးယားဒေသမှာ ဇွန် ၂၅ ရက်က ပြန်လည်ဆင်းသက်လာပါတယ်။
ဒါကြောင့် တရုတ်နိုင်ငံဟာ လရဲ့ အခြားတဖက်ခြမ်းက မြေသား ကျောက်သားနမူနာတွေ ကမ္ဘာမြေကို ပြန်လည်သယ်ယူနိုင်တဲ့ ပထမဆုံးနိုင်ငံ ဖြစ်လာပါတယ်။
ချန်အီ-၆ ယာဉ်ကို မေ ၃ ရက်က တရုတ်နိုင်ငံ၊ ဟိုင်နန်ကျွန်းကနေ လွှတ်တင်ခဲ့တာပါ။ စူးစမ်းရေးယာဉ်ဟာ လရဲ့ တောင်ဝန်ရိုးစွန်း၊ အိုက်ကန်ချိုင့်ဝှမ်းမှာ ဆင်းသက်ခဲ့ပြီး မြေသားနမူနာတွေ ရယူနိုင်ခဲ့တာပါ။
စီစဉ်ထားသလို မြေသားကျောက်သားနမူနာ ၂ ကီလိုဂရမ်အထိ ပြန်သယ်လာနိုင်စွမ်းရှိ၊ မရှိကို အတိအကျ မသိရသေးပါဘူး။
လမြေသားနမူနာတွေကို လေယာဉ်နဲ့ မြို့တော်ပေကျင်းကို ပို့ဆောင်ကာ သုတေသန လုပ်မှာဖြစ်ပြီး ဒီလေ့လာမှုကနေ ကမ္ဘာ၊ လနဲ့ နေအဖွဲ့အစည်း ဖြစ်ပေါ်လာပုံ အချက်အလက်သစ်တွေ ဖော်ထုတ်နိုင်မယ်လို့ မျှော်လင့်ထားကြပါတယ်။
Source-Reuters
